Wa'an ya na te to zom Na'ayenɛ zoore
2
1 Amoz dayɔa Isaiah n nyɛ Yuda la Yerusalem teŋhe yelese'ere n wana. 2 Ba'ahegɔ saŋa la poan, Na'ayenɛ Yire wan dɛna zɔya wa woo naba, tara zuo gana zɔya wa zan'an. Teŋhe woo wan bibigera de poan na. 3 Ba wan yɛta yeti, Wa'an ya na te to keŋɛ zom Na'ayenɛ zoore la zuo. To zom Israel Yenɛ Yire la poan. A wan pa'alɛ tɔ a sɔya la te to dɔla. Pa'alegɔ la wan yehe Zion Zoore. Na'ayenɛ yelehom wan yehe Yerusalem. 4 A wan maalɛ nɔkpɛ'ɛma se'a n gan' teŋhe teŋasoka ge maalɛ nɛreba nɔkpɛ'ɛma. Ba wan vaɛ ba zaba so'ahe la kana tee kure kunya la leehe, ge dekɛ ba zaba kana kure kɛɛrehe. Teŋa kan le tɛn' pɛɛma la ka tadaana. 5 Yakob yiredoma wa, bahɛ ya te to kena Na'ayenɛ nɛɛhom la poan.Na'ayenɛ ma'an n wan sɔna na'ahegɔ
6 Hon zagahɛ ho nɛreba Yakobdoma wa mɛ, la ban perɛ la dapɔya bɔba teŋhe etegɔ la. Ba bogore la bakolo wo Pilistidoma la, ge nyɔgera saama zɔtɔ. 7 Ba teŋa wa perɛ mɛ la sanlenpeelega la sanlema te ba panrɛ ka tara makerɛ. Yiri n perɛ ba teŋa la, te zaba toroto ka tara makerɛ. 8 Ba teŋa la perɛ mɛ la baga, te ba na'aha ba mɛhe nu'uhe n maalɛ sɛla. Ba na'ahere la sɛla te ba mɛhe nu'uhe yagom. 9 Ba gan' la teŋa na'aha ba baga la. Bala Na'ayenɛ, da bahɛ ba be'em bo ba. 10 Sogɛ ya tanhe leŋen. Tun' ya teŋa sige ha. Da nyɛ Na'ayenɛ dabeem dabaherɛ la. Sogɛ ya la ya da nyɛ a gankerɛ la n tare dabeem la. Ya da nyɛ a kpe'eŋo dabaherɛ la. 11 De daarɛ, ba wan sigehe pa'alɛ n mɛŋa doma teŋa, ge sigehe nɛre wurubere woo teŋa. Na'ayenɛ ma'an n wan sɔna na'ahegɔ.
12 Pɛɛntɛɛnreba Na'ayenɛ la maahom la dabaherɛ gura sɛba n zekere ba mɛhe, la pa'alɛ n mɛŋa doma. A wan sigehe pa'alɛ n mɛŋa doma woo teŋa. 13 Dabaherɛ wa wan sige Lebanon teŋa mɔlɔsonɔ tiihe la n wɔgɛ zɛnkera se mɛhe la zuo. Dabaherɛ wa wan sige Basan teŋa tiihe kanra la zuo 14 De wan sige zɔya n wɔgɛ zuo. De wan sige zɔya n wɔgɛ kanregɛ zuo. 15 Dabaherɛ wa wan sige limihego deo woo zuo la dangoone se'ere woo n mɛ' beŋɛ teŋa woo zuo. 16 De wan sige Tarsis teŋa ɔɔnrɔnɔ kanra zuo. 17 Asaala pa'alɛ mɛŋa wan sige teŋa, te nɛreba zɛnkɛ n mɛŋa la wan sige teŋa. Na'ayenɛ ma'an n wan sɔna na'ahegɔ. 18 Baga wan mɛlom. 19 Daanse'ere te Na'ayenɛ wan ihege la a paŋa te miim teŋparɛ wa la. Saaleba wan zɔ ta sogɛ tanhe yɔgɔrɔ poan, la yɔgɔrɔ seto n boe teŋa. Ba eŋɛ a dabeem la a na'ahegɔ zuo.
20 Daanse'ere te Na'ayenɛ wan ihege la a paŋa la n tare dabeem la na te a miim teŋparɛ wa la. Nɛresaaleba wan va ba sanlenpeelega la ba sanlema baga la te ba mɛhe maalɛ po'oha la, lobe ba bo dayuuro la zonzɔnɔ. 21 Ba mɛhe nyaŋɛ zɔ kɛn' tanhe yɔgɔrɔ poan, la taŋsɛngehe woo poan te ba nyɛ Na'ayenɛ dabeem dabaherɛ wa, a paŋa dabaherɛ wa, daanse'ere te a ihege te a miim teŋparɛ wa. 22 Bahɛ asaala n tare vo'ohom a nyɔya poan ma'an wa dɛlega. A dela bem dɛna ba beha nyɛta en?