N yeti n tare la namehegɔ seko wa'an zen'kana wa poan na
19
1 Te Na'ayenɛ yele mam yeti, Keŋɛ yagombaha daana zen'an ta da' dugula. Bahɛ te yizuto keendoma la, la malemadoma la basɛba doohe ho. 2 Te ya yehe doohe Dogowɔnrema Nayaŋa la, sige Ben Hinom Bɔn'ɔn la poan ha, ta mɔɔlɛ yelese'a te mam tɔgɛ bo ho wa bo ba. 3 Ta yele ba yeti, Yuda teŋa nadoma, la Yerusalem teŋa nɛreba wa, kelehe ya Na'ayenɛ yelehom wa. Pɛɛntɛɛnreba Na'ayenɛ la n de Israel Yenɛ la yeti, N yeti n tare la namehegɔ seko wa'an zen'kana wa poan na, te se'em woo n wom ko yele, a toba wan kɛla wii. 4 Se'ere n sɔe la, nɛreba wa tamɛ mam yele mɛ, ge ganlom zen'an wa, doohe la ban kaanbere nyɔ'an bo'olom bɔ'ɔra yena n de saama bii ba sɔyaabdoma, bii Yuda teŋa nadoma ka tabelɛ mina teŋa wa poan la, la ban ka'ahɛ ziim sebo n ka tare taalɛ perɛ teŋkana wa poan la. 5 Ge mɛ kaanbegɔ zen'an bo Baal bagarɛ la, nya tara ba dayɔɔhe te se dɛna nyɔ'an bo'olom te ba tara nyɔ'anra bɔ'ɔra Baal bagarɛ wa la, yelese'ere n ka tabelɛ wa'an mam potɛn'ɛrɛ poan na, bii mam ka tabelɛ ya'ɛ n nɔɔrɛ yele ba te ba eŋɛ n bala. 6 Bala zuo, Na'ayenɛ yeti ya, mini ya te dabaherɛ la kene na, te nɛreba kan le yi zen'kana wa Topet bii Ben Hinom Bɔn'ɔn, ba wan yi'ira ka la Kɔrɔŋɔ Bɔn'ɔn. 7 Zen'kana wa poan, te n wan sagom Yuda, la Yerusalem teŋhe potɛn'kanra la bahɛ. N wan dekɛ Yuda la Yerusalem eŋɛ ba diŋdoma la, la sɛba n eere ba kum la nu'uhen, te ba kɔrom ba, te ba iŋhe dɛna ziiro, la mɔen dunhe dia. 8 N wan behɛ te teŋa lebege dabeem teŋa, ge dɛna kɛhega lɔkɔ, te se'em woo n dole tɔla wan lɔbera zuo, teŋa la sagaŋɔ la zuo. 9 N wan bo ya diŋdoma la sunkanberɛ, te ba sogɛ gan'an gura ya teŋa la te ya dia ta ba'ahɛ, te ya koŋe yɛhega na, ge nya ɔbera ya dayɔɔhe, la ya pɔyɔɔhe, ya wan obe taaba, ya diŋdoma la n gan' gura ya te ya kan ta'an yehe na ɛ dia la zuo.10 Ge nya wɔnregɛ dugula la nɛra sɛba n doohe la hɔ, zɛ'a kɛleha ho la nɛŋan, 11 ge yele ba yeti, Pɛɛntɛɛnreba Na'ayenɛ la yeti, N wan wɔnregɛ nɛreba wa, la teŋkana wa mɛ wo nɛra n wɔnregɛ yagom baherɛ la, te de kan le ta'an tabɛ se'em la. Ba wan zi kum na pin' Topet wa poan, te ko ta perɛ te fole kan le bɔna. 12 Na'ayenɛ yeti, Mam n wan eŋɛ teŋkana wa nɛreba se'em n bala, n wan eŋɛ ka wo Topet la. 13 Yerusalem teŋa yiya la, la Yuda teŋa nadoma yiya la wan seren lebege ana wo Topet wa, ta ta' la yire se'a poan te ba nyɔ'anra nyuŋo soŋɔ zun'uhe bɔ'ɔra ŋmarebibihe, ge kaanbera daam bo'olom bɔ'ɔra yena la woo wan lebege ana wo Topet wa.
14 Yeremia n ta ze'ele Topet bɔn'ɔn la poan, zen'sɛka te Na'ayenɛ daa tom en te a daa nya keŋɛ ta tɔgɛ a nɔɔrɛ la poan lebe na la, a wa'ana kɛn' la Na'ayenɛ Yire la zenzaka la poan, yele nɛresɛba woo n boe bini la yeti, 15 Pɛɛntɛɛnreba Na'ayenɛ la n de Israel Yenɛ la yeti ya, N yeti n tare la namehegɔ wa'an teŋa wa, la ka teŋbibihe se'ehe woo n kae ka bahɛ wa nɛreba zuo na. Se'ere n sɔe la, ba dela pobirega doma, ba kperɛ la toba te ba kan kelehe mam.