Mɔɔla yelehom la saŋa woo
4
1 Bala Timoti,
n ze' la Yenɛ la Krista Yesu nɛŋan wa,
se'em n wan wa'ana gankɛ sɛba n vɔe la sɛba n pon ki la,
enŋa n yeti a wa'ana dɛna naba sɔna la a kan'ana hɔ la ninmɔ'ɔrɛ yeti,
2 Mɔɔla yelehom la saŋa woo.
Tara sugure la hon pa'ale la,
tɔgɔra kan'ana,
ge tɔgɔra tɛɛra,
ge kpɛmeha nɛreba la.
3 Se'ere n sɔe te mam yɛta hɔ te ho eta yele ana wa dela dabaherɛ kena te nɛreba kan ta bɔta te ba kɛleha pa'aleseko n ane soŋa.
Ban wan ton eŋɛ se'em dela dena wa,
ba mɛhe wan tare nɛreba zo'e zo'e na te ba pa'ala ba.
Nɛrebana wa me yeti ba pa'alɛ ba la sɛla te nɛreba la mɛhe bɔta te ba kelehe.
4 Bala,
ba ka bote ba kɛleha sɛla n de yelemɛŋɛrɛ,
ge ba ton bɔta la ba kɛleha la sɔlema.
5 Dene zuo,
n kan'ane ho mɛ yɛ'ɛha te ho tara ho mea soŋa soŋa.
Ho han nyɛ' namehegɔ,
ŋmibe.
Mɔɔlɛ Yelesoma ge eta sɛla woo n sone te ho eŋɛ wo hon de se'em n tone bɔ'ɔra Yenɛ.
6 Ge han dɛna mam,
la an me wo ba dekɛ mam mɛ ko' la.
Dena wa vɔnrɛ dela dabaherɛ la paɛ ya te n keŋɛ Yenɛ zen'en.
7 Ge han dɛna mam,
mam ton n tooma soŋa.
Mam zɔ n zoa la.
Mam gorɛ mam nam Yesu se'em.
8 De daarɛ la,
Na'ayenɛ se'em n gankere yelemɛŋɛrɛ gankerɛ la han ta gankera nɛreba,
wan bo mam tontɔɔ vom muŋa la,
ge dagɛ mam ma'an,
ge nɛresɛba zan'an n gure en la nɔŋerɛ la.
9 Kpeŋe ho mɛŋa la ho da yuue ge wa'an n zen'en na.
10 Se'ere n sɔe la,
Demas bahɛ mam ge keŋɛ la Tesalonika teŋa poan.
A bote a nyɛ' la teŋa wa zuo lɔgɔrɔ nananawa gana Yesu n wan ta lebena ge bo en sɛla la.
Kreskens me keŋɛ la Galatia teŋa poan ge te Titus keŋɛ Dalmatia teŋa poan.
11 Luke n de se'em ma'an n yee n zen'en de'a sɛba woo n daa soŋore mam la.
Bala,
ho han yɛ'ɛha na,
ho tare Mark wa'ana te a dela se'em n wan ta'an soŋɛ mam.
12 Se'ere n sɔe la,
n tom Tikikus la Epesus teŋa poan.
13 Ho me han yɛ'ɛha na,
ho tare fuo la te n daa bahɛ Karpus zen'en Troas teŋa poan la na.
Ho me lagom tare n gɔnɔ la na,
la gɔŋseto n kilom la,
la seto n de koyena koyena la.
14 Ge Alekzander se'em n tare kuto maala lɔgɔrɔ la eŋɛ mam la be'em.
Bala,
Na'ayenɛ wan namehɛ en la sɛla te a eŋɛ la.
15 Mina ho mɛŋa la en.
Se'ere n sɔe la,
a daa mɔ'ɛ la nini gu'ura yelehom la te to daa mɔɔla la.
16 Mam n daa pɔhɛ keŋɛ zen'an te ba dita yetɔgom te n tɔgɛ n yetɔgom la,
nɛnɛra daa ka wa'an na te a soŋɛ mam,
ge ba zan'an daa bahɛ mam la n ma'an.
N me tɛn'ɛhe te Yenɛ wan di' suguru bo ba la ban daa bahɛ mam n ma'an la.
17 Ge bala zan'an,
Na'ayenɛ daa bo la mam ge daa bo mam paŋa te n daa mɔɔlɛ yelesoma la bini.
Nɛresɛba woo n daa yehe teŋhe kekeko poan na ge daa bɔna bini la daa wom dɛ.
Ge te Na'ayenɛ daa le fan' mam bahɛ yelese'a n de ninmɔ'ɔrɛ wo nɛra te gbegenɛ yeti a obe te ba fan' en bahɛ se'em la.
18 Dene poan,
mam mi' soŋa soŋa te Na'ayenɛ wan kelom faanra mam baha te n da ta'an tona sɛla n de be'em.
A me wan tara mam soŋa soŋa keŋɛ saazuo ha zen'an te a sɔna behera la.
Bala,
bahɛ ya te to pɛngɛ en wuuha.
Taarɛ.
19 Po'ohɛ Prisila,
la Akuila,
la Onesiporus yiredoma bo mam.
20 Erastus yee la Korint teŋa poan.
N me daa bahɛ te Tropimus yee la Miletus teŋa poan.
Se'ere n sɔe la,
a daa bɛn'ɛnrɛ mɛ.
21 Kpeŋe ho mea la ho wa'an n zen'en na ge te sabebego dabeha la baŋɛ paɛ.
Eubulus,
la Pudens,
la Linus,
la Klaudia,
la sɛba zo'e zo'e n dole Yesu sore la po'ohere ho na.
22 Timoti,
Na'ayenɛ wan soŋɛ hɔ ho bɔŋa poan.
Yenɛ zo'ohogɔ bɔna la ya.