Mizraim teŋa yele n wana
19
1 Mizraim teŋa yele n wana: Behɛ, Na'ayenɛ yage la saŋgbanɛ n kanbele poan, yɛ'a Mizraim teŋa na. Mizraim teŋa baga la wan gbe'era mɛ a nɛŋan, te teŋa la nɛreba giinla kɔ'ɔhɛ. 2 N wan dekɛ ba tuluge taaba, te ba nɛra zabera la a sɔɔn, te nɛra woo zabera la a sɔɔn. Teŋkantɛ wan zabera la teŋkantɛ, te sɔ'ɔlom zabera la sɔ'ɔlom. 3 Sunkanberɛ se'ere n boe Mizraimdoma wa poan la wan mɛlom, te n eŋɛ te ban maahom sɛla woo la bahɛ yoo. Ba wan ɛɛra kan'aŋɔ ba baga la ke'endoma la bakolo la sɛba n behere zen'an. 4 N wan dekɛ Mizraim teŋadoma wa eŋɛ daana sɛka n tara potɔɔ nu'uhen. Naba n kpe'em wan sɔna ba behera. To Daana Pɛɛntɛɛnreba Na'ayenɛ yele se'em n bala. 5 Nile Kolaa la wan ku'e, te ka nɔgbɛma tabɛ. 6 Ka kolaahe wan ku'e tabɛ. Mizraim teŋa bɔgɔhe la wan ku'e. Mɔɔ wɔgɔrɔ, la tuntu man'aha la wan ku'e. 7 Tia woo n ze' Nile Kolaa wa nɔɔrɛn wan ku'e, te vatɔ woo n lɛm bini ku'e te sabeeo kaan ba keŋɛ.8 Zim nyɔgereba wan unha ge fabela, la sɛba woo n lobere zimbanhe kolega poan la. Sɛba n lobere yogohe ka poan la zan'an wan bire keŋɛ. 9 Sɛla n pa'ahɛ la, guno fusonɔ woka, la sɛba n wogore fupeelo sonɔ la kan le ta'an eŋɛ sɛla. 10 Bontateba la nɔya wan yalegɛ, te sɛba n tone tɔ'ɔha yɔɔra sunya wan sagom. 11 Zoan teŋa kpɛ'ɛndoma la dagɛ sɛla. Ba dela gɔɔnɔ. Sɛba n de naba Faro yamdoma kan'ana en la tare la gɔɔn kan'aŋɔ. Bene te ba yele Faro yeti, Tomam dela yamdoma. Tomam dela la deemen deemen doma la podɔleba? 12 Bala, ho yamdoma mea bɛɛ? Soso bahɛ te ba ye yele ho. Bahɛ te ba yele ho se'ere te Pɛɛntɛɛnreba Na'ayenɛ wa maahom bahɛ Mizraim zuo na wa.
13 Zoan teŋa nabiihe tom la gɔɔnɛ, dɛna gɔɔnɔ. Mempis teŋa nɛŋadoma boe la pan'ahegɔ poan. Kpɛ'ɛndoma la n de nɛreba la teŋasoka yuuŋa la pan'ahɛ Mizraim teŋa mɛ te ka ta bɔregɛ. 14 Na'ayenɛ dekɛ ba tuunle la tuluŋɔ. Ba tare Mizraim teŋa mɛ te ka ta bɔregɛ ka sɛla woo poan, nya ana wo daam bugura n lerene a mɛŋa a tiinro poan la. 15 Sɛla ka boe Mizraim teŋa wa poan te keendoma la birikindoma la wan tom.
16 Pɛɛntɛɛnreba Na'ayenɛ la han zɛnkɛ a nu'o nameha Mizraimdoma wa. Ba giinla wan kɔ'ɔhɛ, te ba gbe'era la dabeem. 17 Yuda teŋa wan ba' tara ba dabeem bo Mizraim teŋa. Ba han ne wom Yuda yu'urɛ, dabeem n ne ba' kɛn' ba. Wana wa dela Pɛɛntɛɛnreba Na'ayenɛ la n maahom te a eŋɛ Mizraim teŋa se'em la zuo.
18 Saŋa kene na te Mizraim teŋhe senuu wan ta tɔgɔra Hebru teŋa yetɔgom, ge pɔ' te ba wan dɔla Pɛɛntɛɛnreba Na'ayenɛ la. Teŋhe wa kayema yu'urɛ ta yi'ira la Sagaŋɔ. 19 De daarɛ, ba wan mɛ kaanbegɔ zen'an Mizraim teŋa poan bo Na'ayenɛ. Ba wan sɛ kuga ba teŋa la beene zuo bo Na'ayenɛ. 20 La wan dɛna danlehom la aseradaana bo Pɛɛntɛɛnreba Na'ayenɛ la Mizraim teŋa poan. Muguhego wan bahɛ te Mizraimdoma wa kaahɛ bo Na'ayenɛ. A wan tom faanra n de nyaŋera bo ba na, te a fan' ba bahɛ. 21 Na'ayenɛ wan nɛɛ a mɛŋa de daarɛ pa'alɛ Mizraimdoma se'em n bala. Mizraim teŋadoma wan baŋɛ n de daarɛ la. Ba wan na'ahɛ Na'ayenɛ la ba kaanbegɔ la ba boom bo'olom, ge biŋe nɔya bo Na'ayenɛ, ge seren tom a. 22 Na'ayenɛ wan damɛ Mizraim. A wan damɛ en ge le tebɛ en. Bala te ba wan ŋmɛregɛ lebe Na'ayenɛ zen'an na, te a kelehe ba, ge tebɛ ba.
23 De daarɛ, sore kantɛ wan ze'ele Mizraim teŋa yɛ'a Asiria teŋa, te Asiriadoma kena kɛn'ɛra Mizraim, te Mizraimdoma me kena Asiria teŋa, te Mizraimdoma naɛ la Asiriadoma na'aha Na'ayenɛ. 24 De daarɛ, Israel wan naɛ la teŋhe seyi' wa. Ba wan dɛna kan'somɔ teŋparɛ wa zuo. 25 Pɛɛntɛɛnreba Na'ayenɛ la wan kan' som bahɛ ba zuo yeti, Kan'somɔ bɔna mam nɛreba Mizraim teŋadoma zuo, la Asiria teŋadoma te mam mɛŋa nu'o maalɛ wa zuo, la Israel n de mam sɔ'ɔlom wa zuo.