Di ya, n zɔdoma, ge nyu
5
1 Mam tanya la n pɔgɔsaaŋa wa, ho ane mɛ wo samanɛ te mam wa'an ho poan na kige mɔɔ, la puuro seto n tare nyuŋo soŋɔ, ge di de poan seerom, ge nyu de poan daam la iilom. Di ya, n zɔdoma, ge nyu. N zabadoma wa, nyu ya tegɛ.2 Mam ginhe mɛ ge te n suunre ɛɛra. Kɛleha, n dayene n bala ŋmɛ'ɛra la. Yu'ɛ bo mam tanya la n zaba wa. Mam yam bonɔ wa yu'ɛ. Mam soŋadaana wa, yu'ɛ ge mɛgelom n ma'ɛlɛ mam. Mam zonto tɔgɔre mɛ la yu'uŋɔ mɛgelom.
3 Mam yɛɛ n fuo mɛ, n le yɛ yoi? Mam deŋɛ pee n na'ma mɛ, n le nɛ yeŋa? 4 Te mam suunre bonɔ wa dekɛ a nu'o damɛ n koleŋa, te mam yam bɔna a poan. 5 Te mam ihege te n yu'ɛ bo n zaba wa, te n nu'uhe ana la nyuŋo soŋɔ, te la ihegera, te mam gin' koleŋa te n yu'ɛ 6 Te mam yu'ɛ, ka nyɛ n zaba wa, a lebe mɛ. Te mam suunre sagom la en lebe la. Te mam yehe ɛ en ka nyɛ, yi' en, ka wom a dama. 7 Te sɛba n gure teŋa la, kaara teŋa la ta nyɛ mam, nyɔkɛ mam ŋmɛ', pɔgɔlom mam, ge yɛɛ mam fuo.
8 Yerusalem pɔyɔɔhe wa, n belone ya mɛ, ya han nyɛ n zaba wa, ya wan yele en yeti bo? Yele ya en te mam ligiri mɛ a zuo.
9 Pɔgɔsoŋa wa bene zuo te hom behɛ te ho zaba la gane basɛba? Bene zuo te hom behɛ te ho zaba la gane sɛba me n yeti tomam wana wa?
10 Mam zaba la nyankere mɛ, mɔ'ɛ zɛ'a doi. Nɛreba tuhure han zɛ'a, enŋa n fili ba zan'an. 11 A zuo dela sanlema, te a zonto zo'e sobe wo aanra la. 12 A nini pelege wo dayenpeele la, te a zɛ'a nara. 13 Te a yaga wa muulom wo konɛ la. Te a nɔɔrɛ yetɔgom zan'anhom wo seerom la. 14 Te a nu'o ana wo sanlema yile, te kuga peele pire ko. Te a iŋa pelege woo wɔbɔnyɛnɛ te ba golɛ la kugu poonhogɔ la. 15 Te a na'ma wa saalom wo yuuŋa n yage sanlema zɛ'ɛlega zuo la, te a zɛ'a tan' wo Lebanon mɔlɔsomɔ tiihe la. 16 A nɔɔrɛ yetɔgom dela zan'anhom bo mɛŋa. A ane la soŋa. Yerusalem pɔyɔɔhe wa, mam zaba la n de n zɔ la n ane se'em n bala.