Abram teu Lot biningwes ngun
14
1 Mpe dima lene nibou ndig ibou bitai di inyeng Amrafel leu minu Babilonia kin Ariokh leu Elasar kin Kedorlaomer leu Elam kin Tideal leu Goyim injei siceu. 2 Ba, ikon pran bit nibou ndig nya ibou muhwi di inyeng Bera leu Sodom kin Birsya leu Gomora kin Syinab leu Adma kin Semeber leu Zeboim kin nibou ndig leu Bela di ijem ninyeng bipia Zoar. 3 Nibou ndig ibou muhwi dini injei siceu bibicom yam bikieng kep mbang briep ndig Sidim titut yam. Nogindini ijem mbang briep dima Igpong Nsim. 4 Nibou ndig di Kedorlaomer ninyeng tak kep nibou ndig ibou muhwi dima mem ari bingwam simnaibrimigcan tu noro hon kep ari bingwam gi nisimnaibrimigningai lene ikiek imig jou tut noni. 5 Hon kep ari bingwam gi nisimnaibrimigtai lene Kedorlaomer kin nisut nibou ndig di injei siceu bit noni yehei sut ide limwa nya kwei bigya kep bihwen mben Refaim ei Asyterot-Karnaim kin mben Zuzim ei Ham kin mben Emim ei Syawe-Kiryataim. 6 Kin mben Hori ei cet him ei Edom bingwig ba, ijji yok kikau ug ei El-Paran ei nite bei iggum ndigsi ninghas him. 7 Gima ngwig leu api ingkwei hanyen ug ei En-Mispat di ninyeng nijep rino Kades. Lene ico kep minu Amalek titut yam ba, ibindei timek mben Amori di ibong ei Hazezon-Tamar.8 Lene nibou ndig ibou muhwi leu Sodom kin Gomora kin Adma kin Zeboim kin Bela injei siceu ei mbang briep ndig Sidim leu api ikon pran, 9 bit nibou ndig ibou bitai leu minu Elam kin Goyim kin Babilonia kin Elasar. Gima rino nibou ndig ibou muhwi ikon pran bit nibou ndig ibou bitai. 10 Noro mbang briep dima mpung tut jui di aspal joti mang bibor ba, tirigi nibou ndig ibou can leu Sodom kin Gomora inang leu pran dima lene icut ei jui nyati. Noro nibou ndig nindigsi ibou ningai ingwes ngun ug ei cet him. 11 Apino nibou ndig ibou bitai di ibindei timek nindigsi nya dima igya kep bihwen mben Sodom kin mben Gomora bipos ide ndigban kin njita hagom binang tut bingwig. 12 Lene Lot di Abram nikinjoi nipmot po bong ei Sodom pima cem ikat ningat ba, ipos nide ndigban cem hagom bingwig binang tut hak.
13 Noro tungwagom ningwes ngun bidor kwei lene pui sut bak Abram di mben Ibrani pima. Abram bong dideu biei nghousi di timiei minu dima ipigig ser mem ide kwar di ikuk yok bak nya lo, Mamre ninyeng tak kep gumihyep dima. Mamre ne mben Amori rin ba, noni kin Eskol kin Aner ne yo di adig-ajoi rin ba, Abram nisut bat di ibicom yam bit noni ri. 14 Tirigi Abram miap mun di cut igkep Lot di nikinjoi nipmot po nibou ndig nya ikat tu pima lene noni nduk nide limwa pinai nya ibou sratus ningai ba, simnaimuhwidip brimigtehiningai di yahagom ikon pran kan leu api yuhuk bram nibou ndig pima yok kikau ug ei minu ndig Dan. 15 Lene Abram kwas nide limwa nya ei nimpung poi leu api igya kep yok bihwen yok mem mmun bibindei timek yok. Lene noni huk bram yok kikau ug ei minu Hoba ei minu ndig Damsyik nijjai. 16 Abram pos ndigban po nibou ndig nya igyai pima hagom hanyen bitut Lot kin nide ndigban kin sop nya kin yo di ikat yok nindigsi nya ba, yahagom ingkwei hanyen.
Melkisedek njei mun di kei bak Abram
17 Tirigi Abram njei siceu bigya kep bihwen Kedorlaomer kin nisut bat nya bibindei ba, icut bak noni tu lene noni ngkwei hanyen. Lene nibou ndig Sodom ya um noni ei mbang briep ndig Syawe ba, tungwatu nya ijem gumihyep dima Mbang Briep Nibou Ndig. 18 Lene Melkisedek di nibou ndig Salem cem ya um Abram biyai roti kin ba anggur ngei bak. Melkisedek ne imam mem Allah Di Ninyeng Jei Bibor ri. 19 Lene noni njei mun di kei bak Abram bipai bak <<Nna ba Allah Di Ninyeng Jei Bibor di pai tes mpia-bbed him kin dihyeisi dini njei mun di kei bak Abram! 20 Ma tungwatu nya inggei sut Allah Di Ninyeng Jei Bibor di sindem tut na dino ahwen ade siceu nya bicut bina tu.>> Lene Abram hit ndigban po pos pima hagom bikwas gom leu ningot gom lene gom leu ningot gom tut Melkisedek.
21 Lene nibou ndig Sodom pai bak Abram <<Tut ndigban po apos leu ade siceu nya pima lene jo bina hak ug. Noro nna ba akes ditde limwa nya po ipos yok pima hanyen kwei bida.>>
22 Lene Abram buhup <<Deheng bitug hon TUHAN di nok Allah Di Ninyeng Jei Bibor di pai tes mpia-bbed him kin dihyeisi dini ninyeng bipia, 23 miditak kep mun nyeng gom leu ade ndigban ba, dijem mong ninggrun gom kin mun di abikri kep ade srop pima bou da nok ditde bi sren. Leu binhyepo bit bon atri tut bipia nani rino abindei di dinyeng bibor kan bi. 24 Gima rino miditak kep mun nyeng gom mem danti bi. Noro midirok ndigban di biluei mun di ditde limwa nya ibikon pran bi. Tut ndigban dima ne ma asindui sut disut bat Aner kin Eskol kin Mamre di yahati tut da pima he igyai hak.>>