Kenbegɛ yoko dangoone la poan la ho dekɛ ho lɔgɔrɔ la doohe yoko la poan
12
1 Na'ayenɛ tɔgɛ mam yeti, 2 Asaala dayɔa wa, ho kɛn'ɛre me la pobirega nɛreba zaŋa. Ba tare nini n wan nyɛte ne, ge ba ka nyɛte, ba tare toba n wan wone ne, ge ba ka wune. Se'ere zuo ba dela pobiregadoma. 3 Bala, Asaala dayɔa wa, bobe ho lɔgɔrɔ la ho maahom yehe. Eŋɛ bala wontɛɛŋa saŋa se'em ma'an te ba wan nyɛ hɔ. Bahɛ hom n boe zen'an la ge la ho yehe keŋɛ zen'an kayema. Daanse'ere ba wan bɔkɛ sɛla, la ban pon dɛna pobiregadoma mea zan'an la. 4 Lan de wontɛɛŋa te nɛra woo zin'an ge beha la, bobe ho lɔgɔrɔ la biŋe yeŋa na, la ho maahom yɛhega. Te yenɛ han ta man'ara, te ba beha ho la, ho pɔhɛ la ho yɛhera, kɔn'ɔn yehe wo nɛreba n ne yeti ba nɔgɛ yehe se'em la. 5 Ban behere ho la, kenbegɛ yoko dangoone la poan la ho dekɛ ho lɔgɔrɔ la doohe yoko la poan bahɛ yeŋa ha. 6 Ban behere ho la, vaɛ ho lɔgɔrɔ la buke ho bɔkɔ zuo la ho ziira kɛn'ɛra mɔen la ha. Pin' ho nɛŋa la ho da nyɛta teŋa la. Se'ere zuo n dekɛ la hom ta yɛhega la yilinyiliŋɔ pa'ala Israel yire wa. 7 Te mam eŋɛ doohe Na'ayenɛ n bo mam a nɔɔrɛ la se'em la. Wontɛɛŋa poan te mam bɔbe n lɔgɔrɔ biŋe yeŋa na maahom yɛhega maaheŋɔ. Te yenɛ ta man'are te mam kebegɛ yoko dangoone la la n nu'uhe, zi n lɔgɔrɔ la n bɔgɔrɔ zuo yehe kɛn' mɔen la ha ge te ba beha mam.8 Bolika te Na'ayenɛ tɔgɛ mam yeti, 9 Asaala dayɔa wa, Israel pobirega yiredoma wa ka soke ho yeti, ho ete la bene n bala? 10 Yele ba yeti, Daana Na'ayenɛ la n yele se'em n wana: Yele dena wa dela Yerusalem teŋa nabia la Israeldoma se'ehe n boe wa yele. 11 Yele ba, Mam dela yilinyiliŋɔ bo ya. Mam n eŋɛ hom se'em wa, ba wan eŋɛ ba la bala. Ba wan nyaŋɛ ba te ba yehe ba teŋa wa poan. 12 Nabia la wan bɔbe a lɔgɔrɔ buke a bɔgɔrɔ zuo doohe mɔɔ la poan zɔ. Ba wan kenbegɛ la yoko dangoone la poan bo en te a doohe bilam yehe zɔ. A wan pin' a nɛŋa te a da nyɛta teŋa la. 13 Ge n wan yeregɛ n yoka la n yogɛ en n bɛnregɔ la poan. N tare en Babilon teŋsɛka n de Kaldea teŋa la poan na. Ge a kan nyɛ ka, te bilam te a wan ki. 14 N wan degehɛ bama zan'an n soŋorɛ en la, a kpɛ'ɛndoma la a pɛɛntɛɛnreba la, lobe ba yeregɛ sabeeo poan bahɛ. N wan foe n so'a zanla digera ba. 15 N han dige ba te ba yeregɛ teŋhe woo poan bɔba, ba wan baŋɛ te mam n de Na'ayenɛ la. 16 Ge n wan bahɛ te basɛba peɛn so'a kɔrɔŋɔ la la kom vibega la la too seko woo n wan sige na la. Bala te ba wan ta tɛnra ba toonfɛn'ɛha la yele teŋhedoma n nyaŋɛ ba sɛla woo te ba daa eŋɛ. Bala te ba nya wan baŋɛ te mam n de Na'ayenɛ la.
17 Na'ayenɛ tɔgɛ bo mam yeti, 18 Asaala dayɔa wa, gbe'era ge dita, ge limiha dabeem limihego ge nyuura ko'om. 19 Yele teŋa la nɛreba la yeti, Daana Na'ayenɛ n yele se'em bo yamam sɛba n kɛn'ɛre Yerusalem Israel teŋa la poan: Ba wan dita ba dia me la dabeem, ge nyuura ba ko'om ge limiha dabeem limihego. Se'ere n sɔe la ba wan wa'ana aanhom ya teŋa la sɛla woo n boe ka poan la bahɛ, sɛba n boe ka poan tara gbirigere se'ere la zuo. 20 Teŋse'ehe woo te nɛreba bɔna ka poan la wan saalom lebege daboo, ge te teŋa la zan'an leege beele sɛsɛla kan yee ka poan. Bala te ya wan baŋɛ te mam n de Na'ayenɛ.
21 Na'ayenɛ tɔgɛ bo mam yeti, 22 Asaala dayɔa wa, yetɔgɔbiŋire se'ere n boe Israel teŋa wa poan tii, dabeha n kene tɔla, ge te liligere woo ka tara sɛla la, vɔnrɛ dela wane? 23 Yele ba yeti, Daana Na'ayenɛ n yele se'em n wana: N wan saalom yetɔgɔbiŋire dena wa, te ya kan le wom dɛ Israel teŋa wa poan. Ge yele ba yeti, Dabeha la pɔnre na te liligere woo n tare sɛla la wan wa'ana tom. 24 Liligere bii nyɛta kan le bɔna Israel teŋa wa poan dɛna ponpɔrɔŋɔ Israel nɛreba wa poan. 25 Ge mam n de Na'ayenɛ la wan tɔgɔra la sɛla te n bɔta, ge me wan bahɛ te de tom kalam ge kan go'om. Han dɛna dena yamam pobiregadoma beere wa poan wa, n eŋɛ sɛla woo te n yeti la eŋɛ la kalam. Daana Na'ayenɛ la n yele.
26 Na'ayenɛ tɔgɛ bo mam yeti, 27 Asaala dayɔa wa, Israeldoma yeti, liligere se'ere te enŋa nyɛ la yuue mɛ, ge te pore sɛka te a pore la me dela yuuma n zaaɛ porega. 28 Bala la, yele ba yeti, Daana Na'ayenɛ la n yele se'em n wana: Mam yetɔgom la boyena me pon kan le go'om! N wan bahɛ te mam yelehom la woo wan tom. Daana Na'ayenɛ la n yele.