N yelemɛŋɛrɛ nɛɛ wo bugum la bo teŋhe woo
51
1 Kelehɛ yamam sɛba n zote faanra ge ɛɛra Na'ayenɛ. Behɛ ya taŋa sɛka te ya ze'ele ka poan na la, kuguse'ere te ba maalɛ ya de poan la. 2 Behɛ Abraham ho sɔ la a pɔga Sarah n dɔgɛ hɔ. N yi' en te a dela boraa yeŋa ge n kan' en te a buuri wi'ɛ na. 3 Na'ayenɛ wan tare sunbogohom la Zion daboo na. Enŋa wan lɛbege a kɛ'ɛŋa zen'an wa te a wan ta ana wo Eden la ge a pɔgɔtia wan ta ana wo Na'ayenɛ va'am la. Te Zion nya dɛ'ɛna. A wan pɛngera, ge yoona la nyeema. 4 N nɛreba wa, be'e ya toba kelehe mam soŋa. Mam wan bo pa'alegɔ bo ya te la wan bahɛ te n yelemɛŋɛrɛ nɛɛ wo bugum la bo teŋhe woo. 5 Sɛba n boe ko'kantɛ yakenɛ ha la gure la mam te n fan' ba bahɛ. N kpe'em mɛ, ge me maahom. La kan yuue la mam wa'ana fan' teŋhe wa bahɛ, ge sɔe behera se.6 Gorege ya behɛ saazuo wa, ge sure behɛ teŋparɛ wa. Saŋgbanɛ wa wan mɛlom wo bugum zun'uhe la. Teŋparɛ wa me aanhom wo fuo la. Nɛra woo n boe teŋparɛ wa zuo wan ki wo zun'uhe la. Ge mam yelemɛŋɛrɛ la ka tare tɛka. Mam faanrɛ paŋa la ka tare ba'ahegɔ. 7 Ya han bɔta te ya eta som, ge nana mam pa'alegɔ la ya sunya zan'an, ye be'e ya toba kɛleha mam soŋa. Nɛreba han toora ya, ge tɔgɔra yelese'a n ka nare bɔ'ɔra ya, da bahɛ ya te bala kɔ'ɔhɛ ya giinla. 8 Guŋa wan mɔgɛ bama doma woo ba'ahɛ, te zunzunya di ba wo mɔka n mɔgɛ to'o la. Ge mam yelemɛŋɛrɛ ka tare tɛka. Mam faanrɛ paŋa la ka tare ba'ahegɔ. 9 Na'ayenɛ, vaɛ ihege eŋɛ wo hom yuun eŋɛ se'em to sɔyaabdoma saŋan ha la. Dagɛ hom yuun ko Mizraim teŋa? 10 Dagɛ hom yuun bahɛ te ko'kantɛ la ga'ɛ ge te ho nɛreba nɛ kɛ'ɛŋa poan tole la?
11 Sɛba Na'ayenɛ yɔ' bahɛ la wan lebe Zion poan la yooma, ba sore la zuo. Popeelom muŋa te ba wan vuge, ge ninbɔn'ɔn la sunsagaŋɔ wan mɛlom. 12 Mam n de Na'ayenɛ, mam mɛŋa n kpemehere ya. Bene zuo te dabeem tara ya la nɛresaaleba? Ba dela sɛba n wan ku'e ki wo mɔɔ la. 13 Bene zuo te yamam tamɛ mam se'em n de ya Na'ayenɛ naana la yele mɛ? Mam n yeregɛ saazuo wa, ge ɛɛnbɛ teŋparɛ wa ɛnberɛ. Bene zuo te daarɛ woo ya zote la dabeem la nɛresɛba sunsunya n nyie la ya te ba maahom te ba daam ya la. Nananawa ba bɛɛ? 14 Se'em woo n boe namehegɔ poan kɛla wan nyɛ faanrɛ. Ba kan ki' to paka deo ge te kom kan tara ba. 15 Mam yeti n soŋɛ ya, Mam de Na'ayenɛ ya Yenɛ la, se'em n bahere te ko'mi'inhe ŋmɛ'ɛra la. Mam yu'urɛ dela Pɛɛntɛɛnreba Na'ayenɛ.
16 Mam n dekɛ n yelehom eŋɛ ho nɔɔrɛn, n wan guma hɔ te sɛla kan daane hɔ. Mam yeregɛ saŋgbana wa, ge ɛɛnbɛ teŋparɛ wa ɛnberɛ. Nananawa n yeti, Zion ho nɛreba la dela mam nɛreba. 17 Yerusalem, ihege saazuo. Ho ba' nyu' Na'ayenɛ sunsunyiim wanɛ la poan buge mɛ. Ho nyu de poan ba'ahɛ mɛ nya gɛnta. 18 Ho kɔma kooŋɔ la, la kayena me ka boe wan gura bii soŋɛ hɔ. 19 Sagaŋɔ la gbirigere la kom la so'a n wɔnregɛ hɔ. Ane mam ta'an bogelɛ ho suunre? 20 Na'ayenɛ ho Yenɛ la eŋɛ la suunre la hɔ, bala te ho kɔma lige gan'an sɛnka woo poan wo walega te baŋa nyɔkɛ la.
21 Ho boe la daaŋɔ poan, buge ge ka nyu daam. Bala be'e ho toba kɛleha. 22 Ho Daana Na'ayenɛ ho Yenɛ gu'ura ho la yeti, N to'e n sunsunyiim wanɛ la ho nu'uhen te ho bugura la. Ba kan le pɛnregɛ hɔ te ho nyu de poan yɛ'ɛha. 23 N nya wan ton dekɛ de bo la ho diŋdoma la n dekɛ ho lebege tentɔnɔ nɛɛra ho zuo ban bote se'em la.