A ka boe kalam. A vo'e a kum la poan mɛ.
24
1 Ge Alaherɛ daarɛ bolika yu'uŋyu'uŋɔ la,
pɔgɔhe la daa ihege mɛ dekɛ nyɛga la kaam te ba maahom la ba keŋɛ teŋa yoko la poan.
2 Ban paɛ la,
ba nyɛ' te kugukantɛ la te Yosefdoma dekɛ legele teŋa yoko nɔɔrɛ la belege mɛ ga'an zen'an kayema ha.
3 Ban kɛn' bini la,
ba ka nyɛ' to Daana Yesu se'em n daa ki' te ba tare en ta biŋe bini la.
4 Ban ze'a yɛle tɛn'ɛha dena wa yele,
bilam bilam te boraahe seyi' n yɛ' lɔgɔrɔ te to nyagera wa lagom ze'a la ba.
5 Dabeem kɛn' ba te ba dɔnbelɛ teŋa ba nɛŋa.
Ge,
boraahe la yele ba te,
Wane te yamam me nya wa'ana ɛɛra nɛra se'em n vɔe zen'sɛka te ba tara nɛresɛba n ki' biŋera?
6 A ka boe kalam.
A vo'e a kum la poan mɛ.
Ya tɛn'ɛre n daa yele ya se'em n daa nan boe Galilee teŋa poan la?
A daa yele ya te,
7 La sontii ba dekɛ Asaala Dayɔa eŋɛ be'emdoma nu'uhen.
Te ba wan kpa' mam punpuuredɔɔ zuo te n ki'.
Ge dabeha atan' poan,
n wan vo'e n kum mea poan.
8 Bilam te pɔgɔhe la tɛɛn en yele ba se'em la.
9 Depooren te ban lebe ta yele Yesu dɔlɔba la pia la ayema la la basɛba n lagom ba sɛla woo n eŋɛ.
10 Pɔgɔse'ehe n yele dena wa dela Mari Magdalene la Yoanna la Yames ma Mari la pɔgɔse'ehe.
11 Ban yele Yesu dɔlɔba la,
ba tɛn'ɛhe te pɔgɔhe la n yele se'em la dela tɔgɔyooro.
Bala ba ka sakɛ bo ban yele ba sɛla la.
12 Ge Peter ihege zɔ' keŋɛ taŋa yoko la poan.
N paɛ veehe behɛ bini la,
a nyɛ' la fuseto te ba daa dekɛ pɔnbɛ iŋa la ma'an,
ge a ka nyɛ' sɛla le pa'ahɛ.
Depooren,
te a ŋmɛregɛ lebe kule ge tɛn'ɛha a ma'an sɛla n eŋɛ wa.
A ka boe kalam. A vo'e a kum la poan mɛ.
13 Daanden daarɛ mea la Yesu dɔlɔba la bayi' me n ye' Emmaus teŋa sore zuo.
Yerusalem teŋa yɛ'a bini daa de wo mɛɛla ayopɔe.
14 Ban ye' bala la,
ba sɔnhere bɔ'ɔra la taaba yɛhera sɛla woo n eŋɛ wa.
15 Te ban kene ge sɔnhera wana wa la,
Yesu me paɛ ba zen'en lagom kena la ba.
16 Ge Na'ayenɛ ka bahɛ ba te ba baŋɛ en.
17 Yesu soke ba yeti,
Bene yele n bala te ya kena ge tɔgɔra wa?
Te ba ze'ele ki'i ge te ba sunya sagom.
18 Ba ayema la yu'urɛ n de Kleopas la nya soke en te,
Hon ma'an n nan de saansɛka n bo Yerusalem teŋa poan nan ka mina yelese'ere n eŋɛ bini ha dabeha wa?
19 A lebehe soke yeti,
Bene yɛla n eŋɛ?
Ba lebehe en te,
Yelese'a n eŋɛ yɛhera Nazaret teŋa boraa Yesu la.
