Tuguho n kanregɛ ge tara kelompagehe te se konberɔ pɔnrehɛ ge wɔgɛ ana soŋa
17
1 Te Na'ayenɛ tɔgɛ bo mam yeti, 2 Asaala dayɔa wa, maahom solone dena wa, la ho dekɛ de te de dɛna makerɛ te ho makɛ bo Israeldoma wa. 3 Yele ba yeti, Daana Na'ayenɛ la n yeti se'em n wana: Tuguho n kanregɛ ge tara kelompagehe te se konberɔ pɔnrehɛ ge wɔgɛ ana soŋa, te ka ɛnkɛ wa'an Lebanon na. Wa'ana yagelɛ mɔlɔsomɔ tia zuo, 4 kɔ'ɛ tia la saazuo ha yile baanlega, tare lebe keŋɛ lɛbereba teŋa, ta sɛ kɔɔhereba la teŋa poan. 5 A dekɛ ya bon boola ta borɛ teŋsɛka poan n tare bugulugo. A borɛ en me lɛm ko'om wo tia sɛka n bote ko'om la. 6 Ka bule yehe na, lebege tia n ane giriga giriga, te ka yila la yure lebehe na, ge te ka yega me ka sige paɛ ge kɔ'ɔn bɔna ka tilin ka boe la bala, ten' yila te vɔn' man'aha ka zuo. 7 Ge te tuguho kayema me bɔna tara kelom pagahe kanra, te kɔnberɔ zo'e se poan. Tia la nya daa tɛn la nyɛga ka tilin, te a ze'ele kan sɛ zɛ'a zen'an la yakɛ zen'an kayema me ha, ge le yure a yila la me bahɛ a mɛŋa na, tɔ'ɔha ko'om. 8 Ba bore ka lɛm la ko'kantɛ zen'an te ka lebege tia n tare ninpeelom, ge wɔna dia.9 Yele ba yeti, Daana Na'ayenɛ la n yele se'em n wana: Tia la wan yuue? Ba kan vɔn' ka ge fanregɛ ka vɔntɔ la bahɛ yoo? Ka vɔn' paala la zan'an wan sɔe. Nɛreba fiin wa n wan vɔn' ka bahɛ te la ka tɔna. 10 Ba han pon le dekɛ ka ta malom sɛ zen'an, ka wan yuue me yoi? Saabeeokeŋɔ wa han ze'ele dapɔya bɔba lobe na, ka ku'e ka zi zen'an la me yoi?
11 Na'ayenɛ tɔgɛ bo mam yeti, 12 Yele Israeldoma wa n de pobiregadoma wa yeti, Ya ka min yele ana wa n pa'ale sɛla? Yele ba yeti, Babilon teŋa naba n ihege keŋɛ ta nyɔkɛ Yerusalem teŋa naba la a nɛŋadoma tare ba lebe Babilon teŋa poan na.a 13 A nya loe nabiihe la kayema bahɛ te a pɔ' ge te a eŋɛ sugure nɔɔrɛ la en, 14 ge me lagom nyɔgɛ nɛŋadoma la me pa'ahe te teŋa la da le tara paŋa la en, le ta'an ihege zabɛ la en, ge ba han bɔta vom, ba dɔla sugure nɔbiŋere la ma'an. 15 Ge te naba la sina ge bire poore ge tom nɛreba te ba keŋɛ Mizraim teŋa ti a to'e pɛɛntɛɛnreba wa'ana soŋɛ a mɛŋa. Se'em n eŋɛ wana ge bɔna ayema teŋa poan wan pɛɛn? A wan nyaŋɛ kɔ' sugure nɔɔrɛ la bahɛ ge pɛɛn?
16 Mam Daana Na'ayenɛ wa n kɔ'ɔn vɔna wa, enŋa daana wan ke Babilon teŋa poan, teŋsɛka poan te ka naba diihe en na'am la poan teŋsɛka nɔpɔtɛ, la sugure nɔɔrɛ te a eŋɛ ba'ahɛ ge le kɔ' dela poan te ena daana wan ki, 17 Faro han pon bɔta a wa'ana la pɛɛn teŋhe nɛreba n zo'e, te ba mɛ dangɔɔma te ba zom teŋa la dangɔɔma zuo ta ko' ba, la dela yore, soŋorɛ kan bɔna bini. 18 Enŋa n deŋɛ kɔ' nɔpɔtɛ la, a sagom nɔbiŋere la mɛ. Enŋa n deŋɛ dekɛ a nu'uhe tuhe teŋa la nɔɔrɛn ge sina ge tom wana wa la, a kan ta'an pɛɛn namehegɔ la.
19 Bala zuo la, Daana Na'ayenɛ la yeti, Mam n kɔ'ɔn bɔna se'em wa, n bahɛ te namehegɔ sige ho zuo na, doohe la hom n zagahɛ, ge kɔ' nɔbiŋere se'ere te ho biŋe la mam la. 20 N wan yeregɛ n yoka bɛnrɛ hɔ n wan nyɔkɛ hɔ n bɛnregɔ poan. N wan tare en wa'an Babilon teŋa poan na la n gankɛ n bilam. Se'ere n sɔe la n dagɛ birikina la zuo. 21 A pɛɛntɛɛnreba sɛba n pɛɛn zɔta la, wan lu so'a nɔɔrɛ poan, ge te sɛba n vo'e la me, wan yee sabeeo poan. Bala te ya wan baŋɛ te mam Na'ayenɛ yele se'em n bala.
22 Daana Na'ayenɛ la n yele se'em n wana: Mam mɛŋa wan behɛ mɔlɔsonɔ tia la zuin zuin ha la n kɔ'ɛ yile baanlega n nan pegele na, la n tare de ta sɛ'. N wan behɛ yile se'ere n nan de yile paalɛ nan bɔna bini puhura na, la n pɛnkɛ de tare ta sɛ pɔn'ɔhegɔ zen'an. 23 N wan tare de ta sɛ Israel zoore la zuo te de yagom yila, ge wom, ka wan lebege mɔlɔsomɔ tia, tara ninpeelom. Niihe yema yema wan wa'an ka zuo na tɛ' ba tegero, ka yila la ma'ahom wan dɛna soka zen'an bo niihe la. 24 Tiihe la zan'an wan baŋɛ te mam n de Na'ayenɛ la n dekɛ tiwoko wa ze'ele saazuo bahɛ na, ge le dɛna se'em n bahere te tigiriga wɔgɔra. Mam n de se'em n bahere te timan'aherɛ ku'ura, ge bahera te tikɛ'ɛŋa tee lebege timan'aherɛ. Mam, Na'ayenɛ n tɔgɛ, n me wan eŋɛ de.