Yeremia 2

Keŋɛ Yerusalem teŋa ta mɔɔlɛ bo ba

1 Te Na'ayenɛ tɔgɛ bo mam yeti, 2 Keŋɛ Yerusalem teŋa ta mɔɔlɛ bo ba yeti, Na'ayenɛ yeti, Mam tɛnre ho bonbilome te yuun dekɛ ho mɛŋa delom mam se'em, nɔŋɛ mam wo pugula n nɔŋɛ a zaba la. Dɔla mam poore teŋkɛ'ɛŋa sɛka te sɛsɛla kan ta'an borɛ ka zuo la poan. 3 Hom Israel wa, yuum dela mam ma'an denɛ, wo dideena n de mam denɛ se'em la. Se'em woo n dekɛ a nu'o kalom hɔ, ne nyɛ la namehegɔ mam zen'an.

4 Yakob yiredoma wa, la sɛba woo n de Israel buuri wa, kelehe ya Na'ayenɛ wa. 5 Na'ayenɛ yeti, Ya yaabdoma yuun nyɛ la tuure dene mam zen'an, yuun dekɛ mam bahɛ ge keŋɛ zaan la mam, yuum keŋɛ ta dɔla sɛla n ka tare vɔnrɛ, me yuun ta lebege sɛla n ka tare vɔnrɛ ba mɛŋa la? 6 Ba yuun ka soke ba mɛhe yeti, Na'ayenɛ la n tare tɔ ze'ele Mizraim teŋai yehe na, tare to doohe mɔen yehe na la bɛɛ? A tare to doohe teŋkpaanhena, la kuŋkuma zuto, teŋse'ehe n de lika, la teŋse'ehe poan te nɛresaala ka tabelɛ zin'ire se poan la bɛɛ? 7 Mam tare ya kɛn' la teŋsɛka te sɛla woo buge poan na, te ya di ka poan wɔla la, la ka nyɛlom la. Ge yamam n kɛn' ka poan na la, ya ganlom mam teŋa wa mɛ, nya bahɛ te mam sɔ'ɔlom wa lebege bonbe'o. 8 Ho malemadoma la ka soke yeti, Na'ayenɛ la bɛɛ? Sɛba n tare pa'alegɔ yɛla la ka mi' mam. Sɛba n de ho nadoma zagahɛ la mam. Ho nɔtɔgɔheba la tare la Baal yu'urɛ pota. Ho nɛŋadoma la woo dɔla bagase'a n ka tare soŋorɛ.

9 Bala zuo mam, Na'ayenɛ, le zɛrɛgɛ ya mɛ, la ya kɔma, ta ta' ya yaahe. 10 Yakɛ ya keŋɛ Kitim ko'kantɛ wa ha ta behɛ ya, tom ya nɛreba te ba keŋɛ Kedar, ta behɛ soŋa soŋa ba wan nyɛ ya yele wa taaba. 11 Teŋa boe tee ka yena, la ban pon dagana Yenɛ la? Ge mam nɛreba wa ton dekɛ la ba soŋa la, tee sɛla n kan soŋɛ ba. 12 Saazuo ane la baanlom, bahɛ te la eŋɛ ho pakerɛ te ho suunre sagom zan'an, la ba toonɛ wa. Na'ayenɛ yele se'em n bala. 13 Mam nɛreba wa tom la toonfɛn'ɛha ayi'. Ba zagahɛ mam se'em n de vom ko'niho la mɛ, ge tun' ba mɛhe bulehe, bulehe se'ehe n wɔnrɛ, te ko'om kan ta'an bɔna se poan.

14 Israel dela da'aberɛ? Bii a dela yire poan yameŋa? La eŋɛ la wane te ba nyaŋɛ hɔ? 15 Diŋdoma n bala wuuna wo gbegema la, ba wuum la paŋa, wa'ana aanhom ho teŋa la, Ho teŋhe la zan'an lebege la daboo, te se nɛreba ka bɔna se poan. 16 Sɛla n pa'ahɛ dela Mempis la Tapanhes teŋhe nɛreba wɔnrɛ ho na'am muŋa la bahɛ mɛ. 17 Dagɛ ho mɛŋa n da' yele ana pagelɛ ho zuo, doohe la hom n zagahɛ Na'ayenɛ ho Yenɛ la, ge te enŋa me n gu'ura ho ho kenɛ la poan la? 18 Bene n zuo te ho nya kena Sihor kolaa la n boe Mizraim teŋa poan la nyuura ko'om? Bene n zuo te ho nya kena Asiria teŋa kolaa la poan nyuura ko'om? 19 Ho potɔɔ la wan namehɛ hɔ. Ho pobirega la wan tanhe ho. Behɛ, la dela be'em, ge dɛna too, te ho zagahɛ ho Na'ayenɛ ho Yenɛ la. Mam dabeem ka boe ho poan. To Daana Yenɛ n de Pɛɛntɛɛnreba Nɛŋadaana la n tɔgɛ.

