Lobe ho dia bahɛ ko'om poan
11
1 Lobe ho dia bahɛ ko'om poan, la han eŋɛ dabeha ayi', ho wan le nyɛ ka. 2 Tɔnrɛ hom tare sɛla la sugumnɔɔren boyopɔe, bii bonii tehɛ, ho ka mi' nɔyalegerɛ se'ere n wan sige teŋa la zuo na.3 Saŋgbana han perɛ, a niira la saa baha teŋa zuo na. Tia han lu gɔbega, bii zuɔ, kan lu zen'an la, ka gan' la bilam. 4 Hom se'em n behere sabeeo kan malom borɛ. Hom se'em n behere saa kan malom kɛ.
5 Hom ka mi' sabeeo n dole sore se'em la, bii bia n naane se'em ka ma pooren la, bala mea te ho kan baŋɛ Yenɛ se'ere n naam sɛla woo la tooma n kene se'em.
6 Bota bolika, da bahɛ te ho nu'uhe vɔ'ɔha yu'uŋɔ, ho ka mi' toondena bii dena, bii a zan'an n wa soŋɛ hɔ.
7 Nɛɛhom ane soŋa mɛ, niho han nyɛta wontɛɛŋa wa, la dela vom. 8 Asaala n vɔna yuura se'em la, a dita nyɛlom. Ge a tɛnra lika dabeha la yele, ge aŋa zo'e mɛ. Sɛla woo n ye' na la nya dela yoo.
9 Tara popeelom bonbilipaalega wa, la hom nan de bia wa. Bahɛ te ho suunre bɔ'ɔra hɔ popeelom ho bonbilipaalega dabeha wa poan. Dɔla ho suunre n bote se'em, la ho nini n nyɛ sɛla bɔta. Ge mina te sɛla woo te ho eta la, Yenɛ wan ta gankɛ hɔ. 10 Bala, yehe sunsunyiim ho vom poan. Yehe daaŋɔ ho iŋa poan bahɛ. Se'ere n sɔe la, bonbilipaanɛ, la de vom yɛla dela yoo.