Yesu daa tom pia la bayi'
10
1 Yesu daa yi' a dɔlɔba pia la bayi' la bo paŋa te ba sa'aha bonbɛ'ɛhe ge tebera ban'ahe yema yema.
2 Yesu tontoneba la pia la bayi' la yu'ura n wana.
Yiadaana dela Simon se'em te ba daa yi'ira Peter la a yebega Andrew la Zebedee dayɔɔhe Yames la a yebega Yon la
3 Filip la Bartolomu la Tomas la Matu n de koba tɔ'ɔha la Alpaeus dayɔa Yames la Tadaeus la
4 Simon se'em n daa tɔgɔre te a to'e Yudoma teŋa bahɛ la Yudas Iskariot se'em n daa ŋma' Yesu la.
5 Yesu daa tom pia la bayi' la te ba yehe,
ge pa'ale ba yeti,
Da keŋɛ ya sɛba n dagɛ Yudoma la teŋa bii Samariadoma teŋa poan.
6 Ge keŋɛ ya Israeldoma n an woo piihe n bɔregɛ la teŋhe.
7 Ya han keŋɛ,
mɔɔlɛ ya yeti,
saazuo sɔ'ɔlom la pɔnre.
8 Ya tebera ban'ahedoma ge bahɛ te nɛreba vɔ'ɔra ba kum poan ge tebera konkɔma gee sa'aha bonbɛ'ɛhe.
Ya ka yɔɔre ge te mam bɔ'ɔra ya.
Bala,
bo'ore ya nɛreba ge da tɛn'ɛha yɔɔrɛ yele.
9 Da dekɛ ya ligiri sun' ya funini poan.
10 Ya kenɛ mea poan,
da tare ya tapɔtɔ bii dansigihe seyi' bii tagara bii dɔya.
Ba wan bo tontona sɛla te a bɔta.
11 Teŋsɛka woo te ya paɛ,
ɛ ya nɛresoŋɔ zen'an la ya kɛn'ɛra a yire te ya yɛhega ta paɛ.
12 Yan kɛn' yire poan,
kan' ya som bahɛ dɛ poan.
13 Yire la nɛreba han to'e ya bahɛ ya kan'somɔ la bo ba,
ge ba han ka to'e ya,
luke ya ya sunma'ahom kan'an keŋɛ.
14 Yire bii teŋsɛka n ka to'e ya ya kpa'ahe na'ma puuhugo bahɛ ka poan.
15 Mam yeti ya la yelemɛŋɛrɛ te gankerɛ daarɛ Yenɛ wan ta tara Sodom la Gomora teŋhe nɛrebaa giinle gana teŋkaŋa.
16 Behɛ ya,
mam tone ya te ya yehe wa,
ya ane wo piihe n lagom sanhe poan la,
bala wake ya wo bonsɛla la,
ge dene ya naana wo dayene la.
17 Mini ya te nɛreba wan nyɔkɛ ya tare naba yire,
ba wan ŋmɛ' ya zamehegɔ yiya poan.
18 Ba wan tare ya keŋɛ teŋbeheradoma la nadoma la zen'enhen mam zuo,
te ya tɔgɛ yelesoma la bo bama la sɛba n dagɛ Yudoma la.
19 Ba han nyɔkɛ ya,
da fabele ya te ya wan yele la dene bii ya wan eŋɛ la wane.
Bala ma'an Sea wan ta bo ya yelese'a te ya wan yele.
20 La dagɛ yamam n wan ta tɔgɔra ge la dela ya Sɔ' Sea la n wan la tɔgɔra bɔ'ɔra ya.
21 Bala ma'an boraa wan koohe a yebega te ba ko' en.
Te sɔ wan ta eŋɛ a bia bala.
Te nɛreba me ŋmɛregɛ eŋɛ ba sɔdoma la ba madoma bahɛ te ba ko' ba.
