Te a daa gin' mam zuo zonto ɔnbegɛ mam
8
1 Yuuma ayoobe poan, ŋmarehe seyoobe, dabeha anuu daarɛ, te n yuun zin'an n yire, mam la Yuda teŋa keendoma basɛba, te Daana Na'ayenɛ paŋa sige n zuin bilam na. 2 Te mam nyɛta sɛla te a ana wo a dela boraa la. Te a sea beene sigera na ana wo bugum ma'an la, ge te a sea la beene zɔna zuin na me nyagera pege pege kpegera nini. 3 Te a daa tɛɛn a zen'an kayema n ane wo nu'o la, gin' mam zuo zonto, ɔnbegɛ mam. Te mam nyɛ zaanheŋɔ la poan te Sea la ɔnbegɛ mam te mam yula bala, te a tare mam keŋɛ Yerusalem teŋai. A daa tare mam ta kɛn' la Yenɛ Yire nayaŋa sɛka n boe poan tɔ zanɔɔrɛ ton tɔɔ la. Te bagarɛ zɛ'a bini ha, te Na'ayenɛ suunre nyie la dɛ. 4 Israel Yenɛ soŋa nɛɛ bilam me nyagera wo mam n da pon nyɛ ka te ka nɛɛ nyagera se'em liligere se'ere te a daa lilige pa'ale mam bɔn'ɔn poan ha la.5 A yele mam yeti, Asaala dayɔa wa, ŋmɛregɛ ho nɛŋa tɔ nu'o zuɔ bɔba wa. Te mam ŋmɛregɛ n nɛŋa tɔ kaanbegɔ daka nayaŋa la, te bagarɛ la te Na'ayenɛ suunre nyie la dɛ la ze'. 6 A soke mam yeti, Asaala dayɔa wa, ho nyɛte ban ete sɛla? Ho nyɛte yelefɛn'ɛha se'a te Israel nɛreba wa tona woo? Ba sa'ahɛ mam te mam ka lɛna n toolom zen'an la? Ho wan pon nyɛ toonfɛn'ɛha n gane bala.
7 A dekɛ mam ze'ele bilam tare mam keŋɛ zenzaka koleŋa la poan la, ta pa'alɛ mam yoko n boe dangoone poan. 8 A yele mam yeti, Asaala dayɔa, ŋmɛ' dangoone wa ka'lom ɔhegɛ. Te mam ŋmɛ' dangoone la ɔhegɛ nyɛ bɔ'ɔ nɔɔrɛ bilam. 9 A yele mam yeti, Doohe bilam kɛn', la ho nyɛ toonfɛn'ɛha se'a te ba tona ka'lam la. 10 Te mam kɛn', ta nyɛ te ba golɛ la bon vuula doma la dunhe se'ehe n kihi la fɔɔra la Israel teŋa baga la zan'an fɔɔra lamenɛ toolom deo la dangɔɔma la poan.a 11 Israel keendoma pihiyopɔe te bama zɛ'a nɛŋa la Sapan dayɔa Yaazania pa'ahɛ keendoma pihiyopɔe la poan. Te ba woo zanla sɛla te ba tara ko'ɛnka la ba nu'uhen, te zun'uhe ze'ele ba poan gulugera na.
12 A yele mam yeti, Asaala dayɔa wa, ho nyɛ Israel keendoma n sogɛ lika poan eta sɛla? Nɛra woo boe la a bagarɛ zoŋen. Ba yeti ba mɛhe te Na'ayenɛ pon ka le beha tɔ, Na'ayenɛ zagahɛ to teŋa wa mɛ. 13 A yele mam yeti, Ho wan nyɛ ba te ba tona toonfɛn'ɛha se'a n gane bala. 14 Te a daa tare mam wa'an ze'ele Yenɛ Yire koleŋa sɛka n tɔ zanɔya bɔba la, te mam nyɛ te pɔgɔhe zin'inre bilam kɛla ba Tammuz bagarɛ la zuo. 15 A yele mam yeti, Asaala dayɔa, ho nini nyɛte? Ho wan nyɛ yelefɛn'ɛha se'a n gane bala.
16 Te a nya tare mam kɛn' Yenɛ Yire la poan na, te mam nyɛ te boraahe n paɛ wo boraahe pihiyi' la senuu zɛ'a lɛm la kolesɛka n dole kɛn'ɛra zen'an la poan la. Ba daa ze' la kaanbegɔ daka la vole se'ere n gan bilam te ba dɔla tɔla teŋasoka, ŋmɛregɛ ba poya bahɛ Yire la, ge degehɛ ba nɛhe tɔ dapɔya bɔba dɔnbelɛ na'aha wontɛɛŋa la n zone na la. 17 A yele mam yeti, Asaala dayɔa wa, ho nini nyɛ ban ete sɛla wa? La dagɛ yelepeka te Yuda nɛreba eŋɛ toonfɛn'ɛha wa. Ba bahɛ te teŋa gbirige la ba nyiihe mam sunsunya saŋa woo. Behɛ, ban ba toora ge kɛhɛ mam yu'urɛ la paɛ zen'an beene? 18 Bala zuo la n wan dekɛ n sunsunyiim la namehe ba. N kan tara ba giinle bii n kan bahɛ ba. Ba han kaahɛ la se'em me, n kan kelehe ba.