Tan' Yon
N po'ohere te sɛla woo wan de'a ma'an bo ho
1
1 Mam Yon se'em n de keema la n golehere gɔŋɔ wa bɔ'ɔra la n zɔ'soŋɔ Gaius se'em te n nɔŋɛ la yelemɛŋɛrɛ poan.
2 N zɔ'soŋɔ Gaius,
n po'ohere te sɛla woo wan de'a ma'an bo ho.
Ge te ho me wan de'a ho mea wo mam baŋɛ te ho dole la Yesu soŋa soŋa la.
3 Te n poore daa pee mɛ.
Se'ere n sɔe la,
to sɔɔnrɔ la basɛba daa paɛ na yele hon birikina la se'em wo hon pon bɔna daarɛ woo la birikina la se'em la.
4 Sɛla ka boe bahɛ te mam poorɛ ba'a pee wo mam wom te n kɔma la bo mɛ la yelemɛŋɛrɛ la.
5 N zɔ'soŋɔ,
ho dela birikina la hon tone se'em bɔ'ɔra to sɔɔnrɔ la,
la ban pon daa de'a saama ho zen'en wa.
6 Ba yele ho nɔŋerɛ la yele bo lagaŋɔ la n boe kalam la.
Kpeŋe ho mɛŋa ge soŋɛ ba soŋse'ere taaba n wan eŋɛ Yenɛ suunre nyɛlom te ba doohe ba sɔrɔɔ mea.
7 Se'ere n sɔe la,
ba yehe ba sɔrɔɔ mea te ba tom la Yesu Krista yu'urɛ la zuo.
Ba me ka to'e soŋse'ere sɛba n dagɛ Yesu dɔlɔba la zen'en.
8 Bala tomam sɛba te Yesu pa'ala la n de to soŋɛ ba,
te tomam me wan tara se'ere te to tom po'e yelemɛŋɛrɛ la.
9 N daa golehɛ gɔŋpeka bo lagaŋɔ la na,
ge Diotrepes se'em n nɔŋɛ te a de'a ba zuodaana la ka bote a yu'ɛ toberɛ kelehe mam yele se'em la.
10 Bala n han ta wa'ana n wan tara sɛla te a eŋɛ la na.
La tɔgɔyooro la te a tɔgɔra to yele la,
la ponpɔrɔŋseto te a yɛta la.
Ge lana wa ma'an ka seke en.
To sɔɔnrɔ la han wa'ana,
a kan to'e ba soŋa soŋa,
ge a gu' sɛba n bote ba to'e ba ge teregɛ te ba sa'ɛ ba lagaŋɔ la poan.
11 Dene poan,
n zɔ'sonɔ wa,
da eŋɛ ya sɛla n ka ane soŋa,
ge eŋɛ ya sɛla n ane soŋa.
Ge se'em n tone sɛla n ka tone soŋa nan ka mi' Na'ayenɛ n ane se'em.
Te se'em me n tone sɛla n ane soŋa dela Na'ayenɛ nɛra.
12 Ge han dɛna Demetrius,
nɛra woo tɔgɔre la yelesoma yɛhera a yele.
Yelemɛŋɛrɛdoma la me tɔgɔre dena wa mɛ.
Tomam me tɔgɔre dena wa me,
ge ho mi' te tomam yele sɛla la dela sera.