A daa dela nɔtɔgɔha.
Na'ayenɛ n daa bo en paŋa te a tona yelekerehe tooma ge tɔgɔra enŋa Na'ayenɛ yelehom.
Ge nɛra woo daa baŋɛ te Na'ayenɛ n bo en paŋa kaŋa wa.
20 Te to malemadaana la to zuodoma daa dekɛ en tehɛ te ba bo sore te ba kpa' en.
Ban daa bo sore la,
ba daa kpa' en la punpuuredɔɔ zuo te a ki'.
21 To me daa tare to potɛn'ɛra poan te a wan de'a se'em n wan fan' tomam Israel teŋa nɛreba bahɛ.
Te yelese'ere n nya le pa'ahɛ dela zina dabaherɛ wa dela dabeha atan' n wane te yele ana wa eŋɛ wa.
22 Ge pɔgɔse'ehe to lagaŋɔ la poan me daa eŋɛ tɔ la pakerɛ.
Ba ihege la bolika yu'uŋyu'uŋɔ ha la keŋɛ taŋa la yoken.
23 Ge ban paɛ bini la,
ba ka nyɛ' iŋa la.
Te ba lebena na yɛta te ba nyɛ' la sɛla te de nɛɛ ba zen'en.
Ba yeti la daa dela Na'ayenɛ soŋoreba n daa nɛɛ na yele ba te Yesu vo'e a kum la poan.
24 Pɔgɔhe la n daa yele bala,
la to lagom la nɛreba basɛba me daa keŋɛ taŋa yoko la poan mɛ.
Bama n daa paɛ la,
ba daa nyɛ' la sɛla te pɔgɔhe la yele la.
Ge ba daa ka nyɛ' Yesu.
25 Ban daa ta yele wan wa woo ba'ahɛ la,
a yele ba te,
N sɔɔnrɔ,
ya dela gɔɔnɔ.
Se'ere n sɔe la,
ya ka sakɛ la ya sunya zan'an zan'an bo nɔtɔgɔheba n yele se'em la.
26 La dela ma'an te se'em te Yenɛ loe la nyɛ' namehe sena wa ba zuo ge nya nyɛ' pɛnka Na'ayenɛ zen'en.
27 En daa yele ba dena wa ba'ahɛ la,
a nya pa'alɛ ba mɛ soŋa soŋa te ba bɔkɛ Yenɛ gɔŋɔ la n yete sɛla yɛhera enŋa me yele la.
A pɔhɛ la gɔŋseto te Moses golehɛ la tara tara la nɔtɔgɔheba n me golehɛ gɔŋseto la.
28 Ban kene wa pɔnra teŋsɛka te ba yɛ'a la,
Yesu eŋɛ ba mɛ wo a bote a tole la nɛŋa ha la.
29 Ge ba zagahɛ ge yele en mɛ te,
Yee la ho gan'anrɛ la tɔ te yenɛ la wone te de lo' me n bala.
Bala te a yee ba zen'en.
30 Te ban zin' te ba di' la,
a dekɛ boroboro la mɛ bo Na'ayenɛ fara ge gɛn'ɛnhɛ bo ba.
31 Bilam te Na'ayenɛ bahɛ te ba baŋɛ n de se'em.
Ge a mɛlom ba zen'en.
32 Ba yele taaba te,
N tɔgɛ ne bo ne to ge pa'alɛ sore zuo yɛhera sɛla te ba golehɛ eŋɛ Yenɛ gɔŋɔ la vɔnrɛ n de se'em la,
la eŋɛ to sunya nyɛlom.
Ge bene n sɔe te to ka baŋɛ ne en?
33 Te ba nya kɔ'ɔn ihege mɛ kalam lebe Yerusalem teŋa poan.
Ban paɛ la,
ba nyɛ' te Yesu dɔlɔba la pia la ayena la la basɛba la me lagahɛ taaba zin'an.
