Asiria naba pon wa'ana fan' Damaskus teŋa la Samaria teŋa lɔgɔsonɔ la woo
8
1 Te Na'ayenɛ yele mam yeti, Dekɛ sɛla golehɛ lamenɛ bini. Golehɛ yu'urɛ dena wa: Maher Salal Has Baz. 2 N wan yi' n malemadoma, Uria, la Zekaria dayɔa Yeberekia na te ba dɛna mam aseradoma. 3 Te mam nɛ nɔtɔgɔha la n de pɔka la soŋen, te ka nyɔkɛ poorɛ ta dɔgɛ bodibila, te Na'ayenɛ yele mam yeti, Segɛ ka yu'urɛ Maher Salal Has Baz. 4 Se'em ma'an te bia wa wan ta ta'an yi'ira yeti, N sɔ bii n ma la, te Asiria naba pon wa'ana fan' Damaskus teŋa la Samaria teŋa lɔgɔsonɔ la woo keŋɛ mɛ.5 Te Na'ayenɛ le tɔgɛ bo mam yeti, 6 Nɛreba wa zagahɛ Siloa ko'somɔ la n zote baanlam la mɛ, ge nyeena la naba Arezin, la Aremalia dayɔa la. 7 Bala, behɛ, Daana la yeti a bahɛ te Euprates Kolaa la ko'om n zo'e ge uura la, uue ba na, Asiria naba la a pɛɛntɛɛnreba la wan uue ba na. A wan uue perɛ gaŋɛ, ɔlɔgɛ na. 8 A wan uue Yuda poan na tole, libe teŋa la paɛ nyugela beene wo ko'om n yeti bo di sɛla la, ge tɛɛn na'ma pin' ya teŋa la vo'ohom zan'an, Imanuel.
9 Teŋhe wa, kaahɛ ya tagurega. Ane ya suram. Teŋse'ehe n boe zen'an n zaan wa, kelehe ya. Maahom ya zaberɛ ge ya wan yee suram. Maahom ya zaberɛ ge ya wan yee suram. 10 Maahom ya ya wan eŋɛ se'em, ge la dela yoo. Tɛn'ɛhɛ ya yan wan eŋɛ se'em, ge la kan tom. Yenɛ n boe la tomam.
11 Te Na'ayenɛ tɔgɛ bo mam, gin' mam la paŋa, ge yele mam la ninmɔ'ɔrɛ yeti, da ana wo nɛrebana wa. A yele mam yeti, 12 Yele se'ere te nɛrebana wa naɛ nɔɔrɛ to'e de, da to'e de bala. Da zɔta sɛla te nɛrebana wa zɔta bii ho paleŋa ɛngera la sɛla n tare bama paleŋ'ɛnka. 13 Pɛɛntɛɛnreba Na'ayenɛ dela se'em ma'an n wan dɛna fa'a ya zen'an. Enŋa te ya wan zɔta dabeem la en. Enŋa te ya paleŋa wan ɛngera la en. 14 Enŋa n wan dɛna po'ohegɔ zen'an. Ge a wan dɛna la kugure n lobere nɛreba, dɛna taŋa te nɛreba sɛrona luta bo Israel buuri yiya ayi' la. A wan dɛna bɛnregɔ bo Yerusalemdoma.a 15 Nɛreba zo'e zo'e wan zɛrena de zuo. Ba wan lu kɔ'. Ba wan bɛnrɛ ba nyɔkɛ. 16 Bobe yelese'a n eŋɛ wa te de a dɛna aseradaana. Biŋɛ pa'alegɔ wa mam dɔlɔba wa teŋasoka. 17 Mam wan gura Na'ayenɛ n foe a nu'o Yakob yire wa poan wa. Mam wan ma'ɛn n mɛŋa gura en. 18 Mam n wana, mam la kɔma sɛba te Na'ayenɛ bo mam. Tomam la dela danlehom Israel teŋa poan te Pɛɛntɛɛnreba Na'ayenɛ wa n boe Zion Zoore zuo la bo to la.
Sɛba n kene lika poan la nya nyɛ la nɛɛhom kantɛ
19 Nɛreba wan yele ho yeti, Keŋɛ kolekpan'arehe bii ke'endoma n yebehere bii gɔngelena zen'an ta ɛ behɛ, ge nɛreba sone te ba soke ba yɛla la ba Yenɛ zen'an, te vɔpa me soke ke'endoma ba yɛla. 20 Ba han ta yɛta bala ya behɛ Na'ayenɛ pa'alegɔ la la a ze'elego la n de se'em. Nɛrebana kan malom mina nɛɛhom bii lika. 21 Sunsagaŋɔ la kom wan bahɛ te ba ɛɛra nyaanra teŋa la poan. Ba han ta taregɛ, ba sunya wan nyii, te ba nya gɔra beha saazuo, ge zagahɛ ba naba, la ba Yenɛ la. 22 Ba han sure behɛ teŋa, sunsagaŋɔ la lika la ɛnregɔ la sunsunyiim ma'an te ba wan nyɛta. Ba wan lobe ba bahɛ lika kantɛ poan.