Ho dela se'em n soŋorɛ sɛba n nane ho la popeelom
64
1 Aanhegɛ saazuo wa sige na. Bahɛ te zɔya gbi'ira ho nɛŋan. 2 Wo bugum peka n ne bahɛ te bugum taɛ zo'e bahɛ te ko'om kɔta la, wa'an sige na to ho pa'alɛ ho diŋdoma hom n de se'em. Bahɛ te teŋa woo miina ho nɛŋan. 3 Ho toonkanra n pakɛ tomam mɛ ho sige na, ge zɔya miine mɛ. 4 Teŋa n pɔhɛ na daarɛ, hom ma'an n de Yenɛ se'ere te to wom, bii nyɛ te ho tona nyalema, la kerehe bɔ'ɔra ho nɛreba. 5 Ho dela se'em n soŋorɛ sɛba n nane ho la popeelom, ge bɔta te ba eta sɛla te ho bɔta. Ge hom suunre nyie mɛ la be'emtooma. Te wan eŋɛ la wane nyɛ faanrɛ? 6 To zan'an ganlom me, te ka nare te to soha hom. To toonsoma la woo ana wo tanzan dɛngerɔ la. To zan'an ku'e me soora wo tia vɔntɔ la, ge te to yelebe'ero la kanra tɔ yɛ'a wo sabeeo n kanrɛ guŋguŋo yɛ'a se'em la. 7 Nɛnɛra ka boe gorɛ hom bii sɛ zɛ'a sakerɛ sera poan la hom. Ho bire la ho poore bahɛ tomam, ge bahɛ te to be'em la di to kaanbɛ.8 Ge la bala zan'an, hom Na'ayenɛ n de to Sɔ. Tomam dagɛ sɛsɛla, gaŋɛ yɔgɔrɔ bɔna ho nu'uhe poan. Hom n de yagombaha daana, se'em n yagom tomam. 9 Na'ayenɛ, da ba eŋɛ suunre la tɔ tole, bii ho tara to be'em la ho suunre poan yɛ'ɛha. Tɛɛn te tomam zan'an dela ho nɛreba ge la ho kelehe to sohoga. 10 Hom ton soma la zan'an nya lebege la pɔgɔtia teŋhe. Zion lebege pɔgɔtia ge Yerusalem daboo la. 11 Toolom yire se'ere n daa de fa'a zan'an te to sɔyaabdoma daa ba pɛgera hom la, ba nyɔ' de me la bugum. To yisoma la zan'an te to mɛ la nya lebege la daboto. 12 Na'ayenɛ, yele ana wa woo n sige tomam zuo na wa, hom wan zin'an ge beha? Hom sina ge beha tɔ te to namehɛ gaŋɛ wana?