Kɛleha, gbegema n bala kaaha Yuda teŋa mɔen
11
1 Lebanon teŋa wa, yu'ɛ ho kolehe wa, te bugum di ho mɔlɔsomɔ tiihe wa. 2 Peelesomɔ tiihe wa, kaahɛ ya mɛ. Se'ere n sɔe la, mɔlɔsomɔ tia la lu ya. Basan tiihe kanra wa, kaahɛ mɛ. Se'ere n sɔe la mɔɔ seko n kpanrɛ la di ya. 3 Kɛleha, duŋkeema n bala kaaha ba yaama zen'soŋa la n sagom la zuo. Kɛleha, gbegema n bala kaaha Yuda teŋa mɔen la n sagom la zuo.4 Na'ayenɛ la n de mam Yenɛ la yeti, Dɛna duŋse'ehe n maahom yɛ'a kum wa behera. 5 Se da'areba la ne da se ta ko mɛ, ge ka nyɛta namehegɔ, te sɛba me n koohere ba la yɛta te, n bo Na'ayenɛ fara, la mam n tare wa. Duŋkeema wa mɛŋa ka zote se ninbɔn'ɔn. 6 Na'ayenɛ yeti, Mam kan le zɔ teŋa wa zuo nɛreba ninbɔn'ɔn. N wan eŋɛ ba, te nɛra woo tuluge lu a tadaana nu'uhen, n wan eŋɛ ba te nɛra woo lu naba nu'uhen, te sagaŋɔ sige teŋa wa zuo na, ge n kan fan' ba bahɛ.
7 Bala te mam dɛna duŋse'ehe te da'areba la da'ara kena koora la daana. Segɛ dɔya ayi' la te n tara dɔla n piihe la yu'ura yeti, Asuguru la Anɔyenɛ. Dɔya ana te mam tara dɔla n piihe wa. 8 Ŋmareyeŋɔ poan, te mam dige duŋkeema ba tan' la. Se'ere n sɔe la, mam din'inhe suunre la ba koŋe mɛ, te ba me tona sɛla te n ka bɔta. 9 Te mam yeti, N kan le keem ya. Bahɛ te sɛba n wan ki la ki, te sɛba n wan sagom la sagom, te sɛba n yee la obe taaba.
10 Te mam dekɛ n dose'ere yu'urɛ n de Asuguru la, kɔ' bahɛ, luke n nɔse'ere te n biŋe la nɛreba woo la. 11 Nɔɔrɛ la lukire daarɛ n daa bala, te sɛba n da'are piihe la n ze' beha mam la, baŋɛ te la dela Na'ayenɛ yelehom.
12 Te mam yele ba yeti, Ya han behɛ te la nare, yɔ ya mam. La han ka nare, tare ya. Te ba magahɛ sanlenpeela pihitan' te la dɛna ban yɔ mam se'em n bala. 13 Te Na'ayenɛ yele mam yeti, Dekɛ ligise'a te ba yɔ hɔ wa lobe bahɛ yagombaha la, te mam dekɛ ligiri la lobe yagombaha la n bo Na'ayenɛ yire la poan.a 14 Te mam dekɛ n dose'ere n yi'ire Anɔyenɛ la kɔ' bahɛ, pa'ala te Na'ayenɛ saalom sanɛ se'ere n dole Yuda, la Israeldoma la bahɛ mɛ.
15 Te Na'ayenɛ yele mam yeti, le lebege duŋkeena sɛka n ka tare zuo. 16 N bo la duŋkeena yore sore, teŋa wa poan, se'em te piihe la bɔrɔgerɛ ka daana en, se'em n ka eere pi se'ehe n tuune la, bii a tebera sɛba n bɛn'ɛnre la, bii a bɔ'ɔra se'ehe n tare iŋma'ahom la di soŋa. A ton ɔbera la pekanra la, ta'ara ba to'feenna.
17 Mam duŋkeenyore wa, duŋkeensɛka n zagahɛ mam piihe wa. So'a aanhegɛ a nu'o, ge kpekɛ a zuɔ niho. A nu'o baanlom yula, te a zuɔ niho seren fɔ zan'an zan'an.