Yetɔgom zo'e zo'e ka tare vɔnrɛ
6
1 Mam nyɛ la be'em boyema teŋparɛ wa zuo te bo din' saaleba. 2 Yenɛ n bo nɛra lɔgɔrɔ, tarega la na'ahegɔ, te a tara n bote sɛla woo, ge ka bo en sore te a di bo nyɛlom, ge te se'em ton sɔe di. Wana wa me dela yoo, sagona suunre. 3 Nɛra han dɔgɛ kɔma kɔbega, ge vɔna yuue. N vɔe yuue bala la, a kan malom di nyɛlom, ge ta ki te ba ka pin' en soŋa, mam wan yeti, se'em te ba dɔgɛ bahɛ nyane enŋa. 4 Se'ere n sɔe la, ban dɔgɛ se'em bahɛ la wa'an la yoo na, ge lebe yoo te a yu'urɛ ka porɛ. 5 Se'em n ka makɛ nyɛ wontɛɛŋa wa, bii a mina yelese'ere la nyane nɛre'ena wa. 6 Boraa wa han pon vɔna yuuma tuhure sugumnɔɔren boyi' pa'ahɛ, ge ka di a lɔgɔrɔ la nyɛlom, ba zan'an ka ye' la bɔberɛ yenɛ? 7 Asaala namehegɔ woo ye' la a nɔɔrɛn wa, ge la bala zan'an a koŋkoma'ahom ka malom tegera. 8 Yamdaana nyane gerego la wane? Naha mi' a mɛŋa tarega nɛreba nɛŋan nyɛta la bem? 9 Nini n nyɛte sɛla nyane suunre n bote sɛla. Wana me dela yoo, la dela sabeeo dika.10 Sɛla woo n eŋɛ pon maahom biŋe mɛ te la eŋɛ. Asaala n de se'em la pon maahom biŋe me na, bala asaala da ŋmɛ'ɛra nɔkpe'ene la se'em n kpe'em gana en wa. 11 Yetɔgom zo'e zo'e ka tare vɔnrɛ. Bo soŋorɛ la ane? 12 Vom ane la giriga ka tara vɔnrɛ, melona wo yilinyiliŋɔ la. Ane n mi' sɛla n ane soŋa bo to? Ane n mi' tomam n wan keŋɛ ge te la leen ana se'em?