22 Nɛra woo wan yaɛ ya mam zuo.
Ge se'em woo n wan sɛ' ze'ele gura ba'ahegɔ,
wan nyɛ' faanrɛ.
23 Ba han zɛrɛgɛ ya teŋa kayema,
zɔ' ya keŋɛ ya teŋa kayema me.
N yeti ya la yelemɛŋɛrɛ te ya kan nyaŋɛ doohe Israel teŋhe zan'an ge te Asaala Dayɔa ta wa'ana.
24 Se'em n zamehe ka kpe'em la a pa'ala bii yameŋa ka kpe'em la a daana.
25 Bala la son te se'em n zamehe ana wo a pa'ala la,
te yameŋa me ana wo a daana la.
Ba han yi' yiredaana te Beelzebul yu'yooro ane te ba wan dekɛ bo a yiredoma la.
26 Bala,
da zɔ' ya dabeem la sɛba n zɛrɛgerɛ ya.
Sɛla ka boe te ba vuge ge kan vuke bii ba sogɛ sɛla te la kan yehe na.
27 Sɛla te mam yɛta ya lika poan,
tɔgɛ ya dɛ wontɛɛŋa poan.
Sɛla te ya wom te ba waahom,
zom ya gɔhɔgɔ voole te nɛreba wom.
28 Da zote ya nɛreba n wan nyaŋɛ ko' ya,
ge ba kan ta'an ko' ya sɛɛhe.
Zote ya se'em n wan nyaŋɛ sagom ya iinhe la ya sɛɛhe zan'an namehegɔ poan.
29 Ba ta'an da niiŋbibihe seyi' kɔbega,
ge niihe sena wa kayema ka lutɛ teŋa,
te ya Sɔ' Na'ayenɛ mina.
30 Ho zuo zonto tare kaanlɛ mɛ.
31 Bala,
da zote ya dabeem te ya gane niiŋbibihe kekeko.
32 Nɛra han ze'ele nɛreba teŋasoka yeti a dela mam nɛra,
mam me wan eŋɛ bala n Sɔ' n boe saazuo ha nɛŋan.
33 Ge se'em han ze'ele nɛreba teŋasoka yeti a dagɛ mam nɛra,
mam me wan eŋɛ bala n Sɔ' n boe saazuo ha nɛŋan.
34 Da tɛn'ɛhe ya te mam tare la nɔyenɛ wa'an teŋa wa zuo na.
Mam ka tare nɔyenɛ wa'ana ge zaberɛ so'a te mam tare na.
35 Mam wa'ana te n bahɛ te dayɔa n zabera ka sɔ,
te pugula me zabera la ka ma,
te pɔka me zabera la ka dayaama.
36 Nɛra dima dela a yiren nɛra.b
37 Se'em woo n nɔŋɛ a sɔ bii a ma gana mam ka nare te a dɛna mam dɔla.
Se'em woo n nɔŋɛ a dayɔa bii a pɔyɔa gana mam me ka nare te a dɛna mam dɔla.
38 Se'em n ka sakɛ te a dekɛ a punpuuredɔɔ zi' doohe mam ka nare te a dɛna mam dɔla.
39 Bala,
se'em woo n bote vom wan ki',
ge se'em woo n wan ki' mam zuo,
wan vɔna.
40 Le yɛ'ɛha,
se'em woo n to'e ya,
to'e la mam.
Ge se'em woo n to'e mam,
to'e la se'emdaana n tom mam na la.
41 Se'em woo n to'e Yenɛ nɔtɔgɔha te a de nɔtɔgɔha zuo,
wan lagom nyɛ' nɔtɔgɔha yɔɔrɛ.
Ge se'em woo me n to'e tontɔɔ nɛra,
te a de tontɔɔ la zuo,
wan lagom nyɛ' tontɔɔ nɛra yɔɔrɛ.
42 Se'em me han dekɛ ko'ma'ahega bo se'em n pɔ'ɛ mam nɛreba wa poan te a de mam dɔla zuo,
wan to'e a yɔɔrɛ.