Na'ayenɛ Sea wan bɔna la en
11
1 Yile wan tobɛ Yesse poan na. Yile wan pɛngelom a tilin na wom wɔla. 2 Na'ayenɛ Sea wan bɔna la en, Sea sɛka n bo'ore yam la bɔkerɛ, Sea sɛka n bo'ore kan'aŋɔ la paŋa, Sea sɛka n bo'ore mi'ilom la Na'ayenɛ zɔɔlom la. 3 A wan nɔŋɛ Na'ayenɛ zɔɔlom. A kan tara a nini n nyɛte sɛla gankera yɛla, bii a toba n wom sɛla koora potɛn'ɛrɛ. 4 Ge tontɔɔ te a wan dekɛ tɔgɛ soŋɛ nahadoma, ge dekɛ narehom tɔgɛ soŋɛ taromdoma n boe teŋparɛ wa zuo. A nɔɔrɛ yelehom wan dɛna kpa'aherɛ ŋmɛ'ɛra teŋparɛ wa. A nɔgbanɛ yelehom wan ko be'emdoma. 5 Tontɔɔ vom wan dɛna a sɛganɛ lo' a sea. Te birikinte dɛna a sɛganɛ lo a sea. 6 Sanheŋa wan gan'an la pebila. Yeobaa wan gan'an la boa. Nagabila dɛ'ɛna la gbegenɛ. Bia behera ba. 7 Nahɔ la sanheŋa wan lagom ɔbera yaama. Te ba kɔma lagom gan'an zen'an kayena vɔ'ɔha. Gbegenɛ ɔbera mɔɔ wo lɔlega la. 8 Bia wan zɛ'a dunduo yoko nɔɔrɛn dɛ'ɛna. Bilɛa wan dekɛ a nu'o tom zaŋkaŋa yoken. 9 Sagaŋɔ bii pogoleŋɔ kan bɔna mam Na'ayenɛ toolom zoore wa woo zuo. Se'ere n sɔe la Na'ayenɛ yele wan perɛ teŋparɛ wa zuo wo ko'kantɛ poan n perɛ la ko'om se'em la.10 De daarɛ, Yesse Nyɛgerɛ la wan ze'ele dɛna danlehom bo nɛreba la. Teŋhe bibigera kena a zen'an na. A vo'ohogo zen'an soŋa wan nɛɛ. 11 De daarɛ, Daana la wan le tɛɛn a nu'o, tare a nɛresɛba n yee fiin bɔna Asiria la Mizraim la Patros la Kus la Elam la Sinar la Hamat la ko'kanra teŋasoka teŋhe la woo poan la lebena.
12 A wan zɛnkɛ danlehom pa'alɛ teŋhe, ge kan'ahɛ Israeldoma n zɔ lomehe teŋhe poan la na. A wan doohe teŋparɛ wa loga anaahe la woo poan kan'ahɛ Yudadoma la n yeregɛ la na. 13 Epraim nyuunre la wan mɛlom, te ba ŋmaɛ sɛba n daane Yuda la bahɛ. Epraim kan le nyuuna la Yuda, bii Yuda le daana Epraim. 14 Ba ton wan naɛ la taaba bibige Pilistidoma sɛba n boe zanɔya bɔba la. Ba wan naɛ taaba zabɛ buuri se'a n boe dapɔya bɔba la. Ba wan nyaŋɛ Edomdoma la Moabdoma. Te Ammondoma wan dekɛ ba mɛhe eŋɛ ba nu'uhen. 15 Na'ayenɛ wan bahɛ te Mizraim teŋa ko'kantɛ la ku'e. A wan yebehɛ kolaa la la a nu'o, la sabeeo kɛ'ɛŋa. A wan damɛ ka, te ka bɔkɛ bɔgɔhe seyopɔe, te nɛreba nɛɛra ka poan kɛ'ɛŋa yakera. 16 Sore kantɛ wan gan'arɛ Asiria na, bo Na'ayenɛ nɛre la n yee fiin bini la, wo lan eŋɛ se'em bo Israel daanse'ere daarɛ te ba ze'ele Mizraim teŋa yehe na la.