Pɛngɛ Na'ayenɛ
106
1 Pɛngɛ Na'ayenɛ. Bo' en fara. Se'ere n sɔe la a ane la soŋa. A nɔŋerɛ kantɛ la boe la bala saŋa woo. 2 Ane n wan ta'an mɔɔlɛ Na'ayenɛ toonkanra wa, bii nyaŋɛ pɛngɛ en te la seke? 3 Kan'an boe mɛ sɛba n gorɛ yelemɛŋɛrɛ, sɛba n dole tontɔɔ daarɛ woo. 4 Na'ayenɛ, ho han zo'oha ho nɛreba, ho tɛnra mam. Ho han faanra ho nɛreba bahera, ho soŋɛ mam, 5 te n di sɛba te ho loe wa na'am la nyɛlom la. Ho bahɛ te n lagom di ho teŋa wa nyɛlom la, ge lagom naɛ la ho sɔ'ɔlom la pɛngɛ hɔ.6 Tomam tom la be'em wo to sɔdoma en yuun eŋɛ se'em la. Tomam tue mɛ, ge me tom toonfɛn'ɛha. 7 To sɔdoma la en yuun boe Mizraim teŋa la, ba yuun ka behe ho kerehe la. Ba yuun ka tɛnre ho som kekeko la, ge bire ba pɔya bo hom ko'kantɛ la n de Mɔgɔ Mɔlega la poan. 8 Ge te a sina ge fan' ba a yu'urɛ la zuo, te a nɛɛ a paŋkantɛ la. 9 Te a tanhɛ ko'kantɛ la, te bo ku'e, te a tare ba doohe ko'kantɛ mea poan nɛ kɛ'ɛŋa wo pɔgɔtia poan la dooe na. 10 Fan' ba dima la nu'uhen bahɛ. Dima la en yaɛ ba la nu'uhen te a yɔ to'e ba. 11 Te ko'om la di ba diŋdoma la, te ba ayena ka yee. 12 Te ba nya sakɛ bo a yelehom la, yoon pɛngɛ en.
13 Ge la ka yuue, te ba tamɛ enŋa eŋɛ sɛla la, ka gura a kan'aŋɔ. 14 Pɔgɔtia la poan ha, ba ta dekɛ ba mɛhe bo la ba koŋkoma'ahom, magahɛ Yenɛ pɔgɔtia mea poan behɛ. 15 Te a me bo ba ban soke sɛla la, ge dekɛ too en koore bahɛ ba zuo na.
16 Ba tiiheŋɔ la poan, ba nini wa tɛnta mɛ la Moses, la Aron, se'em te ba sɔ en bo Na'ayenɛ la. 17 Te teŋa yu'ɛ vole Datan. Teŋa la yu'ɛ mɛ vole Abiram la a nɛreba. 18 Bugum kantɛ en wa'ana di sɛba n dole ba poore la. Bugum en wobole en wa'ana di toonfɛn'ɛhadoma la.
19 Horeb Zoore la poan la, ba yagom la nagabila ze'ele, na'ahɛ sɛla te ba dekɛ sanlema kure. 20 Ba dekɛ la ba soŋa la tee to'e nahɔ n obere mɔɔ woɔnɛ. 21 Ba tamɛ ba Yenɛ se'ere n fan' ba bahɛ la mɛ, Yenɛ se'ere n tom yelekanra Mizraim teŋa la mɛ. 22 Yenɛ se'ere n tom nyalema Ham teŋa, ge tom tooma n tare dabeem Mɔgɔ Mɔlega zen'an la. 23 Te a yeti, N wan sagom ba. Han dagana Moses, se'em te a loe la n ze'ele bo ba a nɛŋan sohɛ en gu' a sunsunyiim la te a ka sagom la.
24 Te ba zagahɛ teŋsoŋa la. Ba ka sakɛ bo a yelehom la. 25 Ta gan'an ba sogorɛ deto poan gɔngelena, ka nam Na'ayenɛ. 26 Te a dekɛ a nu'o ŋmɛ' teŋa ge pɔ' yeti a wan bahɛ te ba ki pɔgɔtia la poan, 27 a wan bahɛ te ba yaahe lomehe teŋhe sese'ehe poan, te n yeregɛ ba bahɛ teŋhe poan. 28 Te ba dekɛ ba mɛhe tabalɛ la Baal Peor bagarɛ la, dita dia en dekɛ kaanbɛ bo baga en ka vɔe. 29 Nyiihe Na'ayenɛ suunre la ba toonfɛn'ɛha la, te too sige ba zuo na. 30 Te Pinehas ze'ele ŋmɛ' nu'po'ɔ, te too la ma'ɛn. 31 Te yele la dɛna tontɔɔ bɔŋa yele tara pota a yu'urɛ saŋa woo poan.
32 Meriba teŋa ko'om la nɔɔrɛn, ba le nyiihe Na'ayenɛ sunsunya mɛ, te Moses nyɛ daaŋɔ bo a mɛŋa bama zuo. 33 Se'ere n sɔe la, ba wa bire la boore bahɛ Yenɛ Sea la, te la bahɛ te Moses kanbelɛ tɔgɛ yetɔgom.
34 Ba ka sagom nɛreba la teŋhe la poan wo Na'ayenɛ n bo ba nɔɔrɛ se'em la, 35 Ge ton naɛ la teŋhe la nɛreba la, nya to'e ba teŋa etegɔ la. 36 Ba na'ahere ba baga la mɛ, te a ta lebege bɛnregɔ bo ba. 37 Ba tare ba dayɔɔhe mɛ, la ba pɔyɔɔhe kaanbera bɔ'ɔra bonbɛ'ɛhe. 38 Koora nɛreba n ka tare taalɛ, wo ba dayɔɔhe la la ba pɔyɔɔhe la te ba tara kaanbera baga Kanaan teŋa la. Te ba ziim ka'ahegɔ la sagom teŋa la. 39 Ba ganlom ba mɛhe mɛ la bama en eŋɛ sɛla la. Ba tooma la bahɛ te ba tona la yalomtooma la taaba.
40 Bala zuo te Na'ayenɛ suunre nyie la a nɛreba wa, te a sea yehe la a mɛŋa sɔ'ɔlom wa. 41 Te a dekɛ ba tuunle teŋhe, te ba diŋdoma sɔna ba beha. 42 Te ba diŋdoma la muguhe ba, ge pɛnregɛ ba te ba bɔna ba nu'uhen. 43 Saŋa zo'e zo'e te a ne fan' ba bahɛ, ge ba ba' lo mɛ la ba pobirega la, te ba be'em la malom pa'aha.
44 Ge en ta wom ba kaahega la, a behɛ nyɛ ba mɛlɛhegɔ la mɛ, 45 tɛɛn a nɔbiŋere la, te a nɔŋerɛ kantɛ la zuo, te a bahɛ. 46 Te a pɛnregɛ te sɛba woo n tare ba te ba dɛna ba yamehe la, bahɛ ba.