Erkko Erkampakko Yohannise Isxay
1
Erkuusikka ho eraki ano qhimakkossi,
hossi an dhukeema cʼikadhi Kaayoosenu.
2 Qhawho haayyu,
qhamo napise thaahu hxaysatti kula qaako haahu kaasay qhamu ho gharripa nakayo ho naqunukki an ghissadha.
3 Qhama ho dhukkenu dhkkaysathamapa isa dhukettay qaakassa koro tookko tookko iʼokayipa ye qallunna uuma an hxasodhi.
4 Dhukettay qaake dhelle haayyuna apaqhe malettay olho ye hxaseesa ye qaghikka.
5 Qhawho haayyu,
ihho hayhiththo kodhdhe kakki payni,
olho akkoro dhukkaysadhanu kotti kaasattay atho ho dhukaysathamti.
6 Usundhekka kodhmossi xeesa annu cʼiknottay kottiisi koro dhukkaysadha miinteema immasakare.
Hantukka onke Haallikko hxasesattay ashshanko huusundhina aʼusundhe kʼarkʼarra payni olho xeesa.
7 Usundhe Ikkristoosenu kodhadhenu lighana koro ye dhukkaysadhina kʼarkʼarsa ye akkadhe.
8 He kodhmossi dhukattena pakayye sheegha qhama kodhinaninnu koro hasa lighaasi kʼarkʼare iʼine gheeqasa.
Dhohmunte Tiyotrafiisepa Kaanaste Attimatʼiroosenu Teexi
9 An xayna qharaʼitha manne kristtaanannu taaptappe tooxina hossi waaniththo manne kristtaana kodhdhe woʼa ana payi Tiyotrafiise ye yela akkadhukka.
10 Hussa maallay an okay payni uso qalithe maghattay makaxko haani patisenu qhamu moʼo kodhisa anna qallina.
Hussa patta ye kodhdhunna,
koro dhukkaysadha i’uso kula okaye payni ye unsundhe akkadhi,
he usundhe akkadhanakka inna kohxhxa,
manne kristaananakka isi usundhe lihhasa.
11 Qhawho haayyu,
qhawho olho xeesa koodhasi dhishoy ho olho magha kodhaasi olo lighi.
Qhawho olho xeesa kodha kaasay ho Haallikkito.
Qhawho olho magha kodha kapay Haallikkoosi ye ari.
12 Timatʼiroose kapay kodhmo xeesa ikkodhinu qhawho kaasakki nu masakara,
dhuke ise nu masakara,
inekka annu masakaraani,
miskkirinko haani qhamu dhuke kodhdhisa atho aʼaray.
Ille Nakaysadhe
13 Ahxay olho kisha anho tooxni qagha,
ikkodhitama kapay warkʼatheema tooxe anu woʼi.
14 Xeere itʼtʼana ho hiʼenukki an kippo sheeghi maallay an okaynapa thorruyadhaani.
15 Nakayho ihho kodhdha.
Koro haani nakayho ihhola payi,
he haaha qagha kaasanukka pukkaqatte pukkaqatte nakayho naye payi.