Yenɛ n bote ya eŋɛ se'em n wana
4
1 Dene poan to sɔɔnrɔ,
ya zamehe bɔŋa sɛka n tegere Yenɛ nini la tomam zen'en,
bɔŋa kaŋa taaba n bala te ya bɔna wa.
Te nananawa,
Na'ayenɛ Yesu yu'urɛ poan,
to sohore ya mɛ ge yɛta ya la ninmɔ'ɔrɛ te ya malom tom sɛla n gane bala.
2 Ge ya mɛŋa mi' Na'ayenɛ Yesu paŋa poan to daa yele ya te eta sɛla la.
3 Yenɛ n bote ya eŋɛ se'em n wana,
te ya bɔna bo enŋa ma'an ge me da tona yalomtooma la fiin me.
4 Yamam boraahe dela ya mina te ya han yeti ya di' pɔgɔba,
ya eŋɛ dɛ mɛ la na'ahegɔ ge te yalomtooma da bɔna bini.
5 Da ete ya pɔgɔdire la ge te ya potɛn'ɛra zan'an kɔ'ɔn tɛn'ɛha la yalomtooma ma'an.
Te nɛresɛba n zagahɛ Yenɛ la n ete bala.
Dene poan,
da ete ya wo bama n ete se'em la.
6 Dene zuo,
la ka dela boraa se'em tom a boraa tadaana sɛla n ka ane soŋa bii a fan' en.
To pon te'ele yele ya la ninmɔ'ɔrɛ te Na'ayenɛ wan namehɛ sɛbadoma n tone wana wa.
7 Ge Yenɛ ka yele to te to tona la yalomtooma,
ge a yele to te to bɔna bo la enŋa ma'an.
8 Bala,
se'em woo n zagahɛ pa'ale kona wa ka zagahɛ la asaala.
Ge,
a daana zagahɛ la Yenɛ se'em n bo'ore ya a Sea la.
9 Ge nananawa,
la ka dene te to golehɛ gɔŋɔ bo ya yɛhera yan wan tara nɔŋerɛ bo ya sɔɔnrɔ se'em.
Se'ere n sɔe la,
Yenɛ mɛŋa pon pa'alɛ ya te ya tara nɔŋerɛ bɔ'ɔra taaba se'em.
10 Te etekoŋɔ mɛŋa n bala,
te ya eŋɛ bo to sɔɔnrɔ la woo n boe Makedonia teŋa poan la.
Dene poan to sɔɔnrɔ,
to sohore ya mɛ te ya malom eŋɛ sɛla n gane bala.
11 Kpeŋe ya mɛŋa la ya tara ya mɛhe soŋa soŋa ya bɔŋa poan ge de ya sɛba n wan beha la ya mɛŋa yɛla ge wan tona diiha ya mɛhe,
wo ton daa pon yele ya se'em la.
12 La wan dɛna la etekona poan te nɛresɛba n ka sakɛ bo Yesu la wan ta'an bo ya na'ahegɔ.
Bala me wan bahɛ ya te ya kan kɔ'ɔn gura la nɛra se'em bo ya sɛla n dela ya tara.
13 To sɔɔnrɔ,
to bote ya baŋɛ yelemɛŋɛrɛ la mɛ yɛhera nɛresɛba n ki' la.
Bala n wan bahɛ ya te ya kan tara sunsagaŋɔ wo nɛresɛba n ka tare ba potɛn'ɛra poan gura sɛla la.
14 To sakɛ ya te Yesu daa ki' mɛ ge le vo'e a kum la poan.
Bala to sakɛ ya te Yenɛ wan bahɛ te nɛresɛba n daa sakɛ bo Yesu ge ki' la wan vo'e bɔna la Yesu.
15 Ge Na'ayenɛ mɛŋa yelehom te yele ya wa,
te sɛba n wan vɔna ta paɛ daanse'ere daarɛ te Na'ayenɛ lɛbera na la kan ta tole sɛba n diŋɛ ki' la yia.
16 De daarɛ mea la,
Na'ayenɛ wan bo a nɔɔrɛ,
ge te Yenɛ soŋora se'em n de zuodaana la me wan mɔɔla na,
ge te ba me pɛɛbera Yenɛ tentanɛ.
Yele ana wa woo han ta eta,
Na'ayenɛ mɛŋa me nya wan ze'ele saazuo sige na.
Ge sɛba n daa sakɛ bo Krista ge ki' la n wan ta vo'e ba kum poan yia.
17 Ba han vo'e ba kum la poan bala,
Yenɛ wan bahɛ tomam sɛba n vo'e ta paɛ bala ma'an la me nya wan lagom la ba zom saŋgbana zuo ha ta to'ohɛ Na'ayenɛ,
to nya wan bɔna la Na'ayenɛ la wuuha.
18 Dene poan,
dekɛ ya yetɔgɔbɔna wa la ya tɔgɛ soŋɛ taaba.