Te boraa wa tare mam yehe zenzakai la na
42
1 Boraa wa nya tare mam yehe zenzakai la na, n tɔ zuɔ nu'o bɔba la tare mam wa'an deto seto n boe Yenɛ Yire la zenzaka la pooren ha, n tɔ deto seto n mɛ bɔna zuɔ, 2 Deto tonɔ teŋa woko dela santira kɔbega, te to yaleŋa dɛna santira pihinuu. 3 Zɛ'ɛta fole se'ere n gan' dɛna poan zenzaka la, te ka yaleŋa dɛna santira pihiyi', la anuu la yakenɛ ha, tɔɔra dɔle zan'an la n dole kɛn'ɛra poan zenzaka la na, bɔ'ɔrɔ wa togolom taaba la bala sugumnɔɔren botan', 4 te dɔlɔga zen'en bɔna to poan la, te ka yaleŋa dɛna santira pia, te ka ko'olom dɛna santira kɔbega, te deto wa kolehe tɔ zuɔ bɔba. 5 Ge deto seto n boe zuin la, ana migihe. Se'ere n sɔe la, bemehego la di tonɔ mɛ gana teŋa deto la. 6 Deto wa mɛ togolom la sugumnɔɔren botan', ka tara zen'an wo, nyaŋa zenzaka la n tare zen'an se'em la, bala zuo, la yage la teŋa bɔ'ɔrɔ la zuo, bala ba ka ane wo deto seto n pɔhɛ la, bii seto n tagalɛ la. 7 Te dangoone mɛ kae deto wa yeŋa na, beŋe yeŋa zenzaka la, deto wa nɛŋa na, te de woko dɛna santira pihinuu. 8 Se'ere n sɔe la, deto wa n boe zenzaka wa yeŋa na la woko dela santira pihinuu mea, te deto seto n tɔ Yenɛ Yire la me woko dɛna santira kɔbega. 9 Te dɔlɔga zen'en ze'ele da poore bɔba nayaŋa la, dɔla yeŋa zenzaka la poan dɔla deto wa sea, kɛn'ɛra to poan na.10 Dɔlɔga zen'en wa yeleŋa du'ure mɛ la zenzaka la dangoone la. Gɔbega la me, tɔɔra bɔ'ɔrɔ la nɛŋa na, deto toseto me lame bilam, 11 te dɔlɔga zen'en me gan'an to nɛŋa tɔla, te deto tona wa wona la deto seto n boe zuɔ deto la, to woko, la to yaleŋa, la to sɛla woo, ton ze'ele se'em, la to kolehe la zan'an. 12 Bala, zan'an n ze'ele gɔbega la dɔla kɛn'ɛra deto wa poan na la dela dɔlɔga zan'an sɛka n ze'ele pooren bɔba puue na doohe dangoone la sea la.
13 A nya yele mam yeti, Deto seto n boe zuɔ, te seto me bɔna gɔbega tɔ Yenɛ Yire wa boe la to tɔka, tonɔ poan te malema nɛŋadoma la wan kɛn'ɛra dita fa'a kaanbegɔ dia la ge tara fa'a bo'olom la n de boom bo'olom, be'em kaanbegɔ bo'olom, la lebehe yɔ' bo'olom la biŋera. Se'ere n sɔe la, zen'kana dela fa'a zen'an. 14 Malema nɛŋadoma la han ne kɛn' toolom zen'enhe la na, ba ne da ze'ele ko poan yehe zenzaka la poan na, ge ba ne kɛn' bɔ'ɔ tona wa poan ta yɛɛhɛ fuseto te ba yɛ kɛn' tom kaanbegɔ tooma biŋe bini, se'ere zuo, futona dela toolom futo. Ba ne tee fuseto yɛ, ge nya ta'an yehe yeŋa na lɛna la nɛreba.
15 Boraa wa n magahɛ Yenɛ Yire la poan ba'ahɛ la, a tare mam doohe la nayaŋa sɛka n lebehe dapoore bɔba la yehe na, magahɛ Yenɛ Yire la bilam bɔba kae. 16 A dekɛ la dɔɔseko n tare magaha la makɛ bilam bɔba santira kɔbehe senuu. 17 Ge a ŋmɛregɛ makɛ zuɔ bɔba la me la dɔɔ la santira kɔbehe senuu. 18 Ge a makɛ gɔbega bɔba la me la dɔɔ la santira kɔbehe senuu. 19 Ge a makɛ nɛŋa tontɔɔ bɔba la me la dɔɔ la, santira kɔbehe senuu. 20 A doohe magahɛ Yenɛ Yire wa loga anaahe la zan'an mɛ. Te dangoone mɛ kae Yenɛ Yire wa, te de woko dɛna santira kɔbehe senuu, te de yaleŋa dɛna santira kɔbehe senuu, beŋe toolom zen'en la bahɛ ka tɔka, te zen'yoo la me bɔna ka tɔka.