Mam sɛ' hɔ ze'ele kalam te ho dɛna la nɛɛhom
49
1 Nɛra woo kɛleha soŋa, yamam sɛba teŋhe n zaan bɔna ko'kantɛ yakenɛ ha wa, kelehe ya soŋa. Na'ayenɛ pon te'ele loe mam mɛ, segɛ mam yu'urɛ ge te ba baŋɛ dɔgɛ mam. 2 A eŋɛ te mam nɔɔrɛ yetɔgom dita mɛ wo so'a, ge sogɛ mam ana wo pɛɛnɛ bɔna a loko poan. 3 Na'ayenɛ yele mam yeti, Israel, ho dela mam yameŋa. Nɛreba wan doohe la hom poan na'ahɛ mam. 4 Mam yele n mɛŋa yeti, Mam taregɛ ya, mam sagom n saŋa bahɛ la yoo. Ge n dekɛ bo la Na'ayenɛ, a wan yɔ mam sɛla n de en denɛ. Mam yɔɔrɛ n bo mam Yenɛ zen'en. 5 Ban pon ta dɔgɔra mam la, te Na'ayenɛ pon te'ele loe mam mɛ te n dɛna a yameŋa, tare Israel nɛreba lebe a zen'an na. Bala, Na'ayenɛ bo mam la zuo, ge bo mam paŋa.6 Te Na'ayenɛ yele mam yeti, Ho yeen dɛna mam yameŋa ma'an la pon ka seke. Ho tare Israel buuri nɛresɛba n gee la lebe na la ka seke. Mam sɛ' hɔ ze'ele kalam te ho dɛna la nɛɛhom bo teŋhe. Dekɛ mam faanrɛ paŋa wa te ka paɛ nɛra woo n boe teŋparɛ wa zuo. 7 Na'ayenɛ la, Israel Faanra la a Fa'adaana la yeti, bo se'em te teŋa doma kan na'aha. Enŋa n de nadoma yameŋa. Nadoma la kpɛ'ɛndoma wan pɔnta na'ma ho nɛŋa na'aha hɔ. Na'ayenɛ, Israel Fa'adaana se'em n de birikindaana la loe hɔ. 8 Na'ayenɛ yeti, N wan kelehe ho sohoga. N yehe la saŋa te n soŋɛ hɔ, n wa'ana fan' hɔ bahɛ.a Mam loe ho te dekɛ mam nɔbiŋere wa te de paɛ teŋhe sese'ehe. Ho wan lebehe mɛ teŋa wa en lebege daboo wa, te nɛreba wa'ana kɛn'ɛra ka poan. 9 Ho wan yu'uhɛ sɛba n boe paka deto poan bahɛ, te ba nyɛ wontɛɛŋa. Ba han yɛ'a kula, ba wan nyɛ dia kekeko dita. Zɔya se'a n ku'e la, yaama wan puhe a zuo. 10 Ba kom kan don, bii ko'nyuuro tara ba. Wontɛɛŋa kan ŋmɛ' ba bii sabeeo tuluga lobɛ geele ba. N wan tara ba yɛ'a kolehe se'ehe n tare ko'somɔ la poan, ge zɔta ba ninbɔn'ɔn. 11 N wan bahɛ te zɔya lebege sɔya. N wan zɛnkɛ sore paalehe. 12 N nɛreba wa ze'ele teŋse'ehe n zaan la poan lebe na, ba wan ze'ele zuɔ bɔba la nɛŋa bɔba teŋhe wa. Mam nɛreba n bo Sinim teŋa poan wan lebe na. 13 Yele saazuo la teŋparɛ te ba dɛ'ɛna, ge yoona. Yele zɔya te ba lagom yoona. Na'ayenɛ nɛreba wa namehɛ mɛ, ge a zɔ' ba ninbɔn'ɔn mɛ, ge bogolɛ ba suunre.
14 Zion teŋa yeti, Na'ayenɛ bire la a poore bahɛ mam, n Daana tamɛ n yele. 15 Te Na'ayenɛ lebehe yeti, Bimadaana wan ta'an tamɛ a bia n mɔgɔrɛ en la yele? A wan ta'an yaɛ bilɛa sɛka n ze'ele a mɛŋa pooren yehe na? Bimadaana han wan ta'an tamɛ bala, mam Na'ayenɛ kan malom ta'an tamɛ yamam yele bala. 16 Ya teŋa la golɛ eŋɛ la mam nu'talɛ poan. Mam tɛn'ɛhe ya yele la saŋa woo. 17 Ya teŋa la wan malom mɛ' tɔtɔ gana ban daa sagom se'em la, ge sɛba n zaberɛ la ka la wan bahɛ ka zabega. 18 Lobe ho nini behɛ, ho wan nyɛ ho nɛreba la te ba lɛbera kula na. Na'ayenɛ yeti, N han vom, Ho teŋa wa, la ka nɛreba wan ana soŋa wo pɔka n maahom te ka ele, yɛ ka nonɔm lɔgɔrɔ ana soŋa se'em la.
19 Ho teŋa wa la dela daboo. Sɛsɛla ka yee ka poan, ge ka wan le mɛ, te nɛreba le perɛ ka. Ho diŋdoma la wan zɔ keŋɛ zaan. 20 Teŋa la dela pɔka te ka sera ki, te ka bɔna kɛlega poan ge virige dɔgɛ. Kɔma wa wan zo'e na yeti, Zen'an wa pɔ'ɛ mɛ bo tomam. 21 Te ho me soke ho meŋa yeti, Ane n dɔgɛ mam bama? Mam sera ki te mam kɛla ge mam ka dɔgɛ. Behɛ, n ka tare nɛra, n bɔna la zen'an la ma'an. Ane n uge kɔma wa? Kɔma wa ze'ele la bɛha na? 22 Daana Na'ayenɛ la yeti, N wan bo teŋhe nɔɔrɛ te se lebehe dekɛ ho dayɔɔhe la ho pɔyɔɔhe eŋɛ hom Yerusalem nu'uhen. 23 Teŋse'ehe poan te ho kɔma la bɔna bini zo'e la nadoma la se pɔgɔnadoma wan wa'ana pɔnta na'ma ya nɛŋan, te nadoma la dɛna ho sɔdoma, te pɔgɔnadoma la me dɛna ho madoma te ba yɔɔla hɔ wo pɔsɔɔ n yɔɔle bia se'em la, te ho baŋɛ te mam de Na'ayenɛ, te vi kan di sɛba n gura mam. 24 La ka tɔe te ho fan' taroma potɔya n kpe'em nu'uhen bahɛ, bii nɛresɛba te diŋdaana nyɔkɛ.
25 Na'ayenɛ pon yeti, a wan zabɛ bo to, ge fan' to kɔma to diŋdaana se'em n kpe'em, ge kɔ'ɔn zabera to la nu'uhen bahɛ. Mam wan zabɛ la nɛreba la n zabɛ hɔ ge n wan fan' ho kɔma. 26 N wan bahɛ te potɔpa wa obe ba mɛhe nɛnɔ, ge nyu' ba mɛhe ziim buge. Te asaala woo baŋɛ te mam Na'ayenɛ n de yamam Faanra la Sɛba N Yɔ' Bahɛ la Yakob Yenɛ Kanrɛ.