Te mam nyɛ te sɛla ana wo na'am koka la nyagera wo kugu poonhogɔ la
10
1 Te mam nyɛ te sɛla ana wo na'am koka la nyagera wo kugu poonhogɔ la, bɔna pika la n yule kelompagehedomaa zuin la. 2 Te Na'ayenɛ yele boraa se'em n yɛ fupeelehe la yeti, Doohe yiile n boe kelompagehedoma la teŋa la fole la poan la ho vaɛ bugum saana la n gan kelompagehedoma la teŋasoka la perɛ ho nu'o la ho tare wa'ana lobe ba yeregɛ bahɛ teŋa la poan. Te mam beha en, te a seren keŋɛ ta doohe yiile fole la poan kɛn'. 3 Kelompagehedoma la daa ze' la Yenɛ Yire la gɔbega bɔba, en kɛn' ba'ahɛ la, te saŋgbanɛ la kɛn' zenzaka pin' ko poan la. 4 Mam nyɛ te Na'ayenɛ soŋa ɛnkɛ zooe kelompagehe daana la zuo tole ze'ele Yenɛ Yire la koleŋa nɔɔrɛn. Saŋgbanɛ la ma'an n perɛ Yire la zenzaka la poan na kɔ'ɔn yagera la Na'ayenɛ saŋa ma'an. 5 Ho han bɔna yeŋa zenzaka la poan, ho wan wom te kelompagehedoma la kelompagehe la damena wo Gaŋɛ Zan'an Yenɛ n ne tɔgɛ te la damena se'em la.6 Na'ayenɛ n daa bo nɛra se'em n yɛ fupeelehe la nɔɔrɛ te a keŋɛ ta doohe yiile la n boe kelompagehedoma la teŋa la fole la poan la a mɔ'ɛn bugum la na la, boraa la keŋɛ me ta zɛ'a yiile deyena zen'an. 7 Te kelompagehe daana la ayema tɛɛn a nu'o tom bugum la n gan ba teŋasoka la poan, mɔkɛ bugum la eŋɛ boraa n yɛ fupeelehe la nu'uhen, te a tare yehe. 8 Ho han beha kelompagehedoma la kelompagehe la pulin na sɛla n yuli bini na ana wo nɛresaala nu'o la.
9 Te mam behɛ, te yiile anaahe n ze la kelompagehedoma wa, yiile deyena deyena n ze' ba woo sakpekɔ poan, te yiile la woo nyagera wo kuga peele. 10 Ho han beha yiile la anaahe la zan'an, a wɔne la taaba, ba ane me woo ba dekɛ kɛn'ɛhɛ la taaba poan la. 11 Ba biline dɔla kelompagehedoma la, zen'enhe senaahe la woo poan, zen'sɛka woo te kelompagehedoma la dekɛ ba nɛŋa tɔ la bilam mea te ba bilina dɔla. Kelompagehedoma la n ŋmɛregere zen'an woo la yiile la me ne kɔ'ɔn ŋmɛregɛ la bala tontɔɔ, ba ka ŋmɛlene. 12 Ba iŋa la zan'an, ba pɔya la ba nu'uhe la ba kelompagehe la zan'an kɔ'ɔn perɛ me la nini ma'an, te ba woo yiile la me perɛ la nini bala mea. 13 Mam wom ba yi yiile te Sabeeo Kantɛ Yiile. 14 Kelompagehedoma la senaahe la zan'an tare la nɛhe senaahe, ba mea nɛŋa, te kayema me dɛna nɛresaala nɛŋa, te kayema me dɛna gbegenɛ nɛŋa, te kayema me dɛna tuguho nɛŋa.
15 Te kelompagehedoma wa ɛnkɛ zɔna saazuo. Mam beha, te bama n de bonvɔɔhe sɛba te n nyɛ Kebar Kolaa.b 16 Na'ayenɛ yamehe wa ne ha vuruge, yiile n ze' ba sakpekɔ la me ne vuruge mɛ. Ba ne han le yeregɛ ba kelompagehe te ba ɛnkɛ zom saazuo, yiile wa ne bɔna la ba sakpekɔ mea. 17 Ba ne han zɛ'a ka vurugera, yiile la me ne zɛ'a me ka vurugera, ge kelompagehedoma wa ne han ɛnkera, na'ma wa me ne lagom ɛnkɛ me la ba. Se'ere n sɔe la, bonvɔɔhe la sea boe la na'ma wa poan.
18 Na'ayenɛ soŋa la nya ze'ele Yenɛ Yire koleŋa nɔɔrɛn la ɛnkɛ ta bɔna kelompagehedoma la zuin. 19 Te mam zɛ'a beha, te kelompagehedoma la yeregɛ ba kelompagehe la bɔna bini ɛnkera zɔna saazuo te yiile la me lagom ɛnkera la ba. Te ba ɛnkɛ ta ze'ele Yenɛ Yire la dapoore nayaŋa la nɔɔrɛn, te Israel Yenɛ la soŋa la yula ba zuin.
20 Bama n de bonvɔɔhe sena te mam daa nyɛ Israel Yenɛ teŋa Kebar Kolaa la nɔgbenɛ. Mam baŋɛ te ba dela kelompagehedoma. 21 Ba ayena woo daa tare la nɛhe senaahe la kelompagehe senaahe la sɛla yula ba kelompagehe la poan wo nɛresaala nu'o la. 22 Ba nɛhe la daa ane me wo mam nyɛ sɛba Kebar Kolaa la nɔgbane te ba ana se'em la. Ba woo daa tɔ la ba nɛŋa tontɔɔ kena.