<<    <     Daniel     8     >    >> 
Daniel zaanhom n zaanheŋɔ n ane wo yia zaanheŋɔ la
8
1 Belsazar na'am dia yuuma atan' poan te mam Daniel zaanhom n zaanheŋɔ n ane wo yia zaanheŋɔ la. 2 Te mam beha zaanheŋɔ la poan, te mam boe la Susa teŋkantɛ n boe Elam teŋa sɔ'ɔlom poan la. Te mam behɛ zaanheŋɔ la poan te mam ze' lɛm la Ulai bɔka la nɔɔrɛn. 3 Te mam gorege behɛ, mam yeti n behɛ te peraa n tare iila ayi' ze' bɔka la nɔɔrɛn. Te iilɛ se'ere n wɔgɛ gana la puhe pooren na. 4 Te mam nyɛ te peraa wa gbirigera zanɔya, zuɔ la gɔbega, te duŋa ka bɔna wan ta'an gu' ka, bii ta'an to'e sɛla a zen'an bahɛ. Te ka eta kaŋa n bote se'em, pa'ala ka mɛŋa.
5 Mam behere zaanheŋɔ la poan la, mam yeti n behɛ te botela n ze'ele nɛŋa na, ka kalona teŋa, ge pin' teŋparɛ wa zan'an kena na. Te boa wa tara iilɛ ka gbe'ere teŋasoka, te iilɛ la ka lile. 6 Te botela wa wa'ana paɛ peraa wa n tare iila ayi' zɛ'a bɔka la yakenɛ te mam nyɛ zaanheŋɔ la poan la, zɔ uruge peraa wa la a sunsunyiim zan'an. 7 Te mam beha, te a kaara peraa wa la sunsunyiim. Te a ŋmɛ' peraa wa, kɔ ka iila ayi' la zan'an, te peraa wa ka le tara paŋa wan ze'ele la botela wa. Te botela wa uruge peraa wa ta biŋe teŋa, nɛɛra ka la a na'ma, te sɛla ka bɔna wan ta'an to'e ka botela wa zen'an bahɛ. 8 Wana zuo te botela wa zɛnkɛ ka mɛŋa ta ba' gaŋɛ. Ge botela wa n ta lebege paŋa zan'an daana ba'ahɛ la, ka iilɛ kantɛ la kɔ' mɛ, ge te iila anaahe tee yehe bini na, ka lile, tɔɔra teŋa wa loga woo.
9 Te iila anaahe wa poan, iilɛ deyema puhe iilɛ bila, te iilɛ bila wa ta kanregɛ, yɛ'a gɔbega la dapɔya ge tɔɔra teŋsoŋa la poan. 10 Te iilɛ dena wa wɔgɛ ta paɛ saazuo lɔgɔrɔ wa, bahɛ te saazuo nɛreba basɛba la ŋmarebibihe lu na te a nɛɛra ba la a na'ma. 11 Te iilɛ wa ta dekɛ de mɛŋa makera la se'em n de saazuo lɔgɔrɔ wa Daana la, ta to'e daarɛ woo kaanbegɔ la n tare bɔ'ɔra saazuo lɔgɔrɔ wa daana la zen'an, ge bahɛ te a Toolom yire la lebege zen'bila. 12 Doohe la be'em zuo, saazuo lɔgɔrɔ wa, la daarɛ woo kaanbegɔ la wan dekɛ bo iilɛ wa, te de dige yelemɛŋɛrɛ bahɛ, ge tona de yam bote se'em ge kpe'em.
13 Te mam wom te Yenɛ soŋora ayema tɔgɔre, te mam wom te Yenɛ soŋora ayema me sɔkera se'em n tɔgɔre la yeti, La wan yuue la wane ge te daarɛ woo kaanbegɔ wa, la be'em wa n bahere te Yenɛ bɔŋa zen'an wa la a toolom nɛreba wa te ba nɛɛra ba wa wa'ana tom? 14 Te a yele mam yeti, dabeha tuha ayi' la dabeha kɔbehe setan', toolom zen'an wa wan malom mɛ soŋa.
15 Mam Daniel n nyɛ liligere wa la, mam zegere mɛ te n baŋɛ de vɔnrɛ. Mam yeti n behɛ te sɛla n ane wo asaala la zɛ'a mam nɛŋan. 16 Te mam wom boraa konkore Ulai bɔka la nɔgbenen te de yi' yeti, Gabriel, pa'alɛ boraa wa liligere la vɔnrɛ. 17 Te a paɛ mam ze' zen'an la na. N lɛm mam na la, dabeem n kɛn' mam te mam lu aliko, te a yele mam yeti, Asaala wa, mina te zaanheŋɔ wa pa'ale la ba'ahegɔ saŋa. 18 N tɔgɔre bɔ'ɔra mam saŋsɛka la, mam ginhere la gɔɔm kantɛ, te mam nɛŋa kpanbɛ teŋa, te a kalom mam, bahɛ te mam ihege ze'ele dɔ'ɔ.
19 Te a yele mam yeti behɛ, n wan bahɛ te ho baŋɛ sɛla n wan eŋɛ ba'ahegɔ saŋa la, sunsunyiim saŋa la poan. Se'ere n sɔe la la pa'ale la ba'ahegɔ saŋa la n bala. 20 Peraa la te ho nyɛ te ka tara iila ayi' la pa'ale la Media la Persia nadoma. 21 Botela la me ze'ele bo la Greek teŋa sɔ'ɔlom, te ka iilɛ la n boe ka gbe'ere teŋasoka la dɛna Greek yia naba. 22 Iilɛ kantɛ la n kɔ la, la iilɛ bibihe anaahe la n tee puhe na la pa'ale la a sɔ'ɔlom la n wan yelehe bonaahe se'em, te ba paŋa kan zona la yia sɔ'ɔlom la.
23 Nadoma banaahe wa saŋa han ta ba'aha, be'em wan ta gaŋɛ, te naba kayema me ihege na toore ge dɛna ŋmɛlema daana. 24 A wan ta kpe'em, ge la dagɛ a mɛŋa ma'an paŋa. A wan sagom ta gaŋɛ, panrɛ, tona a suunre n bote se'em. A wan ko nɛrekanreba la Yenɛ nɛreba. 25 A wan dekɛ a yam kerega la pan'ahegɔ tona doohe la a paŋa poan. A wan zɛnkɛ a mɛŋa a suunre poan. A wan sagom nɛreba kekeko n boe bɔna fai. A wan pon pagara la Nadoma Naba wa. Ge a wan wɔnrɛ te asaala nu'o ka kalom en. 26 Dabeha wa zaanheŋɔ la te ho nyɛ la dela sera, ge sogɛ zaanheŋɔ la digi digi. Ko pa'alɛ la beere ha, dabeha la n wan zaan se'em ge nya paɛ.
27 Te mam Daniel iŋa kɔ'ɔhɛ, te mam bɛn' dabeha. Te mam le ta ihege le pɔhɛ n naba tooma la, te zaanheŋɔ la eŋɛ mam pakerɛ, te se'em ka bɔna wan pa'alɛ ko vɔnrɛ.