Yenɛ sɔ'ɔlom la ana wo nɛra n dekɛ bonbuura lobe va'am poan la
4
1 Yesu daa le pin'ilom pa'ala la nɛreba mɔgɔrɛ la nɔgbenɛ te nɛreba kekeko lagahɛ a zen'en te a kɛn' ɔɔnrɔŋɔ poan nya bɔna ko'om poan ge te nɛrekooŋɔ la woo bɔna doone.
2 A tare la magaha pa'alɛ ba yɛla kekeko.
A makɛ makerɛ pa'alɛ ba yeti,
3 Kelehe ya.
Kaara n daa boe daa keŋɛ a va'ame te a lobe a bonbuura.
4 N daa bo bini lɔbera la,
bonbuura la basɛba daa lu' sore zuo te niihe kiŋ gɔ' ba zan'an.
5 Basɛba me daa lu' tanhe zen'en,
zen'an te tentɔnɔ ka zo'e.
Tentɔnɔ n daa ka zo'e la zuo ba daa yehe kalam.
6 Wontɛɛŋa n daa woŋɛ ba te ba ka tare nyɛga,
bala n sɔe,
te ba daa ki'.
7 Bonbuura la basɛba daa lu' la gɔn'ɔhe poan te gɔn'ɔhe la kpare ba te ba ka wom dia.
8 Bonbuura la basɛba daa lu' la pɔn'ɔhegɔ poan nya zɔ'ɔra pa'aha ge wom dia,
te sɛba wom pihitan',
te sɛba wom pihiyoobe,
te sɛba wom kɔbega.
9 Te a nya yele ba yeti,
Hon se'em n tare toba,
kɛleha.
10 Yesu la Pia La Bayi' la nɛresɛba n gee la n daa ta bɔna ba ma'an la,
ba soke en magaha la vɔnrɛ.
11 Te a lebehe ba yeti,
Yenɛ sakɛ te yamam mi' a sɔ'ɔlom yɛla.
Ge,
sɛba n boe yeŋa la ba wone sɛla woo la magaha poan te ba ka mi' vɔnrɛ la.
12 Bala te ba behere ge ka nyɛta,
ba wone ge ka baŋera.
Han dagɛna bala,
ba wan tee ne ba potɛn'ɛra te Na'ayenɛ bahɛ ba be'em bo ba.a
13 Yesu nya soke ba yeti,
Yamam ka bɔkɛ makɛ dena wa?
Ge ya wan eŋɛ la wane ta'an bɔkɛ magase'ere yɛ'ɛha?
14 Bonbuura la te kaara la daa lobe la de Yenɛ yelehom la.
15 Nɛreba basɛba ane wo sore la poan te bonbuura la daa lu' la.
Ba han wom yelehom la,
bilam bilam te Dima wa'ana dekɛ yelehom la te ba wom la.
16 Nɛreba basɛba ane wo tanhe la te bonbuura la lu' la.
Ba han wom yelehom la bilam bilam te ba wan to'e a la popeelom.
17 Ge,
ba ane wo ba ka tare nyɛga la.
Bala zuo,
daaŋɔ bii namehegɔ han wa'an yelehom la zuo na,
ba bahɛ a la kalam.
18 Nɛreba basɛba me le ana wo sɛba n lu' gɔn'ɔhe poan la.
Ba dela sɛba n wom yelehom la,
19 ge te zina wa yɛla la n kpe'em la tarega nyɛlom la bonborɛ nɔŋɔlom gu'ura yelehom la,
te ba ka zɔ'ɔra pa'aha.
20 Nɛreba basɛba me ane wo pɔn'ɔhegɔ zen'an la te bonbuura la daa lu' la.
Ba wom yɛla la,
ge sakɛ bo a.
Bala mea la te ba daa zo'e wom pihitan',
te basɛba wom pihiyoobe,
te basɛba wom kɔbega.
