N wan saalom se yu'ura teŋparɛ wa zuo bahɛ
9
1 Te mam nyɛ zaanheŋɔ poan te Daana zɛ'a kaanbegɔ bimbine zen'an ge yele mam yeti, Ŋmɛ' zɛnya la n gorɛ yire la tara la, te de gbirige lu ko nɛreba la n boe ko poan la, sɛba n gee ka ki la, n wan ko ba zaberɛ poan, ba ayena kan zɔ peɛn. 2 Ba han pon tun' sige teŋa teŋa ha, mam nu'o wan paɛ ba bilam ve'e ba na. Ba han pon zom saa zuin zuin ha, n wan ve'e ba bilam bahɛ na. 3 Ba han pon zom Karmel zoore zuo ha ta sogɛ, n wan zom ta sa'ahɛ ba nyɔkɛ ba. Ba han pon le'ehɛ mam ta sogɛ ko'kantɛ teŋa teŋa ha, n wan bo kanpɛn'a nɔɔrɛ te a dum ba bini. 4 Ba diŋdoma wan zabɛ nyaŋɛ ba tare keŋɛ ba teŋa ha, ge la bala zan'an, n wan bahɛ te ba kɔrom ba. N wan dekɛ ba tuunle be'em ma'an te som kan bɔna la ba. 5 Daana Pɛɛntɛɛnreba Na'ayenɛ la, wan ta'an kalom teŋparɛ wa te ka nyɛlegɛ, te sɛba woo n boe ka zuo kɛla la. Se'emdaana n wan ta'an bahɛ te teŋa wa uke ta tanhɛ wo Mizraim teŋa Nile Kolaa n ne wan perɛ ɔlegɛ ge gee se'em la. 6 Se'em bɔŋa zen'an n boe saazuo ha, te teŋparɛ wa dɛna a ɛnberɛ la, se'em n kan'aherɛ ko'kanra, tare bɔ le ka'aha baha teŋparɛ wa zuo na la, a yu'urɛ n de Na'ayenɛ.7 Israeldoma wa, yamam boe la ya yema la Kusdoma mam nɛŋan yoi? Dagɛ mam n tare ya ze'ele Mizraim teŋa poan yehe na? Ge tare Pilistidoma me ze'ele Kaptor teŋa yehe na? Tare Aramdoma me ze'ele Kir teŋa yehe na? Na'ayenɛ n yele. 8 Yelemɛŋɛrɛ, Daana Na'ayenɛ nini mɔ'ɛ mɛ la toonbe'ero teŋhe la. N wan saalom se yu'ura teŋparɛ wa zuo bahɛ, ge n kan ba' sagom Yakob buuri la. Na'ayenɛ yele se'em n bala. 9 Behɛ, n wan bo n nɔɔrɛ, ge kpa'ahɛ Israel buuri woo n boe teŋse'ehe woo poan la, wo bɛrehe biile n kpa'ahere se'em la, ge ba ayena me kan lu teŋa. 10 Israeldoma woo n de toonbe'erodoma lagom bɔna la mam nɛreba la wan ki zaba poan, sɛba woo n yeti too kan malom paɛ to la zan'an wan mɛlom.
N wan malom mɛ David yire la n lu la ze'ele
11 De daarɛ, n wan malom mɛ David paka la n lu la ze'ele. N wan malom maalɛ de zen'an n sagom la, malom mɛ dɛ wo denɛ n yuum pon ana se'em la, 12 te ba nyaŋɛ sɔe Edom teŋa, la teŋse'ehe woo te mam yu'urɛ bɔna se poan la sɔna. Na'ayenɛ n wan ta'an tom yele ana wa la tɔgɛ.a
13 Na'ayenɛ yeti, Dabeha kena na, te se'em n kɛ'ɛre dia wan kɛ' bala ta paɛ kɔa le yɛ'ɛha, te se'em n buni dia me bum ta nyɔkɛ borega. Daampaalom mɛŋa wan ze'ele zoore zuo bula na, zɔya la zan'an wan bula la daam ma'an.
14 N wan tare n nɛreba Israeldoma wa te ba pɛnregɛ ba yehe keŋɛ la lebe na, te ba malom mɛ ba teŋa la n lebege daboo la kɛn'ɛra ka poan. Ba wan malom sɛ dia tiihe, nyu' se wɔla daam, ge burɛ vatɔ di to poan dia. 15 N wan sɛ Israeldoma ze'ele ba mɛŋa teŋa la poan, te sɛla kan le ta'an voon ba teŋsɛka te mam dekɛ bo ba la poan. Na'ayenɛ ya Yenɛ la n tɔgɛ.