Da zote ya dabeem
43
1 Yakob yaahe wa, mam Na'ayenɛ n naam ya, ge sɛ ya teŋa Israel ze'ele, da zote ya dabeem. Mam fan' ya bahɛ. Mam tare ya na, nananawa, ya dela mam nɛreba. 2 Ya han yakera ko'kanra, mam wan bɔna la ya, ya han yakera kolaahe kanra, n wan bɔna la ya te ko'om la kan di ya. Ya han sige bugum poan kena, bo kan di ya bii bugum zɛleŋa wobelɛ ya. 3 Mam de Na'ayenɛ ya Yenɛ la, Israel Fa'adaana la. Na'ayenɛ se'ere n fan' ya bahɛ la. Mam dekɛ la Mizraim la Kus la Seba teŋhe vom tee ya. 4 Ya dela toolom lɔkɔ bo mam, n nɔŋɛ ya mɛ. Bala zuo te mam dekɛ teŋhe, la se nɛreba vom teehom ya la. 5 Da tare ya dabeem, mam boe mɛ la ya. Mam wan ze'ele dapɔya, la nɛŋa bɔba kan'ahe ya na lagom taaba. 6 N wan yele zuɔ, la gɔbega bɔba teŋhe wa yeti, Bahɛ ya mam dayɔɔhe la n pɔyɔɔhe la woo. Bahɛ ya te se ze'ele teŋhe en zan'an la poan lebe n zen'an na. 7 Ba dela mam nɛreba, mam naam ba zan'an, te n yu'urɛ nyɛ pɛnka ba poan.8 Bahɛ ya n nɛreba wa. Ba tare nini, ge ba nini ge ka nyɛta, Ba tara toba, ge a ka wone. 9 Bahɛ te nɛra woo teŋparɛ wa zuo lagahɛ na. Se'em ka boe ba poan wan ta'an yeti enŋa daa yele se'em la en bala tona wa. Se'em han wom te se'em boe ba poan yele bala, a daana ze'ele pa'alɛ te enŋa daa yele se'em n bala tona wa. 10 Na'ayenɛ yeti, N nɛreba wa, yamam la mam yameŋa wa te n loe wa n de mam seradoma. Mam bote ya mina mam mɛ, ge dɛla mam, ge bɔkɛ te mam ma'an n de Yenɛ. Mam ma'an ne pon dɛna Yenɛ, yenɛ ka boe mam nɛŋa bii pooren. 11 Mam ma'an n de Na'ayenɛ, faanra ka boe han dagana mam ma'an. 12 Mam biŋe la nɔɔrɛ te n fan' ya bahɛ, seren ta fan' ya bahɛ. Yamam de mam seradoma te yenɛ ka boe tabelɛ tom dena. Mam n de Yenɛ. Na'ayenɛ yele se'em n bala. 13 Mam se'em n wan bɔna wuuha. Se'em ka boe wan ta'an fan' ya mam nu'uhen. Mam toon la mam tooma la ane n sagom ka?
14 Na'ayenɛ n de ya Faanra, Israel Fa'adaana, n yele ya wanna: Mam yeti n fan' ya bahɛ. Yamam zuo, n wan dekɛ pɛɛntɛɛnreba tuunle Babilon teŋa, te ba zabɛ nyaŋɛ ka, te ba taɛ kaahega. 15 Mam de Na'ayenɛ, ho Fa'adaana. Mam n de se'em n naam Israel, ho naba la. 16 Na'ayenɛ yele se'em n wana. Enŋa gan'ɛ sore ko'keŋɔ poan la. 17 Enŋa sa'ahɛ pɛɛntɛɛnreba dige ya la yiri la zaba toroto la. Ban bala ki gan'an digi digi ka eta nugu la. Ba ane wo butolela bugum n dite te ba pebele bugum zɛleŋa la te bo keŋɛ se'em kalam la. 18 Tamɛ sɛla n eŋɛ yuuman yuuman ha la, da tɛn'ɛha sɛla n eŋɛ tole yele ma'an.
19 Behe! N ete la yelepaalɛ. Denɛ wana, Ho nyɛ dɛ? N ŋmɛ la sɔya pɔgɔtia teŋhe poan, gaaɛ kolaahe zen'an te ko'om ka bɔna. 20 Mɔɔen dunhe woo na'ahere mam mɛ. Sanhe la viinɔ na'ahere mam mɛ la. Mam bo ko'om mɔen ha, ge gaaɛ kolaahe pɔgɔtia poan, bo ko'om nɛresɛba te mam mɛŋa loe ba la. 21 Nɛresɛba te mam naam bo mam mɛŋa la wan pɛngɛ mam.
22 Yakob, ho ka yi'ira mam mɛ. Israel, ho taregɛ ya ge dagɛ hom po'ohe mam la zuo. 23 Dagɛ piihe, la nyɔ'an bo'olom kaanbegɔ te ho tara na'aha mam. Mam me ka sohore ya boom bo'olom bii digilom bɔ'ɔra ho zeero. 24 Ho ka kɔ'ɔre mɔɔ n tare nyuŋo soŋa na bɔ'ɔra mam, bii ho ne kaanbe dunhe dekɛ se nɛnɔ sonɔ la bo mam. Ho toonbe'ero la n ton dɛna zeero te ho dekɛ ziile mam. 25 Ge la bala zan'an mam wa duuhe ya be'em la bahɛ mɛ, n yu'urɛ la zuo. Bala zuo, n wan tamɛ be'em sebo woo te ho tom la. 26 Bahɛ ya te to zin'ire tɔgɛ, te ya pa'alɛ mam ya boorɔ. 27 Ya yia sɔyaaba ton be'em. Ya nɛŋadaana bire a poore bahɛ mam mɛ. 28 Bala zuo te mam ka bahɛ te ya malema nɛŋadoma la tona bɔ'ɔra mam la. Mam bahɛ te Yakob sagom mɛ ge te nɛreba la'ara Israel.