Na'ayenɛ, hon de mam Yenɛ
25
1 Na'ayenɛ, hon de mam Yenɛ. Mam wan zɛnkɛ la hom. Mam wan pɛngɛ la hom yu'urɛ la. Hom tom la nyalema. Ho tom yelese'a te ho maahom wonse'eren ha la mɛ. 2 Hom n sagom teŋa te ka lebege tampogerɛ, ge bahɛ te teŋsɛka te dangoone mɛ kae ka lebege daboo. Zen'sɛka n daa ne perɛ la saama la ka le dɛna sɛla. Ka kan le malom mɛ. 3 Bala zuo, teŋhe n kpe'em wan na'aha hɔ. Teŋkanra n tare nɛre wuruba wan na'aha hɔ. 4 Hom n de taromdoma tɛ'ɛla. Hom n de nahadoma tɛ'ɛla, ba sunsagaŋɔ saŋa. Hom dela soka zen'an sabeeo saŋa. Hom dɛna ma'ahom wontɛɛŋa saŋa. Nɛreba wuruba vo'ohom la ana wo 5 Hom ne tulugɛ mɛ wo ware saŋa wontɛɛŋa la, di saama zaberɛ woolego. Ho ne ana mɛ wo tuluga n ze'ete saŋgbanɛ poan na la, ma'ɛn nɛre wuruba zaba yooma.6 Pɛɛntɛɛnreba Na'ayenɛ mɛŋa n wan dogɛ disoŋa bo sɛba woo n boe zoore wa zuo la. Disɛka n tare daamsomɔ, la nɛnɔ sonɔ n tare kaam, la daam n bi'ihe paɛ. 7 Zoore dena wa zuo te Na'ayenɛ wan sagom yelese'ere n pin' nɛreba woo la bahɛ. A wan pilige yelese'ere n pin' teŋhe woo la bahɛ. 8 A wan sagom kum zan'an zan'an bahɛ. Daana Na'ayenɛ wa wan duuhe nintam nɛra woo ninin bahɛ. A wan foe toya se'a woo n tare toora a nɛreba teŋhe woo poan bahɛ. Na'ayenɛ yele se'em n bala.
9 De daarɛ, nɛreba wan yeti, Behɛ, to Yenɛ la n wan te to ne gu'uha te a fan' tɔ bahɛ la. Na'ayenɛ se'ere te to ne gura la n wana. Bahɛ ya te to nyeem, te to poorɛ pee la to faanrɛ wa. 10 Na'ayenɛ paŋa wan bɔna zoore dena wa zuo. Ba wan nɛ Moab taalɛ a zen'an la, wo mɔɔ te ba nɛɛra feta bɔn'ɔhegɔ poan se'em la. 11 Moab wan tɛɛn a nu'uhe kpita bini wo nɛra n kpiti ko'om poan se'em la. Yenɛ la wan bahɛ te a teŋa la pa'alɛ mɛŋa la sige teŋa, la a nu'uhe nigiŋɔtooma la zan'an. 12 Na'ayenɛ wan zan' Moab yikanra dangɔɔma la bahɛ, bure ba buuri buuri, yeregɛ ba bahɛ te ba lebege puuhugo.