Te Krista daa ki ge vo'e a kum la poan te a ta'an dɛna sɛba n vɔe la sɛba n ki la Yenɛ
14
1 De ya sɛba n wan to'e nɛra se'em n nan ka sɛ' ze'ele la n nam Yesu se'em ya lagaŋɔ poan la.
Ge da ŋmɛ'ɛre ya nɔkpe'ene la ba yɛhera la n wan bɔna bɔŋsɛka taaba.
2 Behɛ ya,
te nɛra n sɛ' ze'ele n nam Yesu se'em n bahere en te a ka kihi dia dia.
Ge nɛra se'em n nan ka ba' sɛ' ze'ele n nam Yesu se'em,
dite la zɛnvɔɔnrɔ ma'an.
3 Nɛra se'em n ka kihi dia dia la,
da behɛ se'emdaana n ka dite bala la yoo.
Bii nɛra se'em n dite zɛnvɔɔnrɔ ma'an la tɔgɔra tɔgɔyooro bɔ'ɔra se'emdaana n dite sɛla te a ka kiha la.
Se'ere n sɔe la,
Yenɛ ka zagahɛ en la n dite sɛla te a ka kiha la zuo.
4 Ge ane n de hom wan tɔgɔra tɔgɔyooro bɔ'ɔra yameŋa sɛka n tare daana?
La dela a daana la n wan baŋɛ nya a tone la soŋa bii a ka tone la soŋa.
Te yameŋa la me wan ba'ahom tona la soŋa.
Se'ere n sɔe la,
to Daana wan soŋɛ en te a tona soŋa.
5 Nɛra ayema tɛn'ɛhe te dabaherɛ deyena n ne de'a ninmɔ'ɔrɛ dabaherɛ gana dabeha zan'an.
Ge te nɛra ayema me tɛn'ɛhɛ te dabeha woo dela boyena.
Bala,
la dela nɛra woo bɔkera sɛla te a tɛn'ɛha.
6 Se'emdaana n dekerɛ daarɛ deyema te denɛ de'a ninmɔ'ɔrɛ dabaherɛ ete wana wa tara la pɛnka bɔ'ɔra to Daana Na'ayenɛ.
Se'emdaana me n dite sɛla woo te a ka kiha la me tare la pɛnka bɔ'ɔra to Daana Na'ayenɛ.
Se'ere n sɔe la,
a daana pɛngɛ to Daana Na'ayenɛ mɛ la dia la te a di' la.
Se'em me n zagahɛ te enŋa kan di' dise'a la,
me tare la pɛnka bɔ'ɔra to Daana Na'ayenɛ.
7 Da kɔ'ɔn tɛn'ɛherɛ ya te ya vɔe la ya ma'an ge me wan ta ki ya ma'an.
8 Te to han vɔna,
to vɔe bo la to Daana Na'ayenɛ.
Te to me han le ki,
to ki bo la enŋa mea.
Bala,
to vɔe mɛ woo,
to ki mɛ woo,
to kelom de'a la to Daana Na'ayenɛ nɛreba.
9 Te Krista daa ki ge vo'e a kum la poan te a ta'an dɛna sɛba n vɔe la sɛba n ki la Na'ayenɛ.
10 Dene poan,
wane te ya gankera yamam la sɛba n lagom dɔla Yesu sore?
La bene n sɔe te ya beha yamam la sɛba n lagom Yesu sore yoo?
To zanwaabe wan ze'ele Yenɛ nɛŋan te a gankɛ tɔ.
11 La golehɛ yeti,
Mam Na'ayenɛ pɔ mɛ te,
nɛra woo wan pɔnrɛ na'ma na'ahɛ mam.
12 Bala,
to zanwaabe wan ze'ele Yenɛ nɛŋan yele n sɛla la sɛla te to mɛhe eŋɛ.
13 Dene poan,
bahɛ ya te to da gankera taaba.
Ge sɛla te to ton wan eŋɛ dela to da eŋɛ sɛla n wan bahɛ te to taaba ton be'em.
14 Ge mam n de se'em n dole Yesu sore wa,
mi' soŋa soŋa te sɛla ka boe dɛna kihire bo de mea te ba di dɛ.
Ge nɛra han sakɛ a suunre poan te disɛka dɛna kihire,
la yi dela kihire bo en te a di dɛ.
15 Ya han sagom ya sɔɔnrɔ yɛhera la sɛla te ya di zuo,
la pa'alɛ te ya ka nɔŋɛ ba le yɛ'ɛha.
Da bahɛ ya te disɛka te ya dita la sagom nɛresɛba te Yesu Krista ki bo ba la.
16 Da bahɛ te sɛla te ho dekɛ la te de ane soŋa nyɛ' yu'urɛ sagaŋɔ.
17 Te Yenɛ sɔ'ɔlom la dagɛ la sɛla n de diihom la nyuya yɛla.
Ge Yenɛ Sea bahɛ te to tona sɛla n de tontɔɔ Yenɛ nɛŋan,
la sunma'ahom,
la popeelom.
18 Te hon se'emdaana n dole Yesu Krista la,
dole kana taaba wan bahɛ te Yenɛ suunre eŋɛ nyɛlom.
Ge te nɛreba me wan tara popeelom la sɛla te ho tona la.
19 Dene poan,
bahɛ ya te to kɔ'ɔn tegera tona daarɛ woo sɛla n wan tare sunma'ahom wa'ana,
ge bahɛ te tomam la sɛba n lagom dɔla Yesu sore la te ba malom sɛ' ze'ele Yesu sore la poan.
20 Da dekɛ ya dia te'e nɛŋa sagom sɛla te Yenɛ eŋɛ.
Ge dia woo dela ba dita,
ge la dagɛ ma'an te ho di disɛka wan bahɛ te nɛra se'em tom be'em la.
21 Ge ma'an zen'an te ya wan eŋɛ dela ya ye da le ɔbera nɛnɔ bii nyuura daam bii eta sɛla n wan bahɛ te sɛba n lagom dɔla Yesu sore la tom be'em la.
22 Tara hom tɛn'ɛhere yele ana wa se'em,
hom la Yenɛ ma'an.
Te popeelom boe la nɛra se'emdaana n ka dekɛ sɛla te a eŋɛ te la dela be'em.
A han eŋɛ dɛ ge tɛn'ɛha te la de ma'an.
23 Ge a han tɛn'ɛha la boyi' boyi' la sɛla te a di',
Yenɛ wan gankɛ en a han di' la.
Se'ere n sɔe la,
a daana ka tone a tooma yɛhera n nam Yesu se'em.
Te sɛla te ho eta te la ka yɛhera la ho nam Yesu se'em dela be'em.