Tɔrɔgɔ han paɛ mam, n ne nyɛ' la paŋa
12
1 Ge n wan kelom ŋmɛ'ɛra n nyɔn'ɔn bii la pon ka tara vɔnrɛ wa.
Ge nananawa,
n yeti n tɔgɛ mɛ yɛhera liligere la zaanheŋɔ seto te to Daana Na'ayenɛ bahɛ mam te n nyɛ' la.
2 Mam mi boraa kayema n daa boe yuun pia la naahe n wana n tole,
dɔla Yesu sore te sɛla daa wa kɔ'ɔn zɛ' en zom saazuo saazuo ha.
Mam ka mi dena wa daa seren eŋɛ la bala,
bii Na'ayenɛ n daa bahɛ en te a nyɛ' sɛla n bala.
Na'ayenɛ ma'an n mi yele dena wa.
3 N le yɛta dena me yɛ'ɛha te ba daa zɛ' boraa wa keŋɛ la saazuo ha.
Ge mam pon yele ne se'em la,
mam ka mi la daa seren eŋɛ la bala,
bii Na'ayenɛ n daa bahɛ en te a nyɛ' sɛla n bala.
Na'ayenɛ ma'an n mi yele dena wa.
4 Boraa la n daa ta bɔna saazuo ha la,
a daa wom yelese'a te nɛra kan ta'an tɔgɛ a ane se'em.
Yele ana wa,
asaala kan ta'an tɔgɛ a yɛla.
5 Bala mam wan ŋmɛ' n nyɔn'ɔn yɛhera la boraa kana ge dagɛ n mɛŋa.
Mam wan ŋmɛ' n nyɔn'ɔn la sɛla dela yelese'a te n pɔ'ɛ tɔrɔgɔ la a la.
6 Ge n han bote ne te n ŋmɛ' n nyɔn'ɔn,
n kan dɛna gɔɔŋɔ.
Se'ere n sɔe la,
n wan tɔgɔre ne la sɛla n de yelemɛŋɛrɛ.
Ge n kan ŋmɛ' n nyɔn'ɔn.
Se'ere n sɔe la,
n ka bote se'em behera mam te n gana n nyɛ' mam te n eta sɛla la,
la n wom te n yɛta sɛla.
7 La Yenɛ n pon bo mam liligere la zaanheŋɔ kanra se'a la zan'an n kan ta'an zɛnkera n mɛŋa.
Yenɛ te gɔn'an n bɔna mam poan vegeha mam.
A bahɛ te bonbe'a n daana mam te n da tana zɛnkera n mɛŋa.
8 Sugumnɔɔren botan' te n sohɛ Na'ayenɛ dena wa zuo ge yele en te a bahɛ te dena wa yehe n iŋa poan.
9 Mam n daa yele n wana wa,
a daa lebehe mam te,
Mam zo'ohogɔ la zo'e bo ho.
Te la dela nɛreba n ne pɔ'ɛ tɔrɔgɔ te ba nyɛ' n paŋa ba zen'en.
Dene poan,
n tare popeelom te n ŋmɛ'ɛra n nyɔn'ɔn la mam kan ta'an tara tɔrɔgɔ la.
Bala te Krista paŋa la wan soŋɛ mam.
10 Ge mam tare popeelom la n han kan ta'an tara tɔrɔgɔ.
N me le kelom tara popeelom la toore,
la namehegɔ,
la zɛrɛgerɛ,
la yelese'a n de daaŋɔ Krista zuo.
Se'ere n sɔe la,
tɔrɔgɔ han paɛ mam,
n ne nyɛ' la paŋa.
11 N ete wo n dela gɔɔŋɔ la.
La me dela yamam n sɔe te n eta bala.
La dene la yamam n wan yeti ne te ya bote mam.
Ge mam han pon ka tara vɔnrɛ,
mam ka tɛn'ɛhɛ te ya nɛresɛba n me dekɛ ba mɛhe te bama dela Yesu tontoneba la gane mam.
12 Ge yelese'a woo te mam daa din'inhe suunre tona la ya la n pa'alɛ te n de Yesu tontoneba la ayema.
N daa eŋɛ yelenyalema,
la yelekerehe.
13 Mam daa ka eŋɛ ya sɛla n ka nare gana mam daa eŋɛ lagaŋseto n dole Yesu sore la.
N daa pon ka daan ya te ya soŋɛ mam,
bala n han tue ya mɛ la dena wa,
di ya suguru.
14 La nya dela sugumnɔɔren botan' n bala te n maahom na te n wa'ana behɛ ya.
N me han wa'ana,
n kan yele ya te ya eŋɛ sɛla bo mam.
La dela yamam mɛhe te mam ɛɛra ge dagɛ ya ligiri.
La dagɛ la kɔmbibihe n behere ba sɔdoma la ba madoma.
Ge la dela ba sɔdoma la la madoma la n behere ba.
15 Ge mam wan tara popeelom n han dekɛ sɛla woo te n tara la n mɛŋa bo la n ta'an soŋɛ ya.
Dene poan,
mam han nɔŋɛ ya zo'e wana,
yamam nɔŋɛ mam fiin.
16 Bala ya wan sakɛ te la dela yelemɛŋɛrɛ te mam daa ka wa'ana yɛta ya te ya bo mam sɛla.
Ge bala zan'an,
se'em boe mɛ wan yele te n daa pan'ahɛ ya.
17 Bala,
n daa fan' ya mɛ yɛhera nɛreba la te n daa tom na la ayema poan?
18 N daa belom Titus mɛ te wa'ana ge me daa bahɛ te to sɔɔn se'em n me dole Yesu sore la doohe en na.
Bala,
ya wan yete Titus n daa wa'ana la,
a daa fan' ya mɛ.
Ya ka mi mam la enŋa lagom tara la tɛn'ɛheyeŋɔ ge me lagom eta sɛla n de boyena?
19 Ge daanse'ere ya wan tɛn'ɛha te bala ma'an ha tole la yehe zina,
tomam kɔ'ɔn bɔta te to tɔgɛ mɛ pɔ'ɛ to mɛhe ya nɛŋan.
Aai.
To zɔ'sonɔ wa,
Na'ayenɛ nɛŋa to tɔgɛ la sɛla te Krista bɔta te to tɔgɛ ge me tona sɛla woo,
te to soŋɛ yamam.
20 Ge dabeem tare mam te n han wan wa'ana,
n wan nyɛ' ya te ya ka bɔna wo mam n bote ya bɔna se'em la.
Ya me wan nyɛ' mam te n ka bɔna wo yamam n bote mam bɔna se'em la.
Se'ere n sɔe la,
te n wan nyɛ' te ya gangara ge nyuuna,
ge ihegera sunsunya tɔtɔ tɔtɔ ge me kɔ'ɔn bɔta la sɛla n de ya mɛhe ma'an yɛla.
N me wan nyɛ' te ya toora taaba ge zuunra taaba nya'anzum,
ge zɛnkera ya mɛhe saazuo ge te nɛra woo eta enŋa mɛŋa n bote se'em.
21 N le kelom zɔta dabeem te n han ta wa'ana,
to Daana Na'ayenɛ wan bahɛ mam te vi' nyɔkɛ mam te n kele bo sɛba kekeko n pon tom be'em ge ka tee ba potɛn'ya ba yalomtooma la poan.