Mam wan seren fan' ho bahɛ
39
1 Yuda teŋa naba Zedekia n zin'ire a na'am gɔŋɔ la zuo la, a yuuma awae', ŋmarehe pia poan, te Kaldea Naba Nebukadnezar vaɛ a pɛɛntɛɛnreba zan'an na, te ba sogɛ gan'an kae Yerusalem teŋa, te ba zabɛ la ka. 2 Naba Zedekia na'am dia yuuma pia, la deyena poan, ŋmarehe senaahe dabeha awae' daarɛ, te dima la nyaŋɛ tin' kura zom teŋa la dangoone la zuo na. 3 Ban ta nyaŋɛ Yerusalem teŋa ba'ahɛ la, te Kaldea naba kpɛ'ɛndoma la nya kɛn' na, sɔe teŋa la Teŋasoka Nayaŋa poan zin'an, te la pa'alɛ yeti, Bama n nya sɔe teŋa la sɔna. Kpɛ'ɛndoma wa dela Nergal Sarezer la Samgar Nebo la Sarsekim Arabsaris la Nergal Sarezer Arabmag la Babilon naba kpɛ'ɛndoma la woo.4 Yuda teŋa naba Zedekia la a pɛɛntɛɛnreba la n nyɛ ba la, ba le'ehɛ la yu'uŋɔ, doohe naba va'am la poan, zɔ doohe nayaŋa sɛka n boe dangɔɔma a yi la teŋasoka la, yehe teŋa la poan, yɛ'a tɔɔra mɔen la ha. 5 Te Kaldea pɛɛntɛɛnreba la, dige ba bala ta nyɔkɛ naba Zedekia Yeriko bɔn'ɔrɔ la poan, tare en wa'an Kaldea Naba Nebukadnezar zen'an na, Aribla teŋa n boe Hamat teŋa poan la, te a gankɛ en. 6 Te Kaldea naba wa kɔrom naba Zedekia dayɔɔhe a ninin, Aribla teŋa poan, ge kɔrom Yuda teŋa nɛrekanreba la zan'an. 7 Ge kpegɛ naba Zedekia nini, ge ba' en dɔɔrɔ poan, te ba tare en keŋɛ Kaldea poan. 8 Te Kaldeadoma wa nya nyɔ' naba yire la, la nɛreba la yiya bahɛ, ge gbihe Yerusalem teŋa wa dangoone la bahɛ. 9 Te Naba Nebukadnezar, la gu'ureba la nɛŋadaana la, nyɔkɛ nɛresɛba woo n yee teŋa la poan, dekɛ ba mɛhe eŋɛ a nu'uhen la, la nɛresɛba woo n yee teŋa la poan la, ta'ɛhɛ ba Kaldea ha. 10 Te Nebuzaradan, se'em n de gu'ureba la nɛŋadaana la, bahɛ nɛresɛba n de taromdoma ka tara sɛla teŋa la poan la, ge bo ba koa zen'an teŋa la poan te ba yee bɔna ka poan.
11 Te Naba Nebukadnezar bo Nebuzaradan wa nɔɔrɛ yeti a behɛ Yeremia zen'an. 12 Ho han nyɛ en, ho tara en behera en soŋa, da dekɛ ho nu'o kalom en, en soke sɛla woo yele, ho eŋɛ bo en. 13 Te Nebuzaradan n de zaba nɛŋadaana la Nebusazban Arabsaris la Nergal Sarezer Arabmag la Babilon naba kpɛ'ɛndoma la woo 14 yehe ɛɛra Yeremia, ta nyɛ en gu'ura la zenzaka la poan, dekɛ en eŋɛ Sapan dayɔa Ahikam me dayɔa Gedalia nu'uhen, te a tare lebe a mɛŋa yire na, te a bɔna la a nɛreba.
15 Se'em ma'an te Yeremia bɔna gu'ura la zenzaka poan la, te Na'ayenɛ tɔgɛ bo en yeti, 16 Keŋɛ ta yele Ebed Melek, Kus teŋa boraa la yeti, Pɛɛntɛɛnreba Na'ayenɛ la, Yenɛ se'ere n de Israel Yenɛ la yeti, N yeti n bahɛ te mam yelehom la, n wa'an yelemɛŋɛrɛ teŋkana wa zuo na, be'em, ge dagɛ som. Ho nini wan nyɛ te la seren tom de daarɛ. 17 Ge de daarɛ, n wan fan' ho bahɛ, ho kan lu sɛba te ho zɔta ba wa nu'uhen. 18 Mam wan seren fan' ho bahɛ, te so'a kan ko hɔ, ho wan vɔna, te la dɛna ho zaberɛ poan yɔɔrɛ n bala, se'ere zuo, ho nam mɛ.