Damaskus teŋa yele n wana
17
1 Damaskus teŋa yele n wana: Behɛ, Damaskus teŋa kan le dɛna teŋkantɛ. Ka wan lebege daboo. 2 Se'em kan le kɛn'ɛra Aroer teŋkanra la poan, piihe wan kaahena bilam te se'em ka bɔna wan vuunhe se. 3 Teŋkantɛ la wan mɛlom Epraim teŋa wa poan, te kpe'eŋo yehe Damaskus, la Aram teŋa nɛreba la n yee fiin la poan. La wan eŋɛ ba wo lan yuun eŋɛ Israel soŋa la se'em la. Pɛɛntɛɛnreba Na'ayenɛ yele se'em n bala. 4 Daan dena wa daarɛ, Yakob soŋa la wan saalom, te a kantɛ la lebege baanlega. 5 La wan ana wo nɛra n buni a dia n nan ze' saazuo la, la wan ana wo nɛra nu'uhe n gin'ire dia kɛɛra se'em la, bii nɛra n yi'iha dia Arepaim bɔn'ɔn poan la. 6 Ge la bala zan'an yi'ihigo la wan kelom gee sɛla bahɛ mɛ wo ba ne miim kaam tia, te wɔla ayi' bii atan' ne ta kelom gee yula saazuin zuin ha se'em la, bii tia n wom zo'e te ba miim ka, te wɔla anaahe bii anuu ne kelom gee yula ka yila poan se'em la. Na'ayenɛ Israel Yenɛ la n tɔgɛ.7 De daarɛ, asaala wan mina se'em n naam n la, te a nini nya behera Israel Fa'adaana la. 8 Asaala kan le beha kaanbegɔ zen'enhe te ba dekɛ a nu'uhe mɛ, bii ba beha Aserah dɔɔrɔ bii zun'uhe nyɔ'an zen'enhe. 9 De daarɛ, ba teŋkanra la wan ana woo mɔen zen'se'ehe te ba tamɛ se te se kpanrɛ se'em la, bii dɔɔrɔ te ba ŋma dekɛ bahɛ la Israeldoma nɛŋan. Teŋa la wan lebege daboo. 10 Se'ere n sɔe la, ya tamɛ Yenɛ n de ya faanrɛ la yele mɛ. Ya ka tɛnre taŋa la n de ya soka zen'an la yele. Bala zuo, ya borɛ la tisonhe, tara na'aha baga. 11 Ya wan borɛ, bahɛ te ba yehe, yiimbeere wom bi'e, ge yan wan kɛ la zaŋa. Se'ere n sɔe la, de daarɛ dela ban'an la too n ka tare makerɛ.
12 Kelehe nɛrekooŋɔ ganka wa n damene wo ko'om n zote damena. 13 Teŋhe nɛreba damene mɛ wo ko'om n zote damena la, ge Yenɛ han tanhɛ ba, ba wan zɔ keŋɛ zaan. Ba wan dige ba wo sɔgɔrɔ n boe zoore zuo te sabeeo kanra tɔ se'em la bii puuhugo te sabeeo kantɛ vaara yɛ'a la. 14 Zaanɔɔrɛ wan tara ba paleŋ'ɛnka, beyiine te ba tole ya. Lan wan eŋɛ sɛba n faanre, la sɛba n daane to wa se'em n bala.