Ane n ane wo yamdaana?
8
1 Ane n ane wo yamdaana? Ane wan nyaŋɛ pa'alɛ yele vɔnrɛ? Yamdaana nɛŋa wehegɛ mɛ, ge ka zuŋura.2 Mam yeti, tɛnra naba n bo nɔse'ere la, hom pɔ' Yenɛ nɛŋan te ho wan nana en la zuo. 3 Da kanbelɛ te ho ihege naba nɛŋan kalam. Da lagom bɔna naba pooren yɛhega yɛla poan, ge a dela naba, a ete la enŋa n bote se'em. 4 Naba yetɔgom n de zan'an, ane n wan soke en te a ete bala bo? 5 Se'em woo n nam en bo nɔse'ere la kan wom too. Potɛn'ɛrɛ daana n wan mina saŋa la, la sore la. 6 Yele woo saŋa, la de sore boe mɛ. Bala nɛra sone te a ŋmibe yeletooro zo'e zo'e poan.
7 Se'em n ka boe mina beere la zuo, ane n wan yele nɛra sɛla n ye' na? 8 Asaala ka tara sabeeo wa paŋa wan tara kɔ, bala mea te se'em ka tara a kum daarɛ paŋa. Wo pɛɛntɛɛnrɛ n ka tare sore te a bahɛ zaberɛ poan se'em la, toonfɛn'ɛha kan fan' sɛba n tone be'em la bahɛ.
9 Mam nyɛ yele ana woo la mam dekɛ n potɛn'ɛrɛ keŋɛ yelese'a woo n ete teŋparɛ wa zuo poan la. Saŋa boe mɛ te nɛra ne ta dekɛ yele pagelɛ nɛreba zuo, ta tuluge sagom a mɛŋa. 10 Mam nyɛ yelese'ere me dela, toonfɛn'ɛhadoma sɛba ne kena Yenɛ yire wa poan na la n ki te ba pin' ba soŋa, ge pɛngera ba teŋse'ehe poan te ba daa tona ba toonfɛn'ɛha la. Te wana me dɛna yoo.
11 Be'emdoma han ka tɔ'ɔra ba yɔɔrɛ tɔtɔ, nɛreba basɛba me wan bɔta te ba tom be'em. 12 Toonfɛn'ɛhadaana n tom toonfɛn'ɛha zo'e se'em ge kelom vɔna yuura la, mam mi' te la wan ana som gaŋɛ bala bo se'em n zote Yenɛ la, la bama n zote Yenɛ la zuo. 13 Ge toonfɛn'ɛhadoma la n ka zote Yenɛ la, la kan ana ba som. Ba vom dabeha kan yuue wo zanɔɔrɛ yilinyiliŋɔ n ka yuure se'em la.
14 Yeleyoo seko n ete teŋparɛ wa zuo dela, tontɔɔdoma n to'ohe toonfɛn'ɛhadoma yɔɔrɛ, te toonfɛn'ɛhadoma ton tɔ'ɔha tontɔɔdoma yɔɔrɛ. 15 Bala zuo, mam loe la dita nyɛlom vom wa poan. Se'ere n sɔe la, sɛla ka boe teŋparɛ wa zuo ana soŋa bo nɛresaala, gana a di ge nyu, ge nyeena, te nyeema bɔna la en a tooma woo poan a vom sebo te Yenɛ bo en teŋparɛ wa zuo la poan.
16 Mam eŋɛ n potɛn'ɛrɛ te n baŋɛ yam, ge behɛ asaala n namehere se'em teŋparɛ wa zuo ka ginhera bolika bii yu'uŋɔ la. 17 Mam nyɛ te Yenɛ n eŋɛ sɛla woo. Nɛra ka boe wan baŋɛ sɛla n ete teŋparɛ wa zuo. A han pon bɔta a zegɛ ɛ la se'em me, a kan malom bɔkɛ de vɔnrɛ. Yamdaana se'em han pon yeti enŋa mi', a ka gin' de.