Ho ka parom bo la nɛreba ma'an ge ho parom bo la Yenɛ
5
1 Ge boraa kayema n daa boe te a yu'urɛ dɛna Ananias.
A pɔga yu'urɛ dela Sapira.
Boraa wa daa koohe la ba lɔgɔrɔ toseto
2 ge loe ligiri i se i tara a mea,
ge dekɛ ligise'a n gee la tare ta bo Yesu tontoneba la.
A pɔga la me daa mi' sɛla woo te a eŋɛ la.
3 Bilam te Peter yele en yeti,
Ananias,
wane te ho bahɛ te Dima la kɛn' ho suunre poan bahɛ hɔ te ho parom bo Yenɛ Sea la ge yelege ligiri la ise'e te ho daa dekɛ ho lɔgɔrɔ koohe la?
4 Hon daa nan ka koohe ho lɔgɔrɔ la,
la daa dela ho denɛ.
Hon me n daa koohe ho lɔgɔrɔ la,
ligiri la daa dela ho denɛ.
Ge wane te ho tɛn'ɛhɛ ho potɛn'ɛrɛ te hon wan eŋɛ dena wa.
Ho ka parom bo la nɛreba ma'an ge ho parom bo la Yenɛ.
5 Ananias n ta wom Peter n yele se'em la,
bilam bilam te a lu' teŋa ki'.
Dabeem kɛn' sɛba woo n wom dɛ la.
6 Te bodibinpaalehe wa'ana pɔnbɛ en tare en keŋɛ ta pin'.
7 La ka ba yuue te Ananias pɔga la keŋɛ Peter n boe zen'en la.
Ge a ka baŋɛ te a sera la ki' ya.
8 Te Peter yele en yeti,
Yele mam na,
hon la ho sera la n koohe ya lɔgɔrɔ la,
ligiri la zan'an n wana?
Te a lebehe yele en yeti,
Ɛɛn,
i zan'an n bala.
9 Te Peter yele en yeti,
Wane te hon la ho sera la eŋɛ ya potɛn'ɛra te ya bɛnrɛ to Daana Sea la behɛ?
Boraa se'ehe n pin' ho sera la nan bo yeŋa nananawa.
Ba wan zi' hon me yehe.
10 Bilam bilam te a lu' teŋa ki'.
Bodibinpaalehe la n kɛn' ta nyɛ' te a ki' ya la,
ba dekɛ en mɛ yehe ta pin' n lɛm a sera yɔ la.
11 Lagaŋɔ la woo,
la sɛba woo n wom dɛ la dabeem kantɛ n kɛn' ba.
12 Te Yesu tontoneba la daa eŋɛ yelekerehe zo'e zo'e nɛreba la zen'an.
Sɛba woo n sakɛ bo Yesu la lagahere taaba la Solomon Zenzaka.
13 Nɛresɛba woo n zote dabeem la ka lagom la ba ge ba na'aha ba.
14 Boraahe la pɔgɔhe kekeko sakɛ bo Yesu ge lagom la sɛba n sakɛ bo Yesu la mɛ.
15 Yesu tontoneba la n eŋɛ yelekerehe la,
nɛreba tare ban'ahedoma yehe pala zuto ta dekɛ ba gan'anrɛ gɔtɔ la sonɔ zuto te Peter han ta tɔla a yilinyiliŋɔ wan zoo ba te ba ban'ahe la bahɛ.
16 Nɛrekooŋɔ me ze'ele teŋse'ehe n lɛm Yerusalem,
a lagahɛ bini.
Ba tare ban'ahedoma la sɛba te bonbɛ'ɛhe dɔla la wa'ana te Yesu tontoneba la bahɛ te ba ban'ahe la daa bahɛ.
Keŋɛ ya Yenɛ Yire la poan la ya ta tɔgɛ vom yɛla la zan'an bo nɛreba la
17 La daa eŋɛ bala te malema nɛŋadaana la a taaba la sɛba n bo Saduseedoma lagaŋɔ poan la ihege nyuuna la Yesu tontoneba la n ete se'em la.
Bilam poan,
te ba eŋɛ ba potɛn'ɛra te ba namehe ba.
18 Ba nyɔkɛ Yesu tontoneba la pagɛ pakadeen.
19 Ge Na'ayenɛ soŋora wa'an yu'uŋkoŋɔ na yu'ɛ pakadeen la kolehe ge bahɛ te Yesu tontoneba la yehe ge te a yele ba yeti,
20 Keŋɛ ya Yenɛ Yire la poan la ya ta tɔgɛ vom yɛla la zan'an bo nɛreba la.
21 Yesu tontoneba n wom Na'ayenɛ soŋora la nɔɔrɛ ge te ba keŋɛ Yenɛ Yire la poan bolika yu'uŋyu'uŋɔ ta pin'ilom pa'ala nɛreba.
Te malema nɛŋadaana la la a taaba la yi' Yudoma zuodoma la Yetɔgom Tɔgɔrɔba la zan'an,
ge ton te basɛba keŋɛ pakadeen la,
la ba ta tare Yesu tontoneba la wa'an ba zen'en na.
22 Ge sɛba te ba ton la n daa ta paɛ la,
ba ka nyɛ' Yesu tontoneba la pakadeen la,
te ba ŋmɛregɛ lebena yele Yetɔgom Tɔgɔrɔba la te,
23 Tomam n keŋɛ ta paɛ pakadeen la,
tomam nyɛ' te ko kɔ'ɔn kpare mɛ ge te guruba la me gura nayahe la.
