Yakub nipaisi nya son dideu niyaijo ningwig honti
49
1 Lene Yakub nduk nipmot bat nya yahagom kwei bipai biyok <<Jikwei ya kui da bidimbot kep tut mun di mipek kep mem je ei nidipti bu.2 Yakub nipmot bat jen e, ma jinduk yam kwei bijintu kep jicig Israel nihyet ug e.
3 Na di Ruben di mighumbou e, nani ne ditde nisindemti cem ningat gi nigom di ntun ditde nisindemti him ri. Nani angut kei bibor kei ba, asindem bibor cem bidor njiriek dipmot bat nindigsi nya yahagom.
4 Anok minyei di ugwa-kwei apino anyeng jei dor njiriek nindigsi nya bi. Acut tut ditnem ndrim ba, abimangkrei ditde nghim nsi tu.
5 Simeon kin Lewi inok adig-ajoi. Indo ingon di mbuk tug hon ide simeda di ibisiber inggrom.
6 Tirigi yuhum yam nsi lene midisrig yokti bi. Tirigi igyok ingon gom lene dinnei minok gom kin yok bi. Lewo igga-gga wai apino ihwen tungwatu nya ugwai-gwai cem ba, itot sapi nya ikien cem ugwai-gwai.
7 Yoni mitug ndei nisigion yokti drek dip igga-gga waisi kin iten-posti. Yoni mitug ndei nisigion yokti drek dip gi imbuk bibor ba, ingkek ndok. Mporo midintek yok gimahap bidem minu Israel nisurti-nipekti hagom ba, dijji yok bingwig srig timiei minu Israelti.
8 Na di Yehuda e, akindig bat-akinjoi bat nya mporo minggei sut na. Lewo akimukep ade siceu nikimama. Gima rino akindig bat-akinjoi bat nya yahagom mikuk yok bina ba, iba ingwak bikik mpia ei aho bei.
9 Yehuda ne singa nehen pap di briug nide mun di yem bingwig ri. Leu api noni ngkwei hanyen ug ei nahamti bitit nimig ninda bibong nyahan ba, hi brim ningkek mem gima bindin noni bi.
10 Yehuda mikrau nibou ndig de tom ei nindati ba, nide nintun him yamti di bram yam nya inyeng tak kep ide limwa nya bijo ninno. Mben nya migo belasten binoni bikuk yok ba, iba ingwak bikik mpia ei noho bei.
11 Noni ba nide keledai nehen pap mibikim ba anggur ninjem di kei-kau. Noni mitot nide sinsun ei ba anggur ngei di nggrom-nggrauti.
12 Niyai nggrom leu gi dut ba anggur ngei ba, nikwai tiei-tiau leu gi dut sapi do ngei.
13 Zebulon mibong kep muk nipimat ba, kibar minyei nya piar nyahan ei nide muk nuhuisi di mbris. Nide dihyei hanjop nsi nohon keti ug bipek Sidon.
14 Isakhar ne keledai di sindem di bong nyahan rin ba, ndigban di noni kon dima ndun him nite hi nite hi cem.
15 Tirigi noni ngat lo, nibongti kei nigwati kei ba, nide minu cem kei bibor lene noni ba ningon di kei bikuk no mem gima ttei ndigban lene hiter nya mibidip huk noni biyai midyai nok awak.
16 Nani ne Dan ba, anok nikei mem ade limwa nya ri. Yoni ne keret di noyam kin keret nindigsi nya ei Israel ri.
17 Nani ne wou di tindei ser simpak ninghas him cem wou piet di tindei kep puig nitta rin ba, ham kuda nikien bibindei ba, no di gwam dip hampiet leu kuda ninghim.
18 TUHAN e, dimem kep ser tto bou tirigi akwei teu da hak!
19 Na di Gad e, yo di imbrai nya mihwen na noro akiek aho ndam yok leu api ahuk yok bu.
20 Asyer de dihyei minnum kei apino noni biyai njita di kei-kau. Noni mporo mitin ei njita mem nibou ndig nya bigyem kep.
21 Naftali ne rusa niwek di mbut-mbut nyen lene bep nipmot di kei bibor kei nya ri.
22 Yusuf ne keledai nehen pap kin keledai di ipijuk kan bi cem ri. Noni bong simiak minyei bousi bidor-dor nyen kui nungug.
23 Mbro nok gino nide siceu di ingon mbuk bibor nya ihwen noni ba, iba ide tibor biprindei noni lo,
24 nide hampiap no nddong kei ba, ninda pang sindem bibor cem tug hon Gembala Di Sindem Bibor kin Yakub de Allah kin mben Israel ide Tring Behei ide nisindemti.
25 Acig de Allah hati tut nani ba, Allah Di Sindem Bibor njei mun di kei bak nani. Mun di kei dima rinok biget di but kwei leu mpia-bbed him kin minyei di biam kwei leu dihyei jou kin munggwom imang bibor di intun nani him kin sapi nya,
26 kin gandum ngan kin bunggan tou mang bibor. Mun di kei di Allah yai bina nimangti nindig dor njiriek mun di kei ei nungug him di jo nijoti habiei ei nimbie him nya. Nna ba Yusuf ba nokep mun di kei dini yok hagom lewo noni mipbor ngat dor njiriek nikindig bat nya kin nikinjoi.
27 Benyamin ne nsien mbrei di niten-pos rin ba, briug mindhe-ndhe nya mem njap bigyoti lene gwam kep bikwas mem mmun.>>
28 Yo dini ne pung di mben Israel ide keret simnaibrimigcan intun him ri. Icig tri tut nihyet dini mpe di po noni pigo bibikwop tungwagom-gom bihigom pima.
Yakub nimaisi
29 Lene Yakub cuk nipmot bat nya bipai <<Jei bi lene dinnei kimbas ba, duug ba, dikum dide bat nimai nya ug ri. Ma jitig dingut bit dicig bat nya ingut ei hak mihyeti di Efron di mben Het nide nipou su pima. 30 Hak mihyeti dima ninyeng Makhpela ba, jo dideu Mamre nite bei mpia nipriti ei minu Kanaan. Lewo Abraham pek dihyei hanjop nsi dima bitut hak mihyeti cem leu Efron leu binhyepo noni tig nimai ngut nya eisi. 31 Itig Abraham ningut kin nitnem Sara ningut cem ei sirima. Itig Ishak ningut kin nitnem Ribka ningut cem ei sirima ba, ditig ditnem Lea ningut cem ei sirima. 32 Abraham pek dihyei hanjop nsi bitut hak mihyeti dima leu mben Het.>> 33 Tirigi Yakub pingok nipmot bat nya ingonti tu lene noni bong nibongti hanyen leu api ninnei kimbas bimai.