Nɛreba yaɛ en mɛ, ge zagahɛ en
53
1 Ane n sakɛ bo to yelehom wa, ge Na'ayenɛ paŋa boe la ane zuo?a 2 A zo'ore la a nɛŋan wo bonbule, bii kɛ'ɛŋa bonbule n tanhɛ yehe na zɔ'ɔra se'em la. A ka ane soŋa, bii a tare paŋsɛka te koŋkoma'ahom bɔna wan ta'an ve'e to keŋɛ a zen'an. Soŋa ka boe a iŋnaanɛ poan bahɛ te to bɔta en. 3 Nɛreba yaɛ en mɛ, ge zagahɛ en. A dela nɛra n mi' namehegɔ la ban'an yele. A nyɛ' namehegɔ. Tomam ka bote to nyɛ en. To zagahɛ en mɛ, ka nam en. 4 La dela sera, a namehe la tomam zuo, ge di tomam ninbɔn'ɔn, ge te to yeti, Na'ayenɛ n namehere en. 5 Tomam tobekperega zuo te ba pɔgɔlom en ta ko. Tomam toonbe'ero zuo te ba wɔnregɛ en. A fuula la poan te tomam nyɛ tebegɔ. 6 Tomam ane wo piihe la, bɔregɛ to zan'an, ŋmɛregɛ dɔla to sore to sore. Na'ayenɛ dekɛ tomam woo be'em pagalɛ enŋa zuo. 7 Ba muguhe en mɛ, namahe en, te a ana baanlam ka lakɛ a nɔɔrɛ. A sinɛ mɛ digi digi wo pebila te ba tara yɛ'a kɔrɔgerɛ la, ana wo pehego te ba kɛɛra ko kɔnberɔ te ko sina se'em la, bala mea te a ana, ka lakera a nɔɔrɛ. 8 Ba muguhe en mɛ, gankɛ en, ge tare en keŋɛ. Ane n wan ta'an tɔgɛ a buuri yele? Ba ŋmɛ' en mɛ, ko' en, a mɛŋa nɛreba tuure zuo.b 9 Ba maahom te ba pin' en mɛ la toonfɛn'ɛhadoma, ge ba ta pin' en la birikinadoma yɔɔ poan. A ka pim nɛra, bii zabɛ zaberɛ, bii ponpɔrɔŋɔ ze'ele a nɔɔrɛn na. 10 Na'ayenɛ n pon maahom dɛ, te a yameŋa la namehe, dekɛ a mɛŋa kaanbɛ be'em duuhego. Yameŋa wa wan nyɛ a yaahe, te ka dabeha wɔgɛ, te Na'ayenɛ sunboolom la nyaŋɛ tom doohe a poan.11 A han namehe ba'ahɛ, a wan nyɛ yɔɔrɔ la te a poorɛ pee. Mam tontɔɔdaana wa wan dekɛ mi'ilom sebo te a tara la bahɛ te nɛreba dɛna Na'ayenɛ nɛreba, te a to'e ba be'em la zi. 12 Bala zuo, mam wan yɔ n yameŋa wa la na'ahegɔ la paŋa. Enŋa wan tɔnrɛ sɛla te a fan' la kpe'eŋo doma. Enŋa n dekɛ a mɛŋa kaanbɛ la. Ba kaanlɛ en pa'ahe la tobekperegadoma poan. Nɛreba zo'e zo'e be'em te a zi, ge le dɛna nu'po'ɔ ŋmɛ'ɛra bo sɛba n tue.