Ge tomam yu'ɛ kolehe la,
tomam ka nyɛ' nɛnɛra bini.
24 Sɛba n gura Yenɛ Yire la zuodaana la malema keendoma la n daa ta wom wana wa la,
la daan ba la eŋɛ se'em te Yesu tontoneba la nyaŋɛ yehe la.
25 Ge boraa kayema wa'an ban lagahɛ taaba zen'en la yele ba yeti,
Kelehe ya,
boraahe la te ya pagɛ pakadeen la n boe Yenɛ Yire la poan pa'ala nɛreba la.
26 Ban wom dena wa la,
zuodaana la la a nɛreba ihege keŋɛ ta tare Yesu tontoneba la wa'an ba zen'en na.
Ge ba ka pɛnregɛ ba tare wa'an na.
Se'ere n sɔe la,
ba zote la dabeem te nɛreba la ta lobe ba la kuga.
27 Ban daa tare Yesu tontoneba la kɛn' zen'an te Yetɔgom Tɔgɔrɔba laganɔ la,
ba bahɛ ba te ba tole nɛŋa ze'ele te malema nɛŋadaana la soke ba yeti,
28 To kan'an ya te ya da le pa'alɛ Yesu yɛla ge behe ya yan eŋɛ se'em.
Ya bahɛ te nɛreba woo n boe Yerusalem mina yan pa'alɛ se'em la.
Ya bote ya yete te tomam n ko' boraa wa.
29 Ge Peter la Yesu tontoneba la basɛba lebehe yele ba yeti,
To wa nam la Yenɛ nɔɔrɛ ge dagɛ la nɛreba nɔya.
30 Yamam n daa kpa' Yesu punpuuredɔɔ zuo te a ki' ge Yenɛ se'em te to sɔdoma soha la daa bahɛ en te a ihege a kum la poan.
31 N daa ihege a kum la poan la,
Yenɛ daa bahɛ en te a zin'an a zuɔ nu'o bɔba te a de'a nɛreba la faanra la zuodaana ge la a bo Israeldoma sore te ba tee ba potɛn'ɛra ba toonbe'erotooma poan ge te a bahɛ ba toonbe'ero bo ba.
32 Tomam nyɛ' wana wa la to nini wa.
Yenɛ Sea se'em te a tara bɔ'ɔra sɛba n nane a nɔɔrɛ la,
enŋa me wan yele ya te la dela bala.
33 Yetɔgom Tɔgɔrɔba la n daa wom Yesu tontoneba la n yele ba se'em la,
ba sunsunya nyie mɛ te ba tɔgɛ wa ko' de te la dela ba ko' ba.
34 Ge Gamaliel se'em n de Parisee Pa'alegɔ pa'aleba ayema te nɛra woo na'aha en,
ihege te a tɔgɛ yele ba te ba tare Yesu tontoneba la yehe yeŋa.
35 Te a nya yele Yetɔgom Tɔgɔrɔba la te,
Israel teŋa boraahe wa,
behe ya ya zuto soŋa soŋa la yan yete ya eŋɛ boraahe wa se'em wa.
36 Yuuma n tole ha,
Teudas daa wa'an na zɛnkera a mea te enŋa dela nɛrekantɛ ge te boraahe wo kɔbehe senaahe daa lagom en.
Ge ban daa ta ko' en la,
sɛba te a pa'ala la zan'an daa zɔ' yeregɛ mɛ ge te ba lagaŋɔ la daa ka le bɔna yɛ'ɛha.
37 Yudas me,
se'em n mea daa de Galilee teŋa nɛra la daa wa'an dabahese'a te ba daa kaanlɛ nɛreba la.
A me daa nyɛ' nɛreba kekeko te ba dɔla en,
ge enŋa me te ba daa ta ko' la,
sɛba te a pa'ala la zan'an me daa zɔ' yeregɛ mɛ.
38 Bala zuo,
nananawa,
mam yele ya,
da eŋɛ ya boraahe wa sɛla.
Bahɛ ya ba ba ma'an.
Se'ere n sɔe la la han de'a la asaala mea n tɛn'ɛhɛ de tona,
la wan nɛɛ na.
39 Ge la han de'a la Yenɛ tooma,
bahɛ ya,
ya kan nyaŋɛ go'e ba.
Ya wan ta nyɛ' de ya ton zabera la Yenɛ.
Bilam te Yetɔgom Tɔgɔrɔba la nya ta sakɛ bo Gamaliel kan'aŋɔ la.
40 Ba nya yi' Yesu tontoneba la kɛn' ba zen'en ta ŋmɛ' ba ge kan'an ba te ba da le yɛ'ɛha tɔgɔra Yesu yɛla bɔ'ɔra nɛreba ge daa dekɛ ba bahɛ te ba keŋɛ.
41 Te Yesu tontoneba la n yehe Yetɔgom Tɔgɔrɔba zen'an la poan la,
ba tara popeelom.
La Na'ayenɛ n seren bahɛ te ba namehɛ ba Yesu yu'urɛ poan la.
42 Daarɛ woo Yesu tontoneba kene Yenɛ Yire la poan la ba yiya poan sina ge kelom tɔgɔra Yesu Krista Yelesoma la bɔ'ɔra nɛreba.