<<    <     Daniel     4     >    >> 
A yɛla la kanregɛ mɛ
4
1 Mam Naba Nebukadnezar mɔɔlegɔ n wana bɔ'ɔra saaleba, teŋhe la se nɛreba la buuri woo n boe teŋparɛ wa zuo wa. Sunma'ahom bɔna la ya. 2 La ane soŋa bo mam te n yele Saazuo Daana wa n tom som sebo bo mam la. 3 A yɛla la kanregɛ mɛ, te a nyalematooma la ka tara makerɛ. A sɔ'ɔlom ka tare ba'ahegɔ, te a dɛna naba buuri saŋa woo poan.
4 Mam Nebukadnezar wa zin'an la n na'am yire poan fai, eta mam bote se'em. 5 Ge mam wa zaanhom mɛ te zaanheŋɔ la kɛn'ɛhɛ mam dabeem. Te mam gan' an soŋɔ zuo ge nyɛta liligere se'ere la bɔ'ɔra mam paleŋ'ɛnka. 6 Te mam bo nɔɔrɛ yeti, yamdoma la woo n boe Babilon teŋa wa poan la wa'an n nɛŋan na la ba pa'alɛ mam zaanheŋɔ wa vɔnrɛ. 7 Te tiimdoma la behereba la Kaldeadoma la ninidoma lagahɛ na, te mam pa'alɛ ba n zaanheŋɔ la, ge ba ka nyaŋɛ pa'alɛ ma ko vɔnrɛ. 8 Ge ba'ahegɔ zan'an, Daniel se'em te ba tee dekɛ mam bagarɛ yu'urɛ Beltesazar segɛ en te a kpe'em la n kɛn' na te mam yele n zaanheŋɔ la bo en yeti, 9 Beltesazar, tiimdoma nɛŋadaana wa, mam diŋɛ mina te yenɛ kanra wa paŋa boe mɛ la hɔ, yele n sogɛ ka boe te ho kan bɔkɛ. Yele mam n zaanheŋɔ la la ko vɔnrɛ n de se'em.
10 Mam gan' n soŋɔ poan ta zaanhom se'em n dela, mam behere mɛ, ta yeti n behɛ te tia ze' teŋparɛ wa teŋasoka wɔgɛ ka tara pa'alegɔ. 11 Te tia wa kanregɛ ta kpe'em, te ka woko paara saŋgbanɛ wa. Te ka zɛ'a te teŋparɛ wa zen'an woo nyɛta ka. 12 Te ka vɔntɔ ana soŋa, te ka wom velegɛ, tara dia bɔ'ɔra sɛla woo. Te mɔen dunhe kena ka ma'ahom la poan vɔ'ɔha, te niihe n ɛngere saazuo kɛn'an zen'enhe bɔna ka yila la poan. Te bonvɔa woo dita ka poan.
13 Te mam gan'an n soŋɔ wa poan nyɛta zaanheŋɔ wa, mam yeti n behɛ te Yenɛ soŋora n bala ze'ele saazuo sigera na. 14 Te a tanhera yeti, Lobɛ ya tia wa la ya ŋma ka yila bahɛ. Faanrɛ ya ka vɔntɔ la bahɛ, ge wobe ka wɔla la yeregɛ bahɛ. Bahɛ te mɔen dunhe la yeregɛ ka tilin la, ti niihe la ɛnkɛ ka yila la poan keŋɛ. 15 Ge bahɛ ka tile la te ka nyɛga la kelom bɔna teŋa ha. Ge dekɛ ya kuto la nyɔgom zɔnrɔgɔ ba' tile la te de zɛ'a mɔpɔlɔgɔ la n puhure bɔn'en la. Bahɛ ya te mɛgelom luta ka zuo, te ka bɔna la mɔen dunhe. 16 Bahɛ te asaala potɛn'ɛrɛ la yehe a poan ge te duŋa potɛn'ɛrɛ tee kɛn' en. Bahɛ te a ana bala te yuuma ayopɔe wa'ana tole. 17 Yele ana te Yenɛ soŋoreba la tɔgɛ. Fa'a daana la potɛn'ɛrɛ n bala, te vɔpa woo baŋɛ te Saazuo Daana wa n sɔe asaala la sɔ'ɔlom woo beha. Enŋa n bote se'em te a dekɛ bɔ'ɔra. A dekere bɔ'ɔra la se'em n sigehe a mɛŋa.
18 Mam Naba Nebukadnezar zaanheŋɔ la n bala te n zaanhom la. Bala nananawa, hom Beltesazar, yele mam zaanheŋɔ wa vɔnrɛ. Se'ere n sɔe la, yamdoma wa woo n boe mam sɔ'ɔlom wa poan wa, ba ayena me ka nyaŋɛ yele mam zaanheŋɔ wa vɔnrɛ. Ge hom wan nyaŋɛ. Se'ere n sɔe la yena la paŋa n boe hom poan.