21 Yesu yele ba yeti,
Nɛra han ne tara butolela kɛn' bɔ'en,
a ne dekɛ la laa vugule ka?
Bii a dekɛ ka ze'ele koka leŋen?
Aai,
a ne dekɛ ka ze'ele la ka ze'elego zen'an.
22 Bala poan,
ba han sogɛ sɛla la wan nɛɛ na.
Sɛla me te ba pile wan bahɛ pilige mɛ.
23 Hon se'em n bɔkɛ yɛla la,
kɛleha a.
24 Te a yele ba yeti,
Wom ya soŋa soŋa.
Hon makere se'em teha la bala mea te ba wan makɛ bo ho,
ba wan makɛ gaŋɛ bala.
25 Hon se'em n to'e mam pa'alegɔ wan to'e gaŋɛ bala.
Hon se'em n ka to'e mam pa'alegɔ la,
sɛla te ho tara la,
Na'ayenɛ wan to'e la ho zen'en.
26 Te Yesu le yele ba yeti,
Yenɛ sɔ'ɔlom la ana wo nɛra n dekɛ bonbuura lobe va'am poan la.
27 A han gan'an ginha yu'uŋɔ ge ihegera bolika,
a wan nyɛ' te bonbuura la taherɛ mɛ yɛha zɔ'ɔra ge te a kan baŋɛ la eŋɛ se'em.
28 Teŋa la n sɔe te bonbuura la yɛhera,
vɔntɔ n yɛhera yia,
te zuto tagala nya bɔ'ɔra dia.
29 Dia la han bi'e te kɛ'a dabaherɛ paɛ,
a nya dekere la a kɛreŋa yɛ'a.
30 Yesu le yele ba yeti,
To wan makɛ te Yenɛ sɔ'ɔlom la n ana se'em n wana.
31 La ane wo tia biile pegehe la.
Bama n de biile pegehe,
biile woo poan.
32 Ho han bore ba va'am poan,
te ba yehe zo'e,
ba gane tise'ehe woo te ba borɛ va'am la poan la.
Ba tara yilekanra te niihe kena yagala ma'ahom la poan.
33 Yesu daa dekɛ la magaha n an wo dena wa kekeko tɔgɛ yelesoma la bo ba,
ba han wan ta'an baŋɛ,
ba baŋɛ.
34 A ka tɔgɔra bɔ'ɔra ba ge te makerɛ ka bɔna.
Ge a ne lilige sɛla woo bo la a dɔlɔba la ma'an.
35 Zanɔɔrɛ n paɛ,
te Yesu la a dɔlɔba la daa boe la ɔɔnrɔŋɔ la poan te a yele ba yeti,
Bahɛ ya te to yakɛ mɔgɔrɛ la yakenɛ ha.
36 Te ba tare en keŋɛ ge bahɛ nɛrekooŋɔ la.
Ɔɔnrɔnɔ toseto daa lagom bɔna la ba.
37 Ban boe ɔɔnrɔŋɔ la poan kena kena,
te saabeeokeŋɔ lɔbera te ko'mi'inhe ŋmɛ'ɛra kɛn'ɛra ɔɔnrɔŋseko ge te la gee fiin la ko perɛ.
38 Yesu gan'an ɔɔnrɔŋɔ la pooren kɔga dafeere ginha te ba nɛɛ en yele en yeti,
Wane te ho gan'an ginha ge te to yeti te ki'?
39 Te a ihege tanhɛ sabeeo la ge yele ko'mi'inhe la yeti,
Go'e banlaam!
Da ŋmɛ'ɛra!
Te sabeeo la daa go'e te ko'mi'inhe la me daa ka le ŋmɛ'ɛra.
40 A yele ba yeti,
Bene te ya tara dabeem bala?
Ya ka sakɛ sera bo Na'ayenɛ?
41 Dabeem kɛn' ba te ba yɛta taaba yeti,
Bem boraa n bala?
Te sabeeo la ko'mi'inhe nana a nɔɔrɛ.