34 Ba zin' yɛta te,
Yelemɛŋɛrɛ,
to Daana Yesu la vo'e a kum la poan mɛ.
A nɛɛ a mɛŋa Simon zen'en mɛ!
35 Bala te ba yele ba se'ere n eŋɛ sore zuo la la ban zin'ire te ba di' te a gɛn'ɛn boroboro la bo ba te baŋɛ en se'em.
36 Ban kelom bɔna bini tɔgɔra mɛ yɛhera dena wa te Yesu kɔ'ɔn nɛɛ a mea ba zen'en,
yele ba te,
Na'ayenɛ bo ya sunma'ahom.
37 Dabeem kɛn' ba mɛ ban tɛn'ɛha te ba nyɛ' la kɔkɔ la zuo.
38 Bala te Yesu nya yele ba te,
Bene te ya bahɛ te la daana ya bala?
Wane te ya tɛn'ɛha potɛn'ɛra ayi' ayi'?
39 Behɛ ya n nu'uhen la n natala la te yan wan nyɛ' te la dela mam n bala.
Gorɛ ya n iŋa behɛ te ya wan nyɛ' te n tara la asaala iŋnaanɛ.
Se'ere n sɔe la,
kɔkɔ ka tare asaala iŋnaanɛ.
40 En daa yele ba wana wa la,
a nya pa'alɛ ba mɛ a nu'uhen la a natala la.
41 Ba kelom nan ka sakɛ bo sɛla te a yele la ba poorɛ pee mɛ la zuo ge la me eŋɛ ba pakerɛ.
Bala te a daa soke ba yeti,
Ya tare sɛla wan di' kalam?
42 Te ba gɛn'ɛn zinho te ba dɔgɛ bo en,
43 te a to'e obe ba nɛŋan.
44 Te a nya yele ba te,
Mam n daa boe la ya la,
n daa yele ya te sɛla woo te ba golehɛ Moses Pa'alegɔ la Nɔtɔgɔheba la Yooma gɔnɔ la poan yɛhera n yele mɛ sontii de seren eŋɛ bala.
45 Depooren te a nya tɔgɛ pa'alɛ ba te ba bɔkɛ sɛla n boe Yenɛ gɔŋɔ la poan vɔnrɛ n de se'em.
46 A yele ba te,
Sɛla te ba golehɛ eŋɛ Yenɛ gɔŋɔ la poan dela:
ba golehɛ te se'em te Na'ayenɛ loe te wan nyɛ' namehegɔ ge me vo'e n kum dabeha atan' poan.
47 Le yɛ'ɛha me,
a yu'urɛ poan te nɛreba wan mɔɔlɛ te nɛreba tee ba potɛn'ɛra ba be'em poan ge te Na'ayenɛ bahɛ ba be'em bo ba.
Ba wan pin'ilom la Yerusalem teŋa mɔɔla ta paara teŋhe woo.
48 Ge yamam me n de sɛba n nyɛ' yele ana wa la ya nini.
49 Dene poan,
mam mea wan bo ya sɛla te n Sɔ' biŋe a nɔɔrɛ te a wan bo ya la.
Ge la sontii ya bɔna Yerusalem teŋa la poan gura te Na'ayenɛ ta bo ya paŋa.
50 Yesu nya tare ba mɛ te ba yehe teŋa la poan.
Ba keŋɛ ta wona la ba paɛ la Betani teŋa poan.
Bilam te a zɛnkɛ a nu'uhen kan' kan'somɔ bo ba.
51 En kelom kan'ara bɔ'ɔra ba mɛ ge te Na'ayenɛ yare bahɛ en te a bahɛ ba ge zom saazuo ha.
52 Bala te a dɔlɔba na'ahe en ge lebe Yerusalem teŋa poan la popeelom
53 ge kɔ'ɔn bɔna la Yenɛ Yire la poan pɛngera Na'ayenɛ ka gɔ'ɔra.