Ba bo mam la dibega te ka wɔna la sɛla te ba tara makera la
11
1 Ba bo mam la dibega te ka wɔna la sɛla te ba tara makera la ge yele mam yeti,
Ihege la ho dekɛ dibega la,
la ho makɛ Yenɛ Yire la kaanbegɔ la zen'en la.
Ge la ho kaanlɛ sɛba n sohore Yire la poan la.
2 Da lagom magɛ yeŋa zenzaka la.
Se'ere n sɔe la,
ba dekɛ ba bo la sɛba n dagɛ Yudoma la,
te ba sagom toolom teŋa la ŋmarehe pihinaahe la bayi'.
3 Bala n wan tom n seradoma bayi' te ba yɛ sunsagaŋɔ futo wa'ana mɔɔlɛ Yenɛ yelehom dabeha tuhure la kɔbehe seyi' la pihiyoobe poan.
4 Nɛreba bayi' la ane wo kaam tiihe seyi' la butoleladoma bayi' la n ze' Na'ayenɛ se'em n sɔe nɛra woo teŋa wa zuo la nɛŋan.
5 Te se'em n zegere te a tom ba sɛla n ka ane soŋa bugum ne yehe ba nɔya poan na sagom ba.
Etekona poan te se'em n zegere te a tom ba sɛla n ka ane soŋa,
ba ne ko' en mɛ.
6 Ba tare paŋa n wan bahɛ te saa kan ni' dabahese'a te ba mɔɔla Yenɛ yelehom la.
Ba me tare paŋa n wan ta'an bahɛ te bɔgɔhe ko'om la n bo bini la lebege ziim.
Ba ta'an bahɛ te teŋa wa zuo nyɛ' namehe seko woo daanse'ere daarɛ te ba bɔta.
7 Te ba han ta mɔɔlɛ Yenɛ yelehom la ba'ahɛ,
bonsɛla se'em n boe boko kantɛ la poan la wan yehena zabɛ la ba.
A wan nyaŋɛ ba ge ko' ba.
8 A han ko' ba bala,
ba iinhe la wan gan'an sore zuo teŋkantɛ sɛka te ba ko ba daana bini la.
Teŋa la danlehom yu'urɛ dela Sodom la Egipt.
9 Teŋa woo nɛreba,
la buuri woo,
la yetɔgom sebo woo,
la nɛreba yema yema wan beha ba iinhe la dabeha atan' la girigo.
Ba me kan sakɛ te ba laɛ ba.
10 Nɛreba teŋa wa zuo poorɛ wan pee la nɛrebana wa ba kum la poan.
Ba wan de'en de'enɔ ge bo taaba bo'olom.
Se'ere n sɔe la,
nɔtɔgɔheba bayi' la daa bahɛ te nɛreba teŋa wa zuo n nyɛ' namehegɔ.
11 Dabeha atan' la girigo n daa tole la,
Yenɛ daa vo'ohe eŋɛ ba te ba vo'e ba kum la poan.
Dabeem daa kɛn' sɛba woo n daa nyɛ' bala.
12 Te nɔtɔgɔheba bayi' la daa wom te konkore voole saazuo ha yeti,
Zom ya kalam na.
Te ba daa zom saazuo ha te ba diŋdoma la behera ba.
13 Bilam bilam te teŋa la miim paŋa paŋa,
te teŋa la poan,
lɔgɔrɛ deyena lɔga pia la poan daa sagom.
Nɛreba tuha ayopɔe n daa ki' teŋa la miiŋɔ la poan.
Dabeem daa kɛn' nɛresɛba n daa gee la,
te ba daa pɛngera Yenɛ se'em n boe saazuo ha la paŋa n zone se'em.
14 Namehe seko n pa'ahɛ boyi' la tole ya.
Ge behɛ,
la kan yue la namehe seko n pa'ahɛ botan' la n wa'ana.
Te Yenɛ soŋora se'em n pa'ahɛ boyopɔe la daa peebe a tentanɛ la
15 Te Yenɛ soŋora se'em n pa'ahɛ boyopɔe la daa peebe a tentanɛ la.
N eŋɛ bala la,
konkɔya n tɔgɔre saazuo ha yeti,
Behega paŋa nananawa nya dela to Na'ayenɛ la Se'em Te A Loe la nu'uhen.
A wan sɔna behera wuuha.
16 Te kpɛ'ɛndoma pihiyi' la banaahe la n zin' na'am gɔŋɔ la poan Yenɛ nɛŋan lu teŋa na'aha Yenɛ.
17 Ba yeti,
Na'ayenɛ to Yenɛ,
Gaŋɛ Zan'an Yenɛ,
ho dela se'em n boe ge pon bɔna.
To bo ho fara la hon dekɛ ho paŋa pin'ilom sɔna behera wa.
18 Teŋa wa zuo nɛreba sunsunya n daa nyie la,
ho sunsunyiim dabaherɛ la paɛ la.
Ge te dabaherɛ la me paɛ te ho gankɛ ke'endoma la.
Dabaherɛ la paɛ ya te ho yɔ ho yamehe,
sɛba n de ho nɔtɔgɔheba la.
Ho me yɔ ho nɛresɛba woo n na'ahere ho,
bonkora la bonbibihe zan'an.
Dabaherɛ la paɛ ya te ho sagom sɛba n daa sagom teŋa wa zuo la.
19 Te Yenɛ Yire la n boe saazuo la daa yu'ɛ mɛ te nɔbiŋere daka la nyɛta na,
ge saa daa tanhera,
ge nyagera,
ge suna,
te teŋa miim na,
te saakuga kekeko lu' na.