2
1 Te mam behɛ saazuo ha, nyɛ te boraa zanle dibesɛka te ba tara magaha la a nu'en! 2 Te mam soke en yeti, Hom ye' la bɛ? Te ka lebehe yele mam yeti n ye' te n ta magahɛ la Yerusalem teŋa wa, la n behɛ ka yaleŋa la ka woko n zone se'em. 3 Bilam te Na'ayenɛ soŋora se'em n tɔgɔre ne la mam la, kena tɔla nɛŋa, te soŋora ayema me to'oha en na, 4 nya yele en yeti, Zɔ mɛ lebe ta yele boraa la yeti Yerusalem wan dɛna teŋa te dangoone ka kae ka la. Se'ere n sɔe la nɛreba la dunhe kekeko wan perɛ ka gaŋɛ. 5 Mam mɛŋa wan dɛna bugum dangoone kae ba, ge te n soŋa nɛɛ bɔna ba teŋasoka. Na'ayenɛ yele se'em n bala.6 Na'ayenɛ yeti, Ihege ya! Ihege ya! Ɛnkɛ zuɔ bɔba teŋa wa poan wa yehe, mam yeregɛ ya bahɛ sabeeo wa zuo. Na'ayenɛ yele se'em n bala. 7 Ziondoma, zɔ ya! Yamam sɛba n kɛn'ɛre Babilon wa, zɔ ya! 8 Se'ere n sɔe Pɛɛntɛɛnreba Na'ayenɛ yele mam te a soŋa la zuo, a tom mam te n namehɛ teŋse'ehe woo n fan' ya la. Se'em woo n kalom ya suke la enŋa Na'ayenɛ niho. 9 N wan namehɛ ba te ba mɛhe yamehe tuluge fan' ba, te ya wan baŋɛ te Pɛɛntɛɛnreba Na'ayenɛ la n tom mam na.
10 Zion, yoona, ge nyeena. Se'ere n sɔe la n ye' na te n bɔna mɛ la hɔ. Na'ayenɛ yele se'em n bala. 11 Teŋhe zo'e zo'e wan dekɛ ba mɛhe lagom la Na'ayenɛ de daarɛ, dɛna Na'ayenɛ nɛreba. N wan bɔna ya, teŋasoka te ya baŋɛ te Pɛɛntɛɛnreba Na'ayenɛ la n tom ma ya zen'an na. 12 Na'ayenɛ wan sɔna Yuda teŋa la, fa'a teŋa la poan, ge le loe Yerusalem. 13 Nɛresaala woo ana baanlam Na'ayenɛ nɛŋan, a vaɛ ihege mɛ a fa'a bɔŋa zen'an la poan mɛ.