5
1 Bala, asaala dayɔa wa, dekɛ so'a n dite, lebege zupona baraga, la ho siie ho zuo, la ho tɛɛŋa. Ge la ho dekɛ sɛla la ho poregɛ zonto la boyi'. 2 Dabeha se'a te ho yeti ho gan'an behera Yerusalem teŋa la han ta ba'ahɛ, ho po' zonto la botan', la ho dekɛ boyena nyɔn' tɔ la bugum teŋa la poan. Ge dekɛ sogom nɔɔrɛn boyena la me, la ho ŋma' tɔ la so'a kae teŋa la mum. Ge dekɛ boyena la me n gee la la ho lobe ba bahɛ sabeeo poan. Se'ere n sɔe la mam yeti n dekɛ la sɔ sɛka n dite ka tara makerɛ la dige ba. 3 Ge dekɛ zonto la fiin la ho pɛ' tabelɛ ho fuo. 4 La yɛ'ɛha, loe ho zonto wa me fiin wa la ho nyɔn' ba bugum poan te ba di. Bugum wan ze'ele la bilam taɛ Israel teŋa la zan'an.5 Daana Na'ayenɛ la n yele se'em n wana: Yerusalem teŋa la n wana. Teŋsɛka te mam dekɛ ze'ele teŋhe wa woo teŋasoke, te teŋkanra kae ka bahɛ teŋasoka la n bala. 6 Ge a potɔɔ la zuo, te a bire poore bahɛ mam malema la gana teŋse'ehe woo n kae en bahɛ teŋasoka la. A zagahɛ mam nɔze'elego la mɛ, ge ka dɔla mam malema la me.
7 Bala zuo la Daana Na'ayenɛ la n yele se'em n wana: Hom n ba' dɛna se'em n bire poore bahɛ mam gana teŋse'ehe woo n kae ho bahɛ teŋa zagahɛ mam malema la me, ge me ka dɔla nɔze'elego la. Ho ton dɔla la teŋse'ehe n kae ho bahɛ teŋasoka la nɔze'elego.
8 Bala zuo la Daana Na'ayenɛ la n yele se'em n wana: Mam mɛŋa n zabɛ la hom Yerusalem teŋa wa, te n wan dekɛ namehegɔ kɛn'ɛhɛ hɔ te teŋhe wa woo nyɛ. 9 Hom n dole bagayooro la zuo, n wan tom hɔ toonse'ere te n ka tabelɛ tom hɔ, ge me pon kan le malom dekɛ de tom hɔ. 10 Bala zuo la ho poan, sɔdoma wan nyoŋɛ ba kɔma obe, te kɔma me tuluge nyɔkɛ ba sɔdoma obe. N wan dekɛ namehe too kɛn'ɛhɛ hɔ, te nɛresɛba n gee ho poan ka ki la, n yeregɛ bahɛ sabeeo poan. 11 Bala zuo la mam Daana Na'ayenɛ pɔ' mɛ te yamam n ganlom mam toolom zen'an la zuo, n wan foe n ninbɔn'zɔre la ya poan, n kan le beha ya te ya tara ma ninbɔn'ɔn, bii n bahɛ ya yore. 12 Ya porogerɛ botan' wan ki namehegɔ la poan. Kom bahɛ te ya mɛlom so'a wan kɔrom ya porogerɛ botan' yeŋa. Ge te n dekɛ ya porogerɛ botan' lobe bahɛ sabeeo poan, ge te n dekɛ so'a sɛka n dite ka tara makerɛ la digera hɔ. 13 Bala te mam sunsunyiim la wan man'ɛn te n nya bahɛ. N han dam ba la n sunsunyiim la, ba wan baŋɛ.
14 N wan sagom hɔ, te ho lebege kɛhega teŋa bo teŋse'ehe woo n kae ho bahɛ teŋasoka wa, ge bahɛ te sɛba woo n dole tɔla nyɛ lan ane ho se'em la ba nini. 15 Ho wan lebege kɛhega la zufagahom teŋa. N han ze'ele n sunsunyiim la poan te n namehe hɔ, sɛla n wan sige ho zuo na la wan bahɛ te dabeem kɛn' teŋse'ehe n kae ho. Mam Na'ayenɛ yele se'em n bala. 16 N han dekɛ kom pɛɛnɛ la n tɔe wo yabega la tɛn hɔ, n wan se'ere tɛn ho la ninmɔ'ɔrɛ ko hɔ. N wan bahɛ te kom malom sige ho zuo na pa'ahɛ, n wan woe ho dia bahɛ. 17 N wan dekɛ kom la bonsilimasiiro to'ohɛ hɔ, ta obe ho kɔma zan'an. Too la ziim ka'ahegɔ wan piihe ho poan tole, n wan dekɛ so'a to'ohɛ hɔ. Mam Na'ayenɛ n yele se'em n bala!