Yenɛ sɔ'ɔlom
13
1 De daarɛ mea te Yesu daa yehe yire la zin'ire mɔgɔrɛ nɔgbenɛ.
2 Te nɛrekooŋɔ lagahɛ a zen'en na,
te a kɛn' ɔɔnrɔŋɔ poan ge te nɛreba la woo daa ze'a doone.
3 A dekɛ magaha yele ba yɛla kekeko yeti,
Kaara n daa yehe te a bore.
4 N lobere la,
bonbuura la basɛba zɔgɛ sore zuo te niihe keŋɛ gɔ' ba zan'an.
5 Te basɛba zɔgɛ tanhe zen'en,
zen'an n ka tare tentɔnɔ kekeko.
Ba yehe kalam.
Se'ere n sɔe la tentɔnɔ la ka zo'e bilam.
6 Wontɛɛŋa woŋɛ ba te ba ko'ɛ.
Se'ere n sɔe la ba daa ka tare nyɛga.
7 Basɛba me zɔgɛ gɔn'ɔhe poan te gɔn'ɔhe la zo'e kpare ba.
8 Ge basɛba zɔgɛ pɔn'ɔhegɔ zen'an nya wom disoŋa te basɛba wom la kɔbega,
te sɛba wom pihiyoobe,
te sɛba wom pihitan',
gaŋɛ ban dekɛ se'em borɛ la.
9 Hon se'em n tare toba kɛleha,
kelehe.
10 Te dɔlɔba la keŋɛ a zen'en ta yele en yeti,
Bene n sɔe te ho tara magaha tɔgɔra bɔ'ɔra nɛreba la?
11 A lebehe yeti,
Saazuo sɔ'ɔlom la yam dela sɛla n ka nare la yehe yeŋa.
A ka dekɛ bɔ bo bama ge a dekɛ la bo la yamam.
12 Se'em n tare zo'e la wan nyɛ' pa'ahɛ,
ge se'em n ka tare,
sɛla te a pon tara la ba wan to'e la a zen'en.
13 Se'ere n sɔe te mam tara magaha tɔgɔra bɔ'ɔra ba la dela:
Ba nyɛte ge ka baŋera.
Ba kelehe ge ka wona,
ba me ka bɔkere.
14 Bama zuo te Isaiah n daa tɔgɛ sɛla la daa enŋ sera.
Kelehe ya malom kelehe,
ge ya kan malom bɔkɛ.
Behɛ ya malom behɛ,
ge ya kan malom nyɛ.
15 Bahɛ te nɛrebana wa potɛn'ɛra da tana tɛn'ɛha,
bahɛ te ba toba da wona,
te ba nini da nyɛta.
Han dagana bala,
ba nini wan nyɛta,
te ba toba wona,
te potɛn'ɛra bɔkera,
te ba ŋmɛregɛ lebena nyɛ ba tebegɔ.
16 Som boe la ya,
ya tare ninse'e n nyɛte ge tara tobese'a n wone la zuo.
17 N yeti ya yelemɛŋɛrɛ te nɔtɔgɔheba la tontɔɔdoma kekeko daa bote te ba nyɛ' sɛla te yamam nyɛta wa ge ka ta'an nyɛ'.
Ge be daa le bɔta te ba wom sɛla te yamam wona wa ge ka ta'an wom.
18 Nananawa kelehe ya kaara la makerɛ la vɔnrɛ.
19 Bonbuuse'a a n zɔgɛ sore zuo la ane wo nɛra se'em n wom sɔ'ɔlom la yelehom ge ka bɔkɛ.
Bonbe'a la n wa'ana fan' sɛla te ba bore a suunre poan la.
20 Sɛba n zɔgɛ tanhe zen'en la ane wo nɛra se'em n wom yelehom la ge to'e a kalam la popeelom.
21 Ge a ka yuuɛ,
a ka tare nyɛga la zuo.
Daaŋɔ bii zɛrɛgerɛ han kɛn' bini,
yelehom la zuo,
a ne bahɛ a la kalam.
22 Sɛba me n zɔgɛ gɔn'ɔhe poan la ane wo nɛra se'em n wom yelehom la,
ge te zina teŋa wa fabelegɔ la tarega nyɛlom gu' la te la ka zɔ'ɔra pa'aha.
23 Ge sɛba n zɔgɛ pɔn'ɔhegɔ zen'an la me ane wo nɛra se'em n wom yelehom la ge bɔkɛ a.
Enŋa zɔ'ɔra ge wɔna biila paara kɔbega bii pihiyoobe bii pihitan'!
24 Te Yesu daa le dekɛ makerɛ deyema yele ba yeti,
Saazuo sɔ'ɔlom an wo boraa kayema n daa lobe bonbuura a va'am poan.
25 Ge nɛra woo n ta gan'an ginha,
a diŋdaana keŋɛ ta dekɛ mɔɔ biile lobe va'am la poan ge keŋɛ.
26 Bonbuura la ta yehe zo'e nya nyɔgɛ poya te mɔɔ biile la me lagom nyɔgɛ poya.
27 Te va'amdaana la yamehe keŋɛ ta yele en yeti,
Naa,
ho daa ka borɛ la dia ma'an ho va'am la poan?
Te la eŋɛ la wane te mɔɔ bɔna nini bala?
28 Te a lebehe yele ba yeti,
Diŋdaana n eŋɛ bala.
Te yamehe la soke en yeti,
Ho bote te keŋɛ ta vɔn' mɔɔ laa?
29 A lebehe yele ba yeti,
Aai,
ya han ta vɔɔnra mɔɔ la ya wan lagom vɔn' ki' la.
30 Bahɛ ya te ba zan'an lagom zo'e te buŋa paɛ.
N wan bahɛ te sɛba n kɛ'ɛre la lagahe mɔɔ la bobe ta nyɔ' ge lagahɛ n dia la sun' n baanren!
31 A le yele ba makerɛ deyema yeti,
Saazuo sɔ'ɔlom la ane wo biile ise'e n de biile pegehe te boraa dekɛ borɛ a va'am poan.
32 Bama n de bonpegehe biile woo poan,
ge ba han ta zo'e,
ba wan gana biilese'a woo te ho borɛ la ge tara yilekanra te niihe kena yagala.
33 Ge a le yele ba makerɛ deyema yeti,
Saazuo sɔ'ɔlom la ane wo pɔka n dekɛ mi'ihom la zom gaam taaba ŋmɛ' te mi'ihom la kɛn' zom la zan'an te bo ihege la.
34 Yesu daa dekɛ la magaha yele nɛrekooŋɔ la yele ana wa zan'an.
Sɛla ka boe te a yele ba gee te makerɛ kana nini.
35 Bala te nɔtɔgɔha la n daa yelese'em la wan eŋɛ sera:
N wan tara la magaha tɔgɔra bɔ'ɔra ya,
ge lilige yelese'a n eŋɛ deemen deemen ha la vɔnrɛ pa'alɛ ya.
36 Te Yesu bahɛ nɛrekooŋɔ la gee kɛn' yire poan.
Te a dɔlɔba la keŋɛ a zen'en ta yele en yeti,
Pa'alɛ tɔ mɔɔ la la va'am la makerɛ la vɔnrɛ.
37 A lebehe yele ba yeti,
Se'emdaana n borɛ bonbuura la dela Asaala Dayɔa la.
38 Va'am la me dela teŋa wa zan'an n bala,
te bonbuura la me dɛna sɔ'ɔlom la nɛreba.
Mɔɔrɔ la me dɛna bonbɛ'a la nɛreba.
39 Ge te diŋdaana la,
se'em n borɛ mɔɔ la me dɛna sagona la.
Buŋa la n de teŋa wa zan'an ba'ahegɔ poan,
gee te sɛba n bune la me dɛna Yenɛ soŋoreba.
40 Teŋa wa zan'an ba'ahegɔ yeti la ta ana wo mɔɔ la te ba vɔn' nya dekɛ bugum nyɔ' se'em la.
41 Asaala Dayɔa la wan ta tom a soŋoreba te ba yehe ta lagahɛ sɛba woo n bahɛ te be'em kɛn'ɛra a sɔ'ɔlom la poan la la sɛba n de yalomdoma la.
42 Ba wan nyɔkɛ ba lobe bahɛ bugum peelom poan.
Bilam te ba wan kaaha ge ɔbera nyɛna.
43 Bala ma'an te tontɔɔdoma la n boe ba Sɔ' sɔ'ɔlom la poan la nya wan nɛɛ woo yentule la.
a Kelehe ya,
sɛba woo n ta toba.
44 Saazuo sɔ'ɔlom la an woo toolom lɔkɔ te ba dekɛ sogɛ va'am poan,
te boraa kayema keŋɛ ta nyɛ' lɔkɔ la maan dekɛ kɔ pin' te a poorɛ pee te a keŋɛ koohe sɛla woo te a tara nya da' va'am la.
45 Le yɛ'ɛha,
saazuo sɔ'ɔlom la an woo kɔɔha n eere a toolom lɔgɔrɔ la.
46 A han nyɛ' koyema n tare toolom gana,
a wan koohe n tare sɛla woo la ta da' ka la.
47 Ba'ahegɔ poan,
saazuo sɔ'ɔlom la ane wo yoka te ba dekɛ lobe nyɔgɛ zim buuri buuri la.
48 Yoka la n daa perɛ la,
zim lɔbereba la daregɛ yoka la doe la doone nya zin'ire ganhɛ zimsoma la eŋɛ gbeŋehe poan ge dekɛ zimbe'ero la bahɛ.
49 Teŋa ba'ahegɔ poan,
la yeti la ta eŋɛ la bala.
Yenɛ soŋoreba wan ta wa'ana yelege tontɔɔdoma ge dekɛ potɔpa la
50 bahɛ bugum poan.
Bilam te ba wan ta kaaha bii ɔbera nyɛna.
51 Yesu soke ba yeti,
Ya bɔkɛ wana wa zan'an?
Ba lebehe yele en yeti,
Ɛɛn,
52 A yele ba yeti,
Bala zuo sɛba n pa'ale pa'alegɔ la woo te ba zamehɛ ba saazuo sɔ'ɔlom la yɛla la ane wo yiredaana n vaɛ a lɔgɔpɔɔlɔ la a lɔgɔkɛgɛhe a bɔ'en yehe na la.
53 Yesu n daa ta ba'ahɛ maga ana wa,
a daa bahɛ bilam mɛ.
54 A daa keŋɛ la a mɛŋa teŋa poan ge pɔhɛ pa'alɛ nɛreba zamehegɔ yiya poan,
te la eŋɛ ba pakerɛ te ba yeti,
Boraa kana wa nyɛ' yambona wa la bɛɛ?
Gee paŋkana wa,
a nyɛ' ka la bɛɛ?
55 Dagɛ mɛta la dayɔa la n bala?
A ma yu'urɛ dagɛ Mari?
Dagɛ a yebehe n de Yames la Yosef la Simon la Yudas?
56 Dagɛ a tanpa n lagom bɔna la to wa?
Bɛha te boraa kana wa nyɛ' wana wa zan'an.
57 Ban daa zagahɛ en se'em n bala,
ge Yesu yele ba yeti,
Nɔtɔgɔha ka tare na'ahegɔ a mɛŋa teŋa la a yire poan ma'an.
58 A daa ka eŋɛ yelekerehe zo'e bilam.
Se'ere n sɔe la ba daa ka sakɛ bo en.