Liligere Bɔ'ɔn yele
22
1 Liligere Bɔ'ɔn yele n wana: Bene n sɔe te ya te ya zom ya yiya gɔhɔrɔ zuto yaga? 2 Voole kantɛ la gbirigere la gbɛka teŋa wa? Ho nɛreba la n ki la dagɛ so'a n kɔrom ba. Ba ka ki pɛɛnbɔn'ɔn la poan. 3 Ho nɛŋadoma zan'an zɔ mɛ te ba dige nyɔkɛ ba la nu'beela. Ban nyɔkɛ yamam sɛba woo la, ba pagɛ ya mɛ. La ban pon zɔ zaan la, ba wan ba'ahom nyɔkɛ ba na. 4 Bala te mam yeti, Ya bahɛ mam n ma'an te n kele n nintam man'aha. Da sugulom ya mam, la ban sagone mam teŋa wa pɔyɔɔhe la se'em la.5 To Daana, Pɛɛntɛɛnreba Na'ayenɛ la loe la gbirigere la ane tabelɛ la dabeem dabaherɛ bahɛ Liligere Bɔn'ɔn wa zuo na. De dela dabaherɛ te ba wan zan' dangɔɔma baha na, dabahese'ere te ba wan kaaha bɔ'ɔra zɔya ɛɛra soŋorɛ. 6 Elam teŋadoma yɛ la ba logoro. Ba maahom sɛba n tukure a yiri toroto la ba yiri te Kir teŋa maahom ba zaba te'elehe. 7 Zaba toroto ma'an n wan perɛ ya bɔn'ɔrɔ la. Pɛɛntɛɛnreba n wan gum ya teŋa nayahe la. 8 Ba vɔn' Yuda n dekɛ sɛla go' a mɛŋa la mɛ. De daarɛ, ho dekɛ ho mɛŋa delom la ho zaba lɔgɔseto n gan' Lebanon Tiihe Yire. 9 Ho nyɛ te yogoro n zo'e naba David Teŋa dangɔɔma la poan. Ho angere ko'om la Teŋa Bɔgɔhe la poan. 10 Ho kaanlɛ Yerusalem teŋa yiya la mɛ, aanhom a se'a bahɛ, te ho dekɛ a kuga la mɛ teŋa la dangoone la zen'se'ehe n sagom la. 11 Ge mɛ' ko'om etegɔ zen'an dangɔɔma ayi' teŋasoka tee ze'ele ko'om etegɔ zen'kɛgehe la na'arɛ. Ge ya ton ka dekɛ ya mɛŋa delom se'em n maalɛ ka la, bii ya tɛn'ɛhɛ se'em n maahom yele ana wonse'eren ha la yele. 12 Bala te de daarɛ, Daana la n de Pɛɛntɛɛnreba Na'ayenɛ la yi' ya na te ya kele, la ya fabelɛ, la ya siie ya zuto, ge yɛ sunsagaŋɔ futo. 13 Ge behɛ, nyeema la gbɛka n ton bɔna. Ba kɔrɔna nii. Ba koor piihe. Ba ɔbera nɛnɔ. Ba nyuura daam. Ya yele ya mɛhe yeti, Bahɛ ya te to di ge nyu, beere wana ma'an te to ki ya.a
14 Pɛɛntɛɛnreba Na'ayenɛ la lilige se'ere bo mam dela, kaanbegɔ ka boe bo be'em bona wa, gura ya kum. To Daana, Pɛɛntɛɛnreba Na'ayenɛ yele se'em n bala.
15 To Daana, Pɛɛntɛɛnreba Na'ayenɛ la yeti, Keŋɛ tontona Sebna wa n behere naba yire wa zen'an ta soke en yeti, 16 Hom nyɛ sore la bɛ? Hom tare la ane ka'lam te a bo ho sore te ho maalɛ ho mɛŋa yɔɔ ka'lam? Hom zom la kuŋkune zuo ta maalɛ ho mɛŋa yɔɔ? Hom maalɛ la ho mɛŋa pin'an zen'an taŋa poan? N bahɛ te hom kebegɛ ho yɔɔ taŋa poan zen'sɛka te ba pin'ira nabiihe la teŋsɛka? Ba ka tabelɛ pin' ho sɔɔn nabiihe pin'an zen'an la poan.
17 Behɛ, Na'ayenɛ yeti a gorɛ ho mɛ zan'ɛn ho bahɛ na, hom. Ho nɛre kpe'eŋo wa. A wan bahɛ ho yoo. 18 A wan nɛ ho tabelɛ, tɛbera ho la na'ma. A wan lobe ho bahɛ teŋa n yalegɛ poan te ho ki bilam. Ho na'am toroto la wan bɔna la bilam ha. Hom n wan dɛna ho daana la yire nyanɛ lɔkɔ. 19 N wan foe ho, ho zen'an la poan. N wan ve'e ho hom yage zen'an la bahɛ na.
20 De daarɛ n wan yi' n yameŋa Eliakim, Hilkia dayɔa la. 21 N wan dekɛ ho futo la tee yɛ en. N wan dekɛ ho muŋa la vuge en. N wan dekɛ ho kpe'eŋo la tee bo en. A wan dɛna sɛba woo n boe Yerusalem teŋa, la Yuda yiredoma zan'an sɔ. 22 N wan dekɛ David yire kenɔ boe en. Sɛla te a yu'ɛ nɛra kan ta'an yu'. Sɛla te a yu', nɛra kan ta'an yu'ɛ. 23 N wan kpa' en wo kpa'a te ba kpa' ka kɛ'ɛŋa poan te ka sige kpe'em se'em kaŋkaŋe la. A wan dɛna na'ahegɔ na'am gɔŋɔ bo a sɔ yire la. 24 Ba wan dekɛ a sɔ yire na'ahegɔ la zan'an yɛɛle en. Ba dela yaahe la kɔma la lɔgɔrɔ zan'an, pɔhera lɔgɔ peka ta paara lɔgɔkantɛ, bii laakanra ta paara dogorɔ zan'an soŋa wan dekɛ bo en.
25 Pɛɛntɛɛnreba Na'ayenɛ la yeti, De daarɛ, kpa'a sɛka n pon kpa' kɛ'ɛŋa poan zɛ'a kaŋkaŋe la wan voen, te tebehegɔ seko n yule ka la tɔnhegɛ. Na'ayenɛ yele se'em n bala.