Kaldeadoma, ana baanlam
47
1 Babilon teŋa ane wɔlam te sɛla ka kalom ka nana, ge ka wan tee. Yɛɛ ho na'am la, ge lebege taroma. 2 Pɔhɛ nɛɛna ki. Pilige sɛla te ho dekɛ pin mɛŋa la bahɛ. Sɛngehɛ ho lɔgɔsonɔ la bahɛ ge yagehɛ kolaahe. 3 Nyanɛ wan di ho beele la poan. Se'ere n sɔe la, mam yeti n lerege ho mɛ, se'em kan peɛn. 4 Tomam Faanra, a yu'urɛ dela Pɛɛntɛɛnreba Na'ayenɛ. Enŋa n de Israel Fa'adaana. 5 Kaldeadoma, ana baanlam. Zin'an digi digi, ho kan le dɛna teŋhe pɔgɔnaba.6 Mam suunre n daa nyie la n nɛreba la zuo te mam bo ho sore te ho to'e ba teŋa la, ge diihe ba nyanɛ. Ho daa ka zɔ ba ninbɔn'ɔn, ho puurɛ daa ba' tola mɛ la ba bonkɛgehe la. 7 Ho yele ho mɛŋa yeti, N kɔ'ɔn yeti n dɛna la n pɔgɔnaba yɛ'ɛha. Hom daa ete la hom bote se'em, ka tɛn'ɛha te daanse'ere yele wan ta nyɔkɛ hom me.
8 Ho tɛn'ɛhɛ te hom ma'an n de paŋa zan'an daana, ho kan malom lebege pɔkɔɔnrɛ bii ho kɔma zan'an wan ki'. Sɛla n mɔ'ɛ ho nini dela nyɛlom ma'an, ge nananawa, kɛleha mam yeti se'ere wa. 9 Daarɛ deyena wa'ana, boyi' doma wan eŋɛ. Ho nya wan lebege pɔkɔɔnrɛ la ho kɔma zan'an wan ki'. Han dagɛna bala, ho tiim la ho yooŋɔ paŋa la kan ta'an le eŋɛ. 10 Ho sogɛ la be'em poan wo soka zan'an la ge yeti, Nɛnɛra kan nyɛ mam. Ho ba' nam la ho mɛŋa te hom ma'an n mi'.
11 Ge sɛla pon kan eŋɛ ho te ho baŋɛ, ho ta nyɛ la muguhego n sige ho zuo, te ho yooŋɔ tiim la zan'an koŋe bo soŋɛ hɔ. 12 Ze'ele soŋa soŋa la ho tiim, la ho behereba tooma poan wo hom ne pon eta se'em la. Daanse'ere la ba wan soŋɛ hɔ ge ho wan bahɛ te nɛra woo wan zɔ' la dabeem hon zuo. 13 Ho ko la ho mɛŋa en bala, la hom dole sɛba n behere ŋmarega la. Ŋmarebibihe ɛɛra kan'aŋɔ ba zan'an la. Doohe ba poore te ba pa'alɛ hɔ sɛla n ye na, la hom wan eŋɛ se'em fan' ho mɛŋa sɛla n yeti la eŋɛ wa poan. 14 Nɛresɛba en dekɛ ba mɛhe delom ŋmarebibihe ka tare paŋa wo sɔgɔrɔ en ka tare paŋa bugum poan se'em. Ba ka tare bugum saana te ho wan ɔɔhɛ bii bo dita te ho zɛ'a lɛm bɔ. 15 Hom ihege na, nɛrebana taaba te hom la bama tom tooma ta paɛ zina. Ge ba mɛhe pon ka mina ban ye' zen'an, bii ba ta'an fan' hom bahɛ.