19 Te Daniel wa yu'urɛ deyema n de Beltesazar yee suram ge tɛn'ɛha. Te naba wa lerege yeti, Beltesazar, da bahɛ te zaanheŋɔ wa bii ko vɔnrɛ la maam hɔ. Te Beltesazar wa lerege naba wa yeti, N daana, zaanheŋɔ wa nare ne la sɛba n yaɛ hɔ, te ko vɔnrɛ nare ne ho bɛ'ɛba. 20 Tia la te ho nyɛ te kanregɛ tara paŋa, wɔgɛ paara saŋgbanɛ wa, te teŋparɛ wa zen'an nyɛta ka, 21 te ka vɔntɔ ana soŋa, te ka wom velegɛ te ka diiha sɛla woo, te mɔen dunhe gan'an ka tilin, te niihe n ɛngere saazuo gan'an ka yila la zuo la. 22 Ka dela hom naba. Se'ere n sɔe la, ho dela nakantɛ, kpe'em te ho na'am paŋa la paɛ zen'an woo. Te ho paŋa la sɔna teŋparɛ wa logorɛ woo beha. 23 Zaanheŋɔ la poan la, ho nyɛ la soŋora n ze'ele saazuo sigera na ge yɛta yeti, Ŋmaɛ ya tia la bahɛ sagom ka, ge bahɛ ka tile la ka nyɛga la n sige teŋa la, ge ya dekɛ kuto la nyɔgom zɔnrɔgɔ ba' dɛ bahɛ bɔn'ɔn poan te mɔpɔlɔgɔ la puha na la, te mɛgelom luta a zuo, te a bɔna la mɔen dunhe ta paɛ yuuma ayopɔe.
24 Naba, zaanheŋɔ la vɔnrɛ n bala, Saazuo Daana la n bo nɔse'ere n bala te de sige hom n daana naba zuo. 25 A wan dige ho saaleba, la ho mɛŋa bɔŋa zen'an bahɛ te ho ta bɔna la mɔen dunhe mɔen ha, te ho dia dɛna yaama te ho ɔbera wo nii la, te mɛgelom luta ho zuo ta paɛ yooma ayopɔe, gura te ho ta sakɛ te Saazuo Daana la n sɔe asaala, la sɔ'ɔlom woo beha. A dekere bɔ'ɔra la se'em te a bɔta. 26 Zaanheŋɔ la poan la, ho wom nɔɔrɛ n bo te ba bahɛ tia la tile la la de nyɛga la. Bala pa'ale la ho han ta baŋɛ te Saazuo Daana wa n sɔe zan'an beha, ho sɔ'ɔlom la wan le lebe ho nu'uhen na. 27 Bala naba, mam kan'aŋɔ han wan ana soŋa bo ho, daanse'ere ho han wan kelom zin'an ho na'am gɔŋɔ la zuo, mam wan yeti, Ho ve'e ho mɛŋa yehe ho be'em poan, tona sɛla n ane soŋa. Ho ve'e ho mɛŋa yehe ho tuure poan zɔta nahedoma ninbɔn'ɔn.
28 Yele ana woo seren wa'ana sige Naba Nebukadnezar zuo mɛ. 29 La ta paɛ la ŋmarehe pia la seyi' poan daarɛ deyema te naba wa yaga a na'am yire la gɔhɔgɔ zuo Babilon teŋan. 30 Te naba wa tɛn'ɛhɛ bo a mɛŋa yeti, Dagɛ mam mɛŋa n mɛ Babilon teŋkantɛ wa te ka dɛna naba yire bo n na'am soŋa wa. 31 Yetɔgɔbɔna n boe naba la nɔɔrɛn la, te konkore ze'ele saazuo na yeti, Naba Nebukadnezar, wona soŋa. Zina wa, kpe'eŋo la yehe ho zen'an. 32 Yenɛ wan dige ho saaleba la ho bɔŋa zen'an bahɛ, te ho ta bɔna la mɔen dunhe, te ho dia dɛna yaama te ho ɔbera wo nii la te mɛgelom luta ho zuo ta paɛ yuuma ayopɔe, gura te ho ta sakɛ te Saazuo Daana wa n sɔe asaala la sɔ'ɔlom woo beha. A dekere bɔ'ɔra la se'em woo te a bɔta.
33 Bilam bilam te yelese'ere n wan sige Nebukadnezar zuo la sige a zuo, te ba dige en saaleba zen'an bahɛ, te a pɔhɛ ɔbera mɔɔ wo nii la, te a iŋa ma'alɛ la mɛgelom, te a iŋa kɔnberɔ ta ana wo niiŋa kɔnberɔ la, te a na'ɛɛnhe ana wo niiŋa na'ɛɛnhe la.
34 Ge saŋa la n ta ba'ahɛ la, mam Nebukadnezar gorege behɛ la saazuo wa, te mam potɛn'ɛrɛ lebe na, te mam pɛngɛ Saazuo Daana wa. Mam pɛngɛ mɛ ge na'ahɛ se'em n vɔe ka tara ba'ahegɔ wa. Se'ere n sɔe la, a na'am dela na'am n ka tare ba'ahegɔ. A sɔ'ɔlom boe mɛ buuri saŋa woo poan. 35 Sɛla woo n boe teŋparɛ wa zuo dela zaŋa a nɛŋan. A boe la saazuo ha, eta a potɛn'ɛrɛ n bote se'em bɔ'ɔra sɛla woo n boe teŋparɛ wa zuo, te se'em ka bɔna wan gu' a nu'o bii soke en yeti, Ho eŋɛ wana bo?
36 Mam yam n lebe mam poan na la, saŋkaŋa mea poan te mam na'am la kpe'eŋo la le dekɛ bo mam. Te sɛba n kan'ane mam la, la sɛba n de mam nɛrezura la pɔhɛ ɛɛra mam zen'an. Te mam le lebe zin'ire n na'am la poan, te yu'urɛ kantɛ n gane zan'an le dekɛ pa'ahɛ mam. 37 Nananawa, mam Nebukadnezar pɛngɛ ge zɛnkɛ, ge na'aha la saazuo naba wa. Se'ere n sɔe la, a tooma zan'an dela yelemɛŋɛrɛ te a sɔrɔtɔ zan'an dɛna ma'an. A ta'an sigehe sɛba n pa'ale ba mɛhe teŋa.