20 Yuumai yuumai ha, te ho kɔ' ho yɔgɔhɔga la bahɛ, ge aanhom mam beena se'a n gu' ho la bahɛ, ge yeti n kan le tona bɔ'ɔra Yenɛ wa le yɛ'ɛha. Ge nya dɔla zoore woo zuo, la tikantɛ woo teŋa, tona ho yalomtooma. 21 Mam loe ho te ho dɛ'a la tia soŋa te mam borɛ. La eŋɛ la wane te ho tee ho mɛŋa, lebege tia yɛa wa? 22 La hom n pon dekɛ naakenya, la ki'ibo ure ho mɛŋa la, ho ganleŋɔ la kelom gan'an mam ninin mɛ. To Daana Na'ayenɛ yele se'em n bala. 23 Hom n wan ta'an yeti n ka ganlom, n ka dole Baal baga la? Tɛɛn ete seko te ho eŋɛ bɔn'ɔn la poan la, mina sɛla te ho eŋɛ la. Ho eere nyaanra me wo yogonɛ paalega n bote zɔŋa la. 24 Ho ete mɛ wo mɔen boŋa n eere mɔen, yuunha ɛɛra zɔŋa la bondɔɔ seko wo n nyɛ en kan namehɛ ge paɛ en. Ho ŋmarega la poan, ba wan paɛ hɔ. 25 Ho tagara kɔ' mɛ, te ho konkore sin', la hom n zote dɔla bagayooro la poore po'oha la. Ge la bala zan'an, ho yeti, yoo, mam malom la saama, n kan bahɛ ba dɔlɔga. 26 Wo ban ne nyɔkɛ nayiga diihe ka vi se'em la, bala mea te ba wan diihe Israel yire wa, la de nadoma, de kpɛ'ɛndoma, de malemadoma, la de nɔtɔgɔheba zan'an, 27 n ne ta zɛ'a la tia yɛta ka te n sɔ la, ge yɛta kugure te hom n dɔgɛ mam la. Ba bire la ba pɔya bahɛ mam, ge dagɛ ba nɛhe. Ge ba han ta bɔna daaŋɔ poan, ba wan yi'ira mam te, wa'ana na fan' to bahɛ. 28 Ya yena la ne keŋɛ la bɛ? Bahɛ ya te ba wa'ana, bama han wan nyaŋɛ fan' ya daaŋɔ la poan bahɛ. Se'ere n sɔe la, hom Yuda tare baga zo'e mɛ, wo hom tare kɔma ta ba zo'e se'em la.

29 Bene zuo te ya nyɔna mam? Ya bire la ya pɔya bahɛ mam. Na'ayenɛ yele se'em n bala. 30 Mam namehe ya nɛreba la yoo. Ba zagahɛ sɛla woo te n pa'alɛ ba. Ya mɛŋa so'a aanhom mam nɔtɔgɔheba la wo gbegenɛ la. 31 Saŋkana buuri wa, behɛ ya Na'ayenɛ yelehom wa, Mam dela mɔen duŋa bo Israel yoi? Bii n dela teŋa n de lika zaŋa bo ya? Bene zuo te mam nɛreba wa yeti, to nya vo'ohe ya, to kan le wa'an ho zen'an na? 32 Pugula boe wan tamɛ a ka nonɔm banhe bahɛ? Bii pɔka tamɛ ka ele futo bahɛ? Ge mam nɛreba wa tamɛ mam yele mɛ te dabeha zaan.

33 Ya ba mina la zabadoma eere, pɔgɔse'ehe n de potɔpa, ho zamehɛ ba ho sɔya la mɛ. 34 Ho futo la te ho sɛnga la, nahadoma sɛba n ka tare taalɛ ziim n taɛ tɔ. Ba me ka tom be'em sebo, ge la yele ana wa zan'an. 35 Hom yeti ho ka tare tuure, bala n kan eŋɛ sunsunya la ya. Bala zuo, n wan tare ya wa'an gankerɛ zen'an na, la hom yeti ho ka tom be'em la. 36 Behɛ yan sɛregɛ se'em, tɛɛhena ya sɔya la. Mizraim wan diihe ya nyanɛ, wo Asiria n eŋɛ ya se'em la. 37 Ya wan ze'ele bilam me, dekɛ ya nu'uhe kokɛ ya zuto wa'ana. Se'ere n sɔe la, Na'ayenɛ zagahɛ sɛba te ya dekɛ ya mɛhe delom ba la mɛ.