Amos 5

Da eere ya Betel la Gilgal teŋhe yena la

1 Israeldoma wa kaahega sɛka te n yeti n kaahɛ bahɛ ya zuo wa. 2 Israel n de pɔgɔsa'a kanherɛ la lu mɛ kan ta'an ihege. Israel gan' mɛ a mɛŋa teŋa, te se'em ka bɔta en. Se'em ka boe wan soŋɛ en te a ihege.

3 Daana Na'ayenɛ yeti, Teŋsɛka n dekɛ pɛɛntɛɛnreba tuhure soŋɛ Israel zaberɛ poan, teŋkaŋa pɛɛntɛɛnreba la kɔbega ma'an n wan gee. Teŋsɛka me han dekɛ pɛɛntɛɛnreba kɔbega soŋɛ Israel zaberɛ poan, ka pɛɛntɛɛnreba la pia ma'an n wan gee.

4 Na'ayenɛ yeti, Israeldoma wa, ɛ ya mam la ya nyɛ vom. 5 Da eere ya Betel la Gilgal teŋhe yena la, da lebe ya Beerseba teŋa. Gilgal teŋa nɛreba wan zɔ yehe Gilgal teŋa la poan. Betel teŋa wan sagom zan'an kan dɛna sɛsɛla. 6 Ɛ ya Na'ayenɛ nyɛ vom. Han dagana bala, A wan doohe Yosef yire la poan zan'an di de piihe wo bugum n dite piihe se'em la, a wan di te Betel kan nyɛ se'em n wan kiinhe bugum la. 7 Ya dela sɛba n bahɛ te yelemɛŋɛrɛ lɛbɛgera gɔn'ɔhe, ka bɔta te ya niho nyɛ tontɔɔ bɔŋa la fiin me la.

8 Se'em n maalɛ ŋmarebibihe wa la, ge bahera te lika lɛbɛgera nɛɛhom la, se'em n bahera te yenɛ luta la, se'em n ne yi ko'kanra lagahɛ, bahɛ te bɔ ka'ɛ bahɛ teŋa wa zuo na la, a yu'urɛ n de Na'ayenɛ. 9 Enŋa n tan' sagona panhedoma, ge bahera te pɛɛntɛɛnreba bɔŋa zen'enhe gan'an vɔya. 10 Se'em n yele ho yelemɛŋɛrɛ yetɔgom deo poan dela ho diŋdaana, ya ka bote se'em n tɔgɔre yelemɛŋɛrɛ. 11 Ya zom la taromdoma zuo nɛɛra, pɛnregera ba te ba yɔɔra ki konberɛ kanra bɔ'ɔra ya. Bala, yan pon dekɛ kuga mɛ ya yikanra se'a la, ya kan kɛn' a poan. Yan pon ma'ɛn ya mɛhe sɛ tiihe va'am kanra la, ya kan nyɛ se wɔla daam nyu'. 12 Se'ere n sɔe la, mam mi' ya tuure n zo'e se'em, te ya toonbe'ero n zone se'em. Ya namehere nɛre tontɔɔdoma, ge tɔ'ɔha mu'ure, ge faanra nahadoma yelemɛŋɛrɛ yetɔgom deto poan. 13 Bala, yamdaana ane baanlam saŋkana taaba poan. Se'ere n sɔe la ka dela be'em saŋa. 14 Ɛɛra som, ge bahɛ be'em, bala te ho wan tara vom. Bala te, Na'ayenɛ n de Yenɛ dɛna Pɛɛntɛɛnreba Nɛŋadaana la wan bɔna la ya wo yan yele se'em te a boe me la ya la. 15 Kihi ya be'em, ge nɔŋɛ som, bahɛ ya te yelemɛŋɛrɛ bɔna yetɔgom deto poan. Daanse'ere Na'ayenɛ n de Yenɛ dɛna Pɛɛntɛɛnreba Nɛŋadaana la wan zɔ Yosef buuri wa n gee fiin wa la ninbɔn'ɔn.

16 Bala, Daana Na'ayenɛ n de Yenɛ, dɛna Pɛɛntɛɛnreba Nɛŋadaana la yeti, Koonɔ wan bɔna sɔrɔtɔ woo zuto, te namehegɔ la fabelegɔ bɔna nɛreba n zin' zen'an woo poan. Ba wan lagahɛ kaareba na te ba kele, ge yi sɛba n mi' koonɔ na te ba fabelɛ. 17 Koonɔ wan bɔna ya tiihe vatɔ poan. Se'ere n sɔe la, mam yeti n damɛ la ya poan tole. Na'ayenɛ n yele.

18 Yele boe yamam sɛba n gure Na'ayenɛ dabaherɛ wa la zuo. Bene zuo te ya gura Na'ayenɛ dabaherɛ wa? De dɛna la lika ge dagɛ nɛɛhom. 19 De wan ana wo nɛra n zɔ gbegenɛ nɛŋan ta lu dea nɛŋan la, bo asaala. De wan ana wo nɛra n paɛ a yire te a vo'ohe, dekɛ a nu'o pagalɛ dangoone zuo te kanpɛn'a dum en la. 20 Na'ayenɛ dabaherɛ la ka yeti de dɛna la lika ma'an te nɛɛhom la fiin me kan bɔna? Sobege te pɔe kan bɔna? 21 Mam suunre nyie mɛ la ya de'enɔ la, n ka bote ba. N kan bote ya lagaŋɔ la saŋa la. 22 La yan pon tara nyɔ'an bo'olom la boom bo'olom kena na bɔ'ɔra mam la, n kan to'e ba. La yan ne gaŋɛ dunhe sonhe na bo ya sunma'ahom bo'olom la, mam ka behere ba. 23 Tare ya yooma voole wa keŋɛ. Mam kan kelehe ya kɔnlɔ yooma la. 24 Ge yeem bahɛ ya te yelemɛŋɛrɛ zɔta wo kolaa ko'om la, te tontɔɔ vom bɔna ya poan wo kolega zɔta ka malom keenha la. 25 Israeldoma wa, yamam n yuum boe pɔgɔtia la poan yuuma pihinaahe la, ya yuum ka bo'ore mam la kaanbegɔ bii boom bo'olom. 26 Ge ya ziire la ya bagarɛ, na'aha ya ŋmarebila bagarɛ la te ya maalɛ bo ya mɛŋa la. 27 Bala, n wan bahɛ te ba nyɔkɛ ya keŋɛ Damaskus. Na'ayenɛ n de Yenɛ la, dɛna Pɛɛntɛɛnreba Nɛŋadaana la n yele.