To kɔ'ɔn tona be'em, te Yenɛ zo'ohogɔ malom pa'aha?
6
1 Bala,
to wan ta'an yeti bo,
to kɔ'ɔn tona be'em,
te Yenɛ zo'ohogɔ malom pa'aha?
2 Aai,
dagɛ bala.
La han dɛna be'em to ki mɛ,
wane te to wan lebe ta tona be'em?
3 To mɛhe mi' soŋa soŋa te tomam daa to'e ko'om soa la,
tomam la Yesu Krista dela boyena.
Ton daa to'e ko'om soa la,
to daa lagom ki' mɛ la Yesu.
4 To ko'om soa la poan,
to lagom ki' mɛ la Yesu.
Ge te ba lagom laɛ tɔ la en.
Bala,
wo to Sɔ' Yenɛ n daa dekɛ a paŋa la bahɛ te Yesu Krista vo'e a kum la poan bala mea te tomam mɛ wan bɔna bɔŋpaalega poan.
5 Tomam la Yesu dela boyena yɛhera la a kum la poan.
Bala mea,
te Yenɛ wan bahɛ te to me ta vo'e to kum poan,
wo n daa bahɛ te Yesu daa vo'e a kum poan se'em la.
6 Bala,
to mi' dena wa soŋa soŋa mɛ,
te Yesu n daa ki punpuuredɔɔ zuo la,
to daa ko bɔŋkɛka la mɛ punpuuredɔɔ la zuo.
Te Yenɛ ta'an sagom be'em bɔŋa kɛka la paŋa la.
A eŋɛ wana te to da le dɛna be'em yamehe.
7 Ge nɛra han ki,
a vo'ohe mɛ.
Se'ere n sɔe la,
yelebe'ero tooma ka le ta'an bɔna a suunren.
8 Bala,
wo tomam ki la Yesu Krista la,
to mi te to wan vɔna la en.
9 To mi' te Yenɛ diŋɛ bahɛ te Yesu Krista vo'e a kum la poan,
a ka le malom ki,
kum ka le malom nyaŋɛ en.
10 N daa diŋɛ ki bala la,
be'em ka le tana en.
Ge nananawa,
a nya boe la Yenɛ zen'en.
11 Bala mea,
mini ya te han dɛna be'em to ki mɛ ge ya boe mɛ la Yenɛ Yesu Krista zuo.
12 Bala la,
da bahɛ te be'em sɔna ya iŋgana wa behera te ya eta sɛla te ya bɔŋkɛka la bɔta.
13 Ya me da le bahɛ ya te ya iinhe zen'sɛka tona toonfɛn'ɛha.
Ge ton dekɛ ya ya mɛhe lɛm Yenɛ wo nɛresɛba te ba tara ba kum poan lebe vom poan na.
Dekɛ ya mɛhe kɔ'ɔn bo Yenɛ te ya etegɔ dɛna tontɔɔtooma ma'an.
14 Da bahɛ ya te be'em sɔna ya behera.
Se'ere n sɔe la,
la dagɛ la pa'alegɔ la n sɔe te ya eta ge la dela Yenɛ zo'ohogɔ la zuo,
te ya eta.
15 Dene poan la ka nare te to tona be'em.
Se'ere n sɔe la,
la dagɛ la pa'alegɔ la te to dɔla.
La dela Yenɛ n eŋɛ som la bo to la zuo.
16 Ya mɛhe mi' soŋa soŋa te hon se'em n dekɛ ho mea lebege yameŋa bo nɛra se'em,
enŋa daana n de ho zuodaana te ho nana a nɔɔrɛ la.
Bala ho zuodaana han dɛna la be'em la tare kum kena na.
Ge ho han nana la Yenɛ nɔɔrɛ,
a wan yi' ho yelemɛŋɛrɛ nɛra.
17 Ge nananawa,
pɛngɛ ya Yenɛ.
Se'ere n sɔe la,
te yia ya daa nan dela yamehe bo be'em.
Gee nananawa,
ya kɔ'ɔn mɔ'ɛ la nini nana yelemɛŋɛrɛ la te ya zamehɛ la.
18 Yenɛ fan' ya be'em nu'uhen bahɛ,
ge te ya nya dɛna la a yamehe eta sɛla n de yelemɛŋɛrɛ.
19 N tare la ya mɛhe en ete sɛla la magaha bɔ'ɔra ya,
la yan ka bɔkere la zuo.
Ge ya daa nan dekere ya mɛhe bɔ'ɔra la yalomtooma la toonfɛn'ɛha.
Bala mea te yan dekera ya mɛhe bɔ'ɔra yelemɛŋɛrɛ la.
Ge kɔ'ɔn yehe ya mɛhe ze'ele tona la sɛla n de ma'an,
wo Yenɛ n bote se'em la.
20 Yan daa nan be'em yamehe la,
ya da ka bote tontɔɔ vom yɛla.
21 Nananawa,
bene yɔɔrɛ n boe vitooma la te ya daa tona la poan?
Yɔɔrɛ ka boe,
ya tooma la bahɛ te kum n bɔna.
22 Ge nananawa,
Yenɛ bahɛ te ya bɔna la fai dɛna Yenɛ yamehe,
te ya yɔɔrɔ dela ya bɔŋa zan'an dekɛ bo la Yenɛ ge te ya wan le nyɛ' vom n ka tare ba'ahegɔ Yenɛ zen'en.
23 Ge be'em yɔɔrɛ dela kum.
Ge Yenɛ zaŋa bo'olom la dela vom sebo n ka tare ba'ahegɔ to Daana Yesu Krista poan.