Yamam mi' sɛla n de yelemɛŋɛrɛ, ge ya yaɛ som ge nɔŋɛ be'emdoma wa
3
1 Te mam soke yeti, Yamam sɛba n behere Israel teŋa wa, yamam mi' sɛla n de yelemɛŋɛrɛ, 2 ge ya yaɛ som ge nɔŋɛ be'emdoma wa. Ya aanhene la nɛrevɔɔhe gana, lagara ba nɛnɔ ge baha konba. 3 Ya obere la Na'ayenɛ nɛreba, aanhena ba nɛnɔ, ge kɛ'ɛra ba konba wo ya yeti ya dogɛ me la. 4 Yan ete bala la, ya han ta kaahɛ bo Na'ayenɛ a kan kelehe ya. Se'em ma'an te ya ta kaaha bɔ'ɔra Na'ayenɛ la, a wan ŋmɛregɛ a nɛŋa bahɛ zen'an ha, ya be'em sebo te ya tom la zuo.5 Na'ayenɛ n tɔgɔre yelese'a bahera nɔtɔgɔheba sɛba n parone wa zuo n wana. Sɛba n pan'ahe mam nɛreba la te ba bɔregɛ la. Se'em ne han bo ya dia, ya ne kan' la iŋma'ahom bo a daana, a han ka eŋɛ bala, ya ne maahom la zaberɛ dɔla en. 6 Bala zuo, ya ne wan gan'anrɛ yu'uŋɔ ge kan nyɛ' liligere yelese'ere poan. Ya wan bɔna lika poan ge kan baŋɛ sɛla, yenɛ wan ta lu te la sobege gbarete. 7 Sɛba n nyɛte liligere la zuto wan fakɛ, te vi di bakolo bogoreba. Ba zan'an zuto wan sura teŋa, se'ere zuo, lebehegɔ kan ze'ele Na'ayenɛ zen'an na bo ban yeti sɛla wan enŋ la. 8 Ge han dɛna mam, Na'ayenɛ sea la paŋa n perɛ mam la yelemɛŋɛrɛ, la kpe'eŋo, te n pa'alɛ Yakob a tuure, ge yele Israel me a yelebe'ero.
9 Bala kelehe ya. Yakob yire nɛŋadoma wa, Yamam sɛba n behere Israel teŋa wa, yamam sɛba n zagahɛ yelemɛŋɛrɛ, ge tona ŋmɛlema wa, 10 yamam sɛba n mɛte Zion n de Yerusalem teŋa la la nɛreba ziim, la toonfɛn'ɛha la. 11 Ka keendoma la ne to'e la mu'ure, ge gankɛ yele, te ka malemadoma la pa'ala ba yɔɔrɛ zuo, te a nɔtɔgɔheba la me tɔgɔra yelesoma ma'an ban to'ohe ligiri la zuo. Ge ne lebe na dɛla Na'ayenɛ, ge tara te Na'ayenɛ ka boe me la to yoi? Namehegɔ kan sige tomam zuo na. 12 Bala zuo, yamam n ane se'em la zuo, Zion teŋa wan saalom gan'an wo samanɛ la. Yerusalem teŋa wan lebege tampogerɛ. Yenɛ Yire la n yage zoore se'ere zuo la wan yu' la tuntuuro.a