EBBALUWA OPAWULO EGIYAWANDIKIIRE
OTITO
Okwemanyikisya
1
1 Nze oPawulo omuweererya wa Kibbumba,
era omutume wa Yesu Kurisito,
ogubatumire mbiraabbe eeri abalondemu ba Kibbumba okwikirirya okutuuce,
era mbamanyikisye amazima agatuuca abantu omu kugondera oKibbumba.
2 Okwikirirya nʼamazima ago byeigikire ku kusuubira bwomi obutawaawo,
oKibbumba atayezya kubbeya,
obuyasuubizire okuzwa eira eino.
3 Ekiseera ekituuce owekyatuukire,
obwomi obwo nʼabulagira omu bibono,
era ebibono ebyo niibyo ebiyankwatisirye mbiraabbe eeri abantu,
ngʼoKibbumba oMulokoli waiswe oweyalagiire.
4 Nkuwandiikira iwe Tito omwana wange onanyerenyeere omu kwikirirya swenaswena okutuli nakwo.
OKibbumba oItewaiswe nʼoKurisito Yesu oMulokoli waiswe bakukwatire ekisa,
era batyo bakuwe eidembe.
Omulimo gwa Tito omu Kuleete
5 Nakulekere omu Kuleete nga ntaka otereerye ebyo ebyetaagisya okuteereerya,
era oteekewo abeekubbemberi bʼamakanisa mu buli kibuga,
ngʼowenakulagiire.
6 Oyo ogwolonda asaaniire okubba ngʼabulaku ekyokumunenya,
era ngʼali nʼomukali moiza.
Abaanabe bali nʼokubba baikirirya,
era nga tibababalira mwabo abeekolakolania olwʼeiralu,
ooba mwabo abajeemu.
7 Ekyo kityo olwakubba omulabiriri ngʼowaali muweererya wa Kibbumba ali nʼokubba ngʼabulaku ekyokumunenya,
nga tiyeekudumbalya,
nga tasunguwala mangu,
nga timunywamwenge,
nga timukambwe,
era nga talulunkanira ebyobusuni.
8 Wazira,
ali nʼokubba ngʼamaite okwaniriza abageni,
era ngʼataka abakola ebisa,
nga yeegendereza,
nga atuukiriire,
nga mweru,
era nga yeefuga omu bintu byʼamasanyu.
9 Ali nʼokubba muntu agumira oku bibono ebyʼamazima agʼenjegesya yaiswe ngʼowebabimwegeserye,
kaisi ayezye okusonzolera abantu enjegesya entuuce,
era nʼokulaga engeri abo abagyakanisya egibagotamu.
10 Waliwo bangi abajeemu,
abakola gwa kulaaduuka nga batumula ebya bubbeyi,
eino eino abo abakoba bati abaikirirya kibeetaagisya okusengererya eiteeka lyʼeKiyudaaya erya kukomola.
Batumula ebinambulamu nga bataka abantu babiikiririryemu.
11 Abo basaaniire kubasirica,
olwakubba bagotesya buli moiza abba omu kisito ekibaingiramu nga beegesya abantu ebitaiza olwa kutaka okusuna empiiya omu ngeri embiibbi.
12 Omoiza oku banyere abo,
era nga yeeyeta naabbi waabwe,
yakobere ati,
“Abʼoku kizinga kyʼe Kuleete bulijo omu kubbeya beekansa;
bisolo ebya kabbikabbi,
era baluvu,
era bagayaali.”
13 Neye era,
ekiyakobere kituuce.
Nʼolwekyo,
oli nʼokubanenyanga nʼamaani,
kaisi oolwo babbe nʼenjikirirya entuuce ezwa omu nseega ensa.
14 Nga tibateeka emyoyo gyabwe ku bifumo byʼeKiyudaaya ebyobubbeyi ooba ku mateeka abantu abo abagaana amazima egibagunjire-obugunji.
15 Eeri abalongoole omu myoyo,
buli kintu kibba kirongoole.
Neye eeri abo aboonoonoki omu myoyo nʼabataikirirya,
mwibo timubbaamu kikenene naire,
olwakubba tobona ngʼobuwongo bwabwe nʼebiseego byabwe bibba byayonoonekere ira.
16 Omu bʼengeri eyo mutira okubbaamu nʼabo abeetwala bati bamaite oKibbumba neye ngʼomu bibakola nʼengeri egibeebityamu balagira nakimo ngʼowebamwegaana.
Bakoli bʼebya muliko era bajeemu;
tibasaanira mulimo omusa